ဝၼ်းတီႈ 3 ၵျူႊလၢႆႊ သိုၵ်းဢူၺ်းလီပွတ်းႁွင်ႇ လွမ်ႉႁွပ်ႈဝႆႉဝဵင်းလႃႈသဵဝ်ႈ သိုၵ်းမၢၼ်ႈလၢမ်းလိမ်းယိုဝ်းၵွင်ႈလူင် ယိုဝ်းတင်ႈတႄႇၶမ်ႈဝႃးမႃးထိုင်မိူဝ်ႈၼႆႉတင်းဝၼ်း ထိုင်တီႈသၢႆၵၢၼ်မိၼ်လႆႈၵိုတ်းယင်ႉဝႆႉတင်းမူတ်း ။

ၵူၼ်းလႃႈသဵဝ်ႈလၢတ်ႈၽူႈတွႆႇႁွၵ်ႈဝႃႈ – “ၶိူင်ႈမိၼ်ၵေႃႈၵိုတ်းဝႆႉမူတ်းယဝ်ႉ တႄႇမိူဝ်ႈၼႆႉၵႂႃႇ။ တေၵိုတ်းလၢႆဝၼ်းတႄႉဢမ်ႇႁူႉ။ သဵၼ်ႈတၢင်းၵႃးၵေႃႈပိၵ်ႉဝႆႉၽွင်ႈယဝ်ႉ ယွၼ်ႉပိူဝ်ႈပၢင်တိုၵ်းပဵၼ်ဝႆႉတၢင်းၶဝ်ႈတၢင်းဢွၵ်ႇဝဵင်းၵူႈၾၢႆႇ ၊ တၢင်းဢွၵ်ႇၵႂႃႇၸူးမၢၼ်ႈဢၢႆႇ ပၢင်ႁုင်းၸိူဝ်းၼႆႉ သိုၵ်းမၢၼ်ႈယိုဝ်းၵွင်ႈလူင် ဢမ်ႇထၢတ်ႇ ” – ဝႃႈၼႆ။

ၶူင်ႇႁိူဝ်းမိၼ်လႃႈသဵဝ်ႈၼႆႉ ပဵၼ်ဢၼ်ယႂ်ႇသုတ်းၼႂ်းၸိုင်ႈတႆးပွတ်းႁွင်ႇ။ သင်ဝႃႈသိုၵ်းမၢၼ်ႈသင်ႇႁိူဝ်းမိၼ်ၵူၼ်းမိူင်း ၵိုတ်းလိုဝ်ႈလွင်ႈမိၼ်ၶိုၼ်ႈ-လူင်းယဝ်ႉၸိုင် မႆႈၸႂ်ၵူဝ်ၶိူင်ႈမိၼ်သိုၵ်း မႃးၶိုၼ်ႈလူင်း တႃႇၸႂ်ႉၼႂ်းပၢင်တိုၵ်းၵူၺ်းယဝ်ႉ ၵူၼ်းလႃႈသဵဝ်ႈၵေႃႉၼိုင်ႈမႆႈၸႂ်သေလၢတ်ႈၼင်ႇၼႆ။

ၶူင်ႇႁိူဝ်းမိၼ်လႃႈသဵဝ်ႈၼႆႉ မိူဝ်ႈပၢင်တိုၵ်းၽႅၼ်ယၼ်ႇသိုၵ်း 1027 တႄႇၼၼ်ႉ သိုၵ်းမၢၼ်ႈသင်ႇပိၵ်ႉသၢႆၵၢၼ်မိၼ်ၶိုၼ်ႈလူင်းတင်းမူတ်းသေ ဝၢႆးၼၼ်ႉ 5 လိူၼ် ၽွင်းမွၵ်ႈလိူၼ်မၢတ်ႉၶျ်ၼႆႉ ၸင်ႇပိုတ်ႇပၼ်ၶိုၼ်း ။

