ပႆႇတၼ်းၶဝ်ႈတိုၵ်းၵေႃႈ လီဢဝ်ပုၼ်ႈၽွၼ်း ၵွပ်ႇၵူႈၵႄႈၶႄပၼ် ၵူၼ်းမိူင်းထူပ်းၽေးသိုၵ်း

ပေႃးဝႃႈ လိၵ်ႈႁူမ်ႈမၢႆၵိုတ်းတိုၵ်းႁၢႆႊၵႅၼ်ႊၼၼ်ႉ လူႉလႅဝ်ၵႂႃႇ ႁွၼ်ၼမ်ႉပၢင်တိုၵ်းမိူင်းတႆးပွတ်းႁွင်ႇ တၵ်းမႃးထႅင်ႈပွၵ်ႈသွင်ၼႆ မီးၵေႃႉလၢမ်းႁၼ် ပၼ်ၾၢင်ႉၵၼ်ယူႇ မိူဝ်ႈၸဝ်ႉဢွၵ်ႇၶၢဝ်ႇဝႃႈ ဝၼ်းတီႈ 15 လိူၼ်ထူၼ်ႈ 6 ၼႆသေ ပဵၼ်တႄႉတႄႉ ဝၼ်းတီႈ 25 ။

ငိၼ်းႁူႉၸွမ်းၽႅၼ်ပိူၼ်ႈၵေႃႈယႃႇ လွင်ႈႁၢင်ႈႁႅၼ်းတူဝ်ႈတၼ်းသမ်ႉ ဢမ်ႇၶိုတ်းမိုဝ်ႉယၢမ်းလႆႈ။ ၵွပ်ႈၼႆ ႁၢၼ်ႉတေႃႇဝၼ်းမိူဝ်ႈၼႆႉ ပႆႇငိၼ်းဝႃႈတပ်ႉသိုၵ်းၸိုင်ႈတႆး ၶဝ်ႈပႃးၸွမ်းၼႂ်းၵၢၼ်တိုၵ်း၊ ထိုင်ၶၵ်ႉၼႆႉ တိုၵ်ႉလႆႈႁၼ်လႆႈငိၼ်း တပ်ႉသိုၵ်းၸိုင်ႈတႆး သွင်ၾၢႆႇပိၼ်ႇဝၢႆႇမၢပ်ႇၼႄးၵၼ် ၼိူဝ်လွင်ႈၵၢင်မၢၵ်ႇ လွင်ႈသွၵ်ႈတဝ်ငွႆးယိုဝ်း ၵၼ်ယူႇလႄႈ ယႃႇဝႃႈ ၵူၼ်းမိူင်းၽၵ်းၵႃႇ တေႃႈၼင်ႇ ၽူႈၵူၼ်းၵၢၼ်မိူင်းၶဝ်ၵေႃႈ လႅပ်ႈယင်းတေဢမ်ႇၸၢင်ႈ ၶဝ်ႈၵႄႈၸွမ်းလႆႈ ငၢႆႈငၢႆႈလူးၵွၼ်ႇ။

ၽိူဝ်ႇဝႃႈ ၽူႈၵူၼ်းၵၢၼ်မိူင်းၶဝ် ဢမ်သဵင်ဝႆႁူဝ် ယူႇယဝ်ႉၵေႃႈ ၵူၼ်းမိူင်းၽၵ်းၵႃႇၼႆႉ ယိင်ႈၶႅၼ်းဢမ်ႇၸၢင်ႈ ပိုင်ႈၽႂ်၊ ၸႂ်တူၵ်းၸႂ်ႁူင်ႈဢမ်ႇၵႃး ၸႂ်သဵင်ႈၸႂ်ၸၢင် ၼိူဝ်ၽူႈႁဵတ်းၵၢၼ်သိုၵ်းၵၢၼ်မိူင်းမႃးယဝ်ႉ။

ၵူၼ်းၼုမ်ႇၵူၼ်းၵမ် ၵမ်ႈၼမ်ၵေႃႈ တူၺ်းတူၺ်းပၢင်တိုၵ်းသိုၵ်းသိူဝ် ဢၼ်ၵူၺ်း ၵုမ်ႇၵိူတ်ႇပဵၼ်ယူႇ ၼႂ်းမၢၼ်ႈ ႁဝ်း ဝဵင်းႁဝ်း မိူင်းႁဝ်းသေ လႆႈပွႆႇၾႃႈပၼ်ပိူၼ်ႈပၼ်ႇပုတ်ႈပေႉပုၼ်ႈယူႇ ၼၼ်ႉလႂ်၊ တူၺ်းတူၺ်း ပေႃႈမႄႈပီႈ ၼွင်ႉငိူၼ်ႈၶိူဝ်းလဵဝ်ၵၼ် လႆႈတၢႆလႆႈမၢတ်ႇလႆႈၽၢတ်ႇၵၼ်ယူႇဢမ်ႇႁူႉဝႃႈ ၸွင်ႇပႃႈတေယဝ်ႉလႆႈၼၼ်ႉလႂ် သေလႄႈ ယိၼ်းဢမ်ႇၶိုတ်းၸႂ်ႁၢၼ်ႉၸႂ်မႃးယဝ်ႉ တေလႆႈၶဝ်ႈပႃးၸွႆႈထႅမ်ၸိူင်ႉႁိုဝ် တီႈၽႂ်ဝူၼ်ႉဢမ်ႇပွင်ႇလႄႈ ပဵၼ်ၵူၼ်းလူႉၵူၼ်းပၢႆႈၵႂႃႇၵေႃႈ ၼမ်လိူဝ်ၼမ်ပႅတ်ႈယဝ်ႉ။

