မိူဝ်ႈၼႆႉ ဝၼ်းတီႈ 21/06/2024 ယၢမ်းၵၢင်ၼႂ် 10 မူင်းထိုင် 11 မူင်းၶိုင်ႈ ၵူၼ်းဝၢၼ်ႈၼမ်ႉၶွႆႈ (မြစ်ဆုံကျေးရွာ) ၼႂ်းၸႄႈဝဵင်းမိူင်းမိတ်ႈ ၸိုင်ႈတႆးပွတ်းႁွင်ႇ ဢွၵ်ႇၼႄၵၢင်ၸႂ်တေႃႇ တပ်ႉသိုၵ်းတဢၢင်း TNLA ဝႃႈၼႆ။

ၵူၼ်းပိုၼ်ႉတီႈ ဝဵင်းမိူင်းမိတ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ပဵၼ်ၵူၼ်းဝၢၼ်ႈမျိတ်ႉသူင်ႇ ဢွၵ်ႇၼႄၵၢင်ၸႂ် တေႃႇသိုၵ်းလွႆၶဝ် လႆႈႁူႉဝႃႈ သိုၵ်းလွႆႁၢမ်ႈၵူၼ်းမိူင်းၵႂႃႇမႃး ၸွမ်းတႃႈၸွမ်းတၢင်း၊ ႁၢမ်ႈၵႂႃႇႁဵတ်းၵၢၼ်လႄႈ ၵဵပ်းၶွၼ်ႇၵျၢမ်း ၸိူင်ႉၼႆၶႃႈဝႃႇ။ ဢဵၼ်ႁႅင်းၵူၼ်းမိူင်း ဢွၵ်ႇၼႄၵၢင်ၸႂ်တေႃႇတႄႉ တေဢမ်ႇယွမ်း 50 ၵေႃႉၼႆႉ”- ဝႃႈၼႆ။

ဝၢၼ်ႈၼမ်ႉၶွႆႈၼႆႉ မီးၼႂ်းၵႄႈမိူင်းမိတ်ႈ – မၢၼ်ႈပဵင်း ယဝ်ႉၵေႃႈ တေယၢၼ်ဝဵင်းမိူင်းမိတ်ႈ 18 လၵ်း မီးဝႆႉၸဵင်ႇႁွင်ႇဝၼ်းတူၵ်း မိူင်းမိတ်ႈလႄႈ ၵမ်ႈၼမ် ပဵၼ်ၸၢဝ်းမၢၼ်ႈယူႇသဝ်းဝႆႉ။ လိူဝ်ၼၼ်ႉ သဵၼ်ႈတၢင်းၼႆႉ တေၵၢႆႇၸူးတၢင်း ၸႄႈဝဵင်းမၢၼ်ႈမေႃႇ ၸႄႈမိူင်းၶၢင် ဝႃႈၼႆ။

“ဝၢၼ်ႈၼမ်ႉၶွႆႈၼႆႉ ၵမ်ႈၼမ် ပဵၼ်ၸၢဝ်းမၢၼ်ႈယူႇသဝ်း။ ၸၢဝ်းတႆးတႄႉ မီးၵမ်ႈဢေႇၵူၺ်းၶႃႈ။ ၵူၼ်းဝၢၼ်ႈၼၼ်ႉ ၵမ်ႈၼမ် ပဵၼ်ၵူၼ်းဢၼ်ၶဝ်ႈႁူမ်ႈ PDF ၶႃႈဢေႃႈ။ ၸုမ်း PDF ပွတ်းတွၼ်ႈၼၼ်ႉသမ်ႉ တေယူႇတႂ်ႈသိုၵ်းၶၢင် ၵုမ်းၵမ်။ တီႈမိူင်းမိတ်ႈၼႆႉ သိုၵ်းၶၢင်ၵေႃႈ ၶႂ်ႈလႆႈ၊ သိုၵ်းလွႆၵေႃႈ ၶႂ်ႈလႆႈၼၼ်ႉယဝ်ႉ။ လွင်ႈသိုၵ်းၶၢင်ၶဝ် ၶႂ်ႈလႆႈၼၼ်ႉ ယွၼ်ႉသိုၵ်းမၢၼ်ႈ ဢၼ်ပၵ်းဝႆႉတီႈမိူင်းမိတ်ႈၼႆႉ ၵႆႉႁႅၼ်းသိုၵ်း ၶိုၼ်ႈတိုၵ်းၶဝ်တၢင်းမိူင်းၶၢင်ၼၼ်ႉၶႃႈၼႃႇ”- ၵူၼ်းပိုၼ်ႉတီႈ ဝဵင်းမိူင်းမိတ်ႈ သိုပ်ႇလၢတ်ႈၼႄၼင်ႇၼႆ။

ယၢမ်းလဵဝ် ၼႂ်းၸႄႈဝဵင်းမိူင်းမိတ်ႈၼႆႉ မီးၸုမ်းယိပ်းၵွင်ႈၵၢင်ႇ တူင်ႉၼိုင်ယူႇဝႆႉ မိူၼ်ၼင်ႇ – သိုၵ်းမၢၼ်ႈ ယိုတ်းမိူင်း၊ သိုၵ်းၶၢင် KIA ၊ သိုၵ်းတဢၢင်း TNLA ၊ သိုၵ်းတႆး SSPP လႄႈ ၸုမ်းၵႅတ်ႇၶႄႈၵူၼ်းမိူင်း PDF ၸိူဝ်းၼႆႉ။