သိုၵ်းၸၢဝ်းၶိူဝ်းဢၼ်တူင်ႉၼိုင်ပိုတ်းယိုဝ်းသိုၵ်းမၢၼ်ႈယူႇ ၼႂ်းၸႄႈဝဵင်းလႃႈသဵဝ်ႈ ယၢမ်းလဵဝ်ၼႆႉ ပဵၼ်သိုၵ်းတဢၢင်း TNLA လႄႈ သိုၵ်းၵဝ်ႈၵၢင်ႉ MNDAA ။ သိုၵ်းမၢၼ်ႈ ဢဝ်ၶိူင်ႈမိၼ်မႃးမိၼ်ယူႇၼိူဝ်ဝဵင်းလႃႈသဵဝ်ႈၼႆႉတင်းဝၼ်း။ ပၢင်တိုၵ်းၼႆႉလၢမ်းလူင်းၵႂႃႇတၢင်း မိူင်းယႆ၊ ၶူဝ်ၼမ်ႉမၵေႃႈ လူႉၵွႆ ႁဵတ်းႁႂ်ႈၵူၼ်းမိူင်းဢမ်ႇၸၢင်ႈပၢႆႈၽေးသိုၵ်းဢွၵ်ႇဝဵင်း။

ၼႂ်ၼႆႉၵေႃႈ သိုၵ်းမၢၼ်ႈယိုဝ်းၶိူင်ႈတရူၼ်ႊ ၶွင်သိုၵ်း MNDAA တူၵ်း၊ မၢၵ်ႇတီႈတရူၼ်ႊၼၼ်ႉတူၵ်းသႂ်ႇႁိူၼ်းၵူၼ်းမိူင်း တီႈပွၵ်ႉ 1 ဝဵင်းလႃႈသဵဝ်ႈ။ ၵူၼ်းႁိူၼ်းလဵဝ်ၵၼ်တၢႆထင်တီႈ 6 ၵေႃႉ။

တီႈဝဵင်းလႃႈသဵဝ်ႈၼႆႉ မီးဝႆႉတိူင်းသိုၵ်းၸဵင်ႇႁွင်ႇဝၼ်းဢွၵ်ႇယမၶ။ ပၢင်တိုၵ်း 1027 ၼၼ်ႉဢမ်ႇတၼ်းယိုဝ်းတိူင်းသိုၵ်းသေ လႆႈၵႂႃႇဢုပ်ႇဢူဝ်းၵိုတ်းတိုၵ်းၵၼ် တီႈႁၢႆၵိူင်ႇ သေပၢင်တိုၵ်းယဵၼ်ၵႂႃႇပႅတ်ႈ။ ယၢမ်းလဵဝ် ပၢင်တိုၵ်းၶိုၼ်းပဵၼ်မႃးႁိမ်းႁွမ်းဝဵင်းလႃႈသဵဝ်ႈၸိူင်ႉၼႆတႄႉ ၵူၼ်းမိူင်းမႆႈၸႂ်ဝႃႈ ၵူဝ်ပၢင်တိုၵ်းလၢမ်းၶဝ်ႈထိုင်ၼႂ်းဝဵင်းၼႆယူႇ။

ပၢင်းတိုၵ်းႁိမ်းႁွမ်းဝဵင်းလႃႈသဵဝ်ႈၼႂ်းဝၼ်းတီႈ 2 လႄႈ 3 ၵျူႊလၢႆႊၼႆႉ ၾၢႆႇတၢင်းသိုၵ်းၸၢဝ်းၶိူဝ်းပိုၼ်ၽၢဝ်ႇဝႃႈ ယိုတ်းလႆႈတပ်ႉပၢင်သဝ်းသိုၵ်းမၢၼ်ႈဢၼ်ၼိုင်ႈယဝ်ႉဝႃႈၼႆသေတႃႉ ယူႇတီႈၽူႈတွႆႇႁွၵ်ႈပႆႇၸၢင်ႈယိုၼ်ယၼ်။