ပၢင်တိုၵ်း 1027 လွပ်ႈထူၼ်ႈသွင်ၼႆႉ တိုၵ်ႉပဵၼ်ၾၢႆႇ TNLA လႄႈ PDF တင်း ၾၢႆႇသိုၵ်းမၢၼ်ႈ လေႃႇတိုၵ်းၵၼ်၊ လႅပ်ႈပႆႇပႃး MNDAA လႄႈ AA ။ PLA လႄႈ BPLA ဢၼ်ၵိုၵ်းၵၼ်ဝႆႉတင်း MNDAA ၼၼ်ႉၵေႃႈ ပႆႇႁၼ်ၶဝ်ႈပႃး။ တေဢမ်ႇ ၶဝ်ႈပႃးယဝ်ႉႁႃႉၼႆတႄ့ ၽႂ်ဢမ်ႇၸၢင်ႈလၢမ်းလႆႈ တႅတ်ႈတေႃး။

ပေႃးၶဝ်ႈပႃးၸွမ်းမႃး ထႅင်ႈလၢႆလၢႆၸုမ်း ၸွင်ႇသမ်ႉတေဢဝ်ၼႃႈလဵဝ်လၢႆးလဵဝ်ၵူၺ်းႁိုဝ်။ လုၵ်ႉလၢႆပႃႈလၢႆၾၢႆႇ ႁူမ်ႈလူမ်ႇတိုၵ်းမႃးၸိုင် ၵူၼ်းမိူင်းၼႆႉ ယိုင်ႈၶႅၼ်းတေဢမ်ႇၸၢင်ႈႁႃႁၼ်တၢင်းပၢႆႈ ဢၼ်တေႁူမ်ႇလူမ်ႈတူဝ် ၸႂ်ၵွၼ်ႇသႄႈ။

ၼႂ်းထုင်ႉၼွင်ၶဵဝ်၊ ၵျွၵ်ႉမႄးၼႆ ၵူၼ်းမိူင်းလႆႈပဵၼ်ၸၢၵ်ႇသိုၵ်းယူႇၼႆႉ ႁဝ်းႁႃး တေႁဵတ်းႁိုဝ်ၵွပ်ႇၵူႈၵႄႈၶႄၸွႆႈၼႆ ၽူႈ ၵူၼ်းဢွၼ်ႁူဝ်ၵၢၼ်သိုၵ်း၊ ၽူႈၵူၼ်းဢွၼ်ႁူဝ်ၵၢၼ်မိူင်း၊ ၽူႈၵူၼ်းဢွၼ်ႁူဝ်ၵၢၼ်တူင်ႇဝူင်းလႄႈ ၵူၼ်းၼုမ်ႇ ၵူၼ်းၵမ်ႁဝ်းၶဝ် လီလႆႈၵွင်ႉသၢၼ်တူၵ်းလူင်းၵၼ်တႅတ်ႈတေႃးသေ ၶိုင်ႁူမ်ႈယွၼ်ႈၽဵင်ႇယဝ်ႉဢေႃႈ။

ၸိူဝ်းထူပ်းၽေးတၢႆႁၢႆတိူဝ်ႉမၢတ်ႇသေ သမ်ႉလႆႈပၢႆႈလႆႈမူၵ်း လႆႈႁႃသေႃႉတီႈႁူမ်ႇလူမ်ႈသၢႆၸႂ်ယူႇ ယႅၼ်ႈယႅၼ်ႈ ၼၼ်ႉ တေလႆႈၼႅတ်ႈၶိုင်ၵႄႈသၢႆႇယူတ်းယႃပၼ်ၼႂ်းဝႆးဝႆးယဝ်ႉ ၸိူဝ်းယူႇၼႂ်းမၢၼ်ႈဢိူင်ႇ ၸႄႈဝဵင်း ဢၼ်ၸၢင်ႈထူပ်းၺႃး ၽေးၶဵၼ်ၼၼ်ႉၵေႃႈ တေႁဵတ်းႁိုဝ်ၶိုင်ၶၢႆႉပၼ်တီႈယူႇသွၼ်ႈသဝ်းၼႆ တေလႆႈၶႆႈၸႂ်ၽႅၼ်တမ်းပႃး ဢမ်ႇႁၢင်ႉသႄႈ။

