သိုၵ်းမၢၼ်ႈ ယိုတ်းမိူင်း တီႉၺွပ်းၵႂႃႇ ၵူၼ်းဝၢၼ်ႈယေႇၽိဝ်ႇ မွၵ်ႈ 60 ၵေႃႉ ၼႂ်းၸႄႈဝဵင်းသီႇသႅင်ႇ ၸိုင်ႈတႆး ပွတ်း ၸၢၼ်း ႁိုင်ဝူင်ႈၼိုင်ႈယဝ်ႉ ပႆႇပွႆႇမႃးၶိုၼ်း – ၸုမ်း PNLO လၢတ်ႈ။
မိူဝ်ႈဝၼ်းတီႈ 10/06/2024 ၼၼ်ႉ သိုၵ်းမၢၼ်ႈ ၶဝ်ႈတီႉၺွပ်း ၵူၼ်းဝၢၼ်ႈယေႇၽိဝ်ႇ 59 ၵေႃႉ ၵႂႃႇၵုမ်းၶင်ဝႆႉ တီႈၼႂ်းၸလွပ်ႈဝၢၼ်ႈ (ႁူင်းႁေႃဝၢၼ်ႈ) တေႃႇထိုင်ဝၼ်းတီႈ 17 ၼႆႉ ပႆႇပွႆႇပၼ်သေၵေႃႉ လိူဝ်ၼၼ်ႉ ၵူၼ်းပၢႆႈၽေးသိုၵ်း ဢၼ်သွၼ်ႈယူႇဝႆႉ ၸွမ်းၼႂ်းထိူၼ်ႇၼႂ်းၶိူဝ်း ၸိူဝ်းၼၼ်ႉၵေႃႈ ႁႂ်ႈပွၵ်ႈမႃးယူႇဝၢၼ်ႈၶိုၼ်း တဵၵ်းၶၢၼ်းႁွင်ႉၶိုၼ်းၼႆ – ၶုၼ်ႇရဵၼ်းယၢၼ်ႇ ၽူႈၶၢၼ်ပၢၵ်ႇ PNLