မိူဝ်ႈၼႆႉ ဝၼ်းတီႈ 12/7/2024 ယၢမ်းၵၢင်ၼႂ် 10 မူင်း သိုၵ်းမၢၼ်ႈ ယိုတ်းမိူင်း ၸႂ်ႉၵူၼ်းဝၢၼ်ႈၸၢင်ႉ ၼႂ်း ၸႄႈဝဵင်းမိူင်းယႆ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ ၶၢႆႉဢွၵ်ႇဝၢၼ်ႈ ဝႃႈၼႆသေတႃႉ ထိုင်မႃးယၢမ်းဝၢႆးဝၼ်း ယွၼ်ႉၼႂ်းပိုၼ်ႉတီႈ မီးလွင်ႈလႅၵ်ႈလၢႆႈလႄႈ ဢမ်ႇထိုင်တီႈလႆႈၶၢႆႉဢွၵ်ႇဝၢၼ်ႈ ၼႆယဝ်ႉ။

ၵူၼ်းပိုၼ်ႉတီႈ ဝဵင်းမိူင်းယႆ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈပွတ်းၼႂ် ၼၼ်ႉတႄႉ သိုၵ်းမၢၼ်ႈၶဝ် ၸႂ်ႉၵူၼ်းဝၢၼ်ႈ ပၢႆႈဢွၵ်ႇၶႃႈဢေႃႈ ။ၽိူဝ်ႇထိုင် ဝၢႆးဝၼ်းမႃးသမ်ႉဝႃႈ ဢမ်ႇႁႂ်ႈၶၢႆႉၼႆၶႃႈ။ မိူဝ်ႈတႄႇမၼ်း သိုၵ်းၵဝ်ႈၵၢင်ႉၶဝ်ၵေႃႈ ႁၢမ်ႈ ၵူၼ်းမိူင်းၵႂႃႇမႃး ၼႂ်းၵႄႈဝဵင်းမိူင်းယႆလႄႈ ဝၢၼ်ႈၸၢင်ႉ။ ငိၼ်းဝႃႈ သိုၵ်းဝႃႉ ၶဝ်မႃးတၢင်းမိူင်းယႆၼႆႉသေ ႁၢမ်ႈသိုၵ်းၵဝ်ႈၵၢင်ႉၶဝ် ယႃႇႁႂ်ႈယိုဝ်းသိုၵ်းမၢၼ်ႈယဝ်ႉၼႆဢေႃႈ။ ၵွပ်ႈၼႆလႄႈ ၵူၼ်းဝၢၼ်ႈဢမ်ႇဝၢၼ်ႈၸၢင်ႉၶဝ် ဢမ်ႇလႆႈၶၢႆႉယဝ်ႉၶႃႈ”- ဝႃႈၼႆ။  

ဝၢၼ်ႈၸၢင်ႉၼႆႉ မီးၾၢႆႇတူၵ်းဝဵင်းမိူင်းယႆ ယၢၼ်ဝဵင်းမွၵ်ႈ 8 လၵ်း မီးၼႂ်းၵႄႈၵၢင် မိူင်းယႆ – လႃႈသဵဝ်ႈ မီးဝႆႉလင်ၶႃႈႁိူၼ်းမွၵ်ႈ 300 လင် ႁူဝ်ၵူၼ်းဢမ်ႇယွမ်း 1,000 ၼႆယဝ်ႉ။

ယၢမ်းလဵဝ် သိုၵ်းဝႃႉၶဝ် မႃးယူႇဝႆႉ တီႈတၢင်းၽႄ 3 ယႅၵ်ႈ မိူၼ်ၼင်ႇ မိူင်းယႆ – တၢင်ႉယၢၼ်း – လႃႈသဵဝ်ႈ ၸိူဝ်းၼႆႉဝႆႉသေ ယဝ်ႉၵေႃႈ ႁၢမ်ႈသိုၵ်းၵဝ်ႈၵၢင်ႉ MNDAA လေႃႇတိုၵ်း တပ်ႉသိုၵ်းမၢၼ်ႈ – ၵူၼ်းပိုၼ်ႉတီႈ မိူင်းယႆလၢတ်ႈ။

ပူၼ်ႉမႃး မိူဝ်ႈဝၼ်းတီႈ 5 လိူၼ်ၵျူႊလၢႆႊၼႆႉ သိုၵ်းမၢၼ်ႈ ၶလရ 67 မိူင်းယႆ ယိုဝ်းၵွင်ႈလူင်ၵႂႃႇ တၢင်းဢိူင်ႇႁူဝ်ယသေ မၢၵ်ႇလူင်တူၵ်းသႂ်ႇ ႁိမ်းႁူင်းႁဵၼ်း (ၽႄ) ၸၼ်ႉသုင်။ ထိုင်မႃး ဝၼ်းတီႈ 7 မၢၵ်ႇလူင် တူၵ်းသႂ်ႇႁိူၼ်းယေး ၵူၼ်းဝၢၼ်ႈလူင် ဢိူင်ႇႁူဝ်ယ ထုၵ်းၾႆးမႆႈလူႉၵွႆ 2 လင် ၼႆယဝ်ႉ။