မိူဝ်ႈၼႆႉ ဝၼ်းတီႈ 12/07/2024 ယၢမ်းၵၢင်ၼႂ် 1 မူင်းၶိုင်ႈ သိုၵ်းမၢၼ်ႈ ယိုတ်းမိူင်း ၸႂ်ႉၶိူင်ႈမိၼ် မႃးပွႆႇ မၢၵ်ႇသႂ်ႇ တီႈႁူင်းႁဵၼ်းၸၼ်ႉသုင်မၢႆ 1 လႄႈ မၢႆ 2 ၼႂ်းဝဵင်းသႅၼ်ဝီ ၸႄႈတွၼ်ႈလႃႈသဵဝ်ႈ ၸိုင်ႈတႆး ပွတ်းႁွင်ႇ ထုၵ်ႇလူႉၵွႆ (ယွၵ်းယွႆ) တင်းသွင်လင်။
ၵူၼ်းပိုၼ်ႉတီႈ ဝဵင်းသႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်မၢၵ်ႇၶိူင်ႈမိၼ် သိုၵ်းမၢၼ်ႈ မႃးပွႆႇၶႃႈဢေႃႈ။ တင်းမူတ်း 3 လုၵ်ႈ။ ၼႂ်းၼၼ်ႉ တႃႇ 2 လုၵ်ႈ တူၵ်းသႂ်ႇ ၼႂ်းႁူင်းႁဵၼ်းၸၼ်ႉသုင် မၢႆ 1 တိူဝ်ႉၺႃးႁူင်းႁဵၼ်းလုၵ်ႈၼိုင်ႈလႄႈ လုမ်းပၢႆးပၺ်ႇၺႃႇ ဢၼ်မီးၼႂ်းႁူင်းႁဵၼ်းၼၼ်ႉ လုၵ်ႈၼိုင်ႈ။ ယဝ်ႉၵေႃႈ တူၵ်းသႂ်ႇ တီႈႁူင်းႁဵၼ်းၸၼ်ႉသုင်မၢႆ 2 ၼၼ်ႉ လုၵ်ႈ ၼိုင်ႈၶႃႈ။ ႁူင်းႁဵၼ်းတႄႉ လူႉၵွႆယွၵ်းယွႆ တင်းၼမ်ၶႃႈယဝ်ႉ။ လွင်ႈတုမ်ႉတိူဝ်ႉ ၵူၼ်းမၢတ်ႇၸဵပ်းလူႉတၢႆတႄႉ ဢမ်ႇမီးၶႃႈ”- ဝႃႈၼႆ။
ႁူင်းႁဵၼ်းၸၼ်ႉသုင် သွင်လင် ဢၼ်ၺႃးမၢၵ်ႇၶိူင်ႈမိၼ် သိုၵ်းမၢၼ်ႈ တူၵ်းသႂ်ႇၼႆႉသမ်ႉ ႁူင်းႁဵၼ်းၸၼ်ႉသုင် မၢႆ 1 ယူႇဝႆႉ ၼႂ်းပွၵ်ႉ 1 ။ ႁူင်းႁဵၼ်းၸၼ်ႉသုင် မၢႆ 2 သမ်ႉ ယူႇဝႆႉၼႂ်းပွၵ်ႉ 3 ဝဵင်းသႅၼ်ဝီ ၼႆယဝ်ႉ။
“ၵူၼ်းမိူင်းတႄႉ ပၢႆႈယူႇဝႆႉတီႈလွတ်ႈၽေးႁင်းၽႂ်မၼ်းယူႇ ပေႃးၵၢင်ၶမ်ႈမႃး ဢွၼ်ၵၼ်ၵႂႃႇၼွၼ်းတီႈ ၵႆဝဵင်း ဢိတ်းၼိုင်ႈ။ ၵူဝ်ၶိူင်ႈမိၼ်သိုၵ်းမၢၼ်ႈ မႃးပွႆႇမၢၵ်ႇသႂ်ႇဢေႃႈ။ ပေႃးၵၢင်ဝၼ်းတႄႉ ဢွၼ်ၵၼ်မႃး ႁဵတ်းသူၼ်ႁႆႈၼႃး ၽႂ်မၼ်း။ ၵၢတ်ႇတႄႉ ပိုတ်ႇၸူဝ်ႈၵႅပ်ႉၸူဝ်ႈၶၢဝ်း ဢိတ်းဢွတ်း ၸိူင်ႉၼၼ်ၵူၺ်း။ ပေႃးထိုင်ၵၢင်ဝၼ်းမႃးတႄႉ ယဵၼ်သီႇမူတ်းယဝ်ႉ ၶႃႈ”- ၵူၼ်းပိုၼ်ႉတီႈ ဝဵင်းသႅၼ်ဝီ သိုပ်ႇလၢတ်ႈၼႄၼင်ႇၼႆ။