ယၢမ်းလဵဝ် ၵၢၼ်ႁႃၵိၼ်လဵင်ႉတွင်ႉ တႃႇၵူၼ်းထၢၼ်ႈပိုၼ်ႉၼႆႉ တေဢမ်ႇမီးၸုမ်းလႂ် ၽူႈလႂ်တၼ်း ပၼ်ၶၢဝ်းယၢမ်းဝူၼ်ႉသွၼ်ႇ၊ ၵုမ်ႇလႆႈၶႆႈၸႂ်တႃႇႁူမ်ႇလူမ်ႈ ၵူၼ်းႁိူၼ်းၸမ်ၸႂ်တူဝ်ၵဝ်ႇၵူၺ်းလႄႈ တေႃႈဝႃႈမီးၵၢင်ၸႂ် ၸေႇတၼႃႇ ၶႂ်ႈ ၸွႆႈလဵင်ႉလူ ပူလူမ်ႈၵၼ်ၵေႃႈ တေလုၵ်ႉႁဵတ်းယၢပ်ႇ၊ ၸင်ႇၼၼ် သင်ဝႃႈ ၾၢႆႇသိုၵ်းၾၢႆႇမိူင်း ၼႂ်းႁဝ်းႁူမ်ႈႁပ်ႉဢဝ်ပုၼ်ႈ ၽွၼ်း တႅတ်ႈတေႃးၶိုတ်းယၢမ်းၸိုင် ၶဝ်ႈပႃးပဵၼ်ၵၢၼ်ၵွပ်ႇၵူႈ ၸိူဝ်ႉၶိူဝ်းႁူဝ်ၼိုင်ႈ ယူႇယဝ်ႉလႄႈ တၵ်းမီးၽွၼ်းလီတႃႇမိူဝ်းၼႃႈ ဢမ်ႇႁၢင်ႉသႄႈ။ ၼႂ်းငဝ်းလၢႆး ပဵၼ်သိုၵ်းသိူဝ်ယူႇၼႆႉ ၵၢၼ်ၵွပ်ႇ ၵူႈဢဝ်သၢႆၸႂ်ၵူၼ်းမိူင်း တိုၼ်းလမ်ႇလွင်ႈထီႉ ၼိုင်ႈယဝ်ႉ။

ဝႆႉဝႃႈ ၶႂ်ႈတိုၵ်းၸွမ်းယူႇ၊ ၶိုင်တိုၵ်းၸွမ်းယူႇ ၼႆၵေႃႈလၢႆးလႃႈ ၵွၼ်ႇၵူၼ်းမိူင်းပႆႇပႃႈတူၵ်းသုမ်း တိူဝ်ႉမၢတ်ႇ လူႉသုမ်း ၼမ်လိူဝ်ၵဝ်ႇၼႆႉ တၵ်းလႆႈၵွပ်ႇၵူႈႁႂ်ႈထိုင်တီႈႁူမ်ႇလူမ်ႈ လွတ်ႈၽေးၼၼ်ႉပႃးယဝ်ႉ။

ထႃႈဢမ်ႇၶႄလႆႈ ၵူၼ်းမိူင်းၸိုင် ၶဝ်ႈပၢင်တိုၵ်းပေႉပုၼ်ႈမႃးၵေႃႈ သမ်ႉတေလႆႈၶိုင်ပူၵ်းပွင်ပႃး ႁႅင်းၵူၼ်းထႅင်ႈ ယူႇလႄႈ ႁဝ်းႁႃးႁႂ်ႈဢဝ်ၵၢၼ်ၵွပ်ႇၵူႈၵူၼ်းမိူင်းၵေႃႈ ပဵၼ်လမ်ႇလွင်ႈသုတ်း ဢွၼ်တၢင်းသုတ်းဢၼ်ၼိုင်ႈသေ ႁူမ်ႈလုၵ်ႉၶိုင်ၵႂႃႇ မိူဝ်ႈလဵဝ်ယၢမ်းလဵဝ်ၼႆႉသေၵမ်း။ ယဝ်ႉၸင်ႇ ၵွႆႈသိုပ်ႇၶႆႈၸႂ် ၵၢၼ်လူင်တၢင်ပိူင်ၼၼ်ႉ တေတိူဝ်းလီႁိုဝ်ၼႆ ယွၼ်းပၢႆးၼႄတၢင်းႁၼ် မွၵ်ႈၼႆႈသေ တေၶွတ်ႇယွတ်ႈသၢႆၵႂၢမ်း တႃႇဝူင်ႈၼႆႉၵွၼ်ႇဢေႃႈ။