ၼႂ်းလိူၼ်ၵျူႊလၢႆႊ 2024 ၼႆႉၵူၺ်း သိုၵ်းမၢၼ်ႈ ၸႂ်ႉၶိူင်ႈမိၼ် မႃးပွႆႇမၢၵ်ႇသႂ်ႇ တီႈဝဵင်းသႅၼ်ဝီၼႆႉ မီး 2 ပွၵ်ႈ ပႃးပွၵ်ႈၼႆႉယဝ်ႉ။ မိူဝ်ႈပွၵ်ႈဢွၼ်တၢင်းၼၼ်ႉ ဝၼ်းတီႈ 3 ယၢမ်းဝၢႆးဝၼ်း 2 မူင်းပၢႆ ၶိူင်ႈမိၼ် သိုၵ်းမၢၼ်ႈ မႃးပွႆႇသႂ်ႇတီႈဢိူင်ႇမိူင်းလီ တိူဝ်ႉၺႃး ၽူႈၸၢႆး လူႉတၢႆၵိုၵ်းႁိူၼ်း ၵေႃႉၼိုင်ႈ။ ဝၼ်းတီႈ 4 ယၢမ်း ၵၢင်ၼႂ် 12:15 (တဵင်ႈၶိုၼ်းၸၢႆႉ) မၢၵ်ႇၶိူင်ႈမိၼ် သိုၵ်းမၢၼ်ႈ မႃးပွႆႇထႅင်ႈ 3 လုၵ်ႈ တီႈပွၵ်ႉ 2 ႁိမ်း ႁူင်းပလိၵ်ႈမၢၼ်ႈ တိူဝ်ႉၺႃးႁိူၼ်းယေး ၵူၼ်းမိူင်းလူႉၵွႆ ယွၵ်းယွႆထႅင်ႈ သွင်လင် ၼႆယဝ်ႉ။
ယွၼ်ႉၽႅၼ်ၵၢၼ်ယၢၼ်ႇသိုၵ်း 1027 ၸုမ်းဢူၺ်းလီ ပွတ်းႁွင်ႇ 3 ၸုမ်း မိူၼ်ၼင်ႇ – သိုၵ်းတဢၢင်း TNLA ၊ သိုၵ်းၵဝ်ႈ ၵၢင်ႉ MNDAA လႄႈ သိုၵ်းရၶႅင်ႇ AA ႁူမ်ႈၵၼ် လေႃႇတိုၵ်း တပ်ႉသိုၵ်းမၢၼ်ႈ မႃးႁၢဝ်ႈႁႅင်း ၼႂ်းၸိုင်ႈတႆးပွတ်းႁွင်ႇ ႁူမ်ႈပႃး ၼႂ်းၸႄႈဝဵင်းသႅၼ်ဝီ ဝဵင်းၼိုင်ႈသေ ႁဵတ်းႁႂ်ႈတုမ်ႉတိူဝ်ႉၵူၼ်း မိူင်း ပၢႆႈၽေးသိုၵ်း ၼပ်ႉႁူဝ်မိုၼ်ႇ၊ ႁိူၼ်းယေးဝတ်ႉဝႃးၽႃသိူဝ်ႇ လူႉၵွႆမွၵ်ႈ 600 လင်လႄႈ တိူဝ်ႉၺႃးၵူၼ်းမိူင်း လူႉတၢႆမၢတ်ႇၸဵပ်းၸွမ်းထႅင်ႈၼမ်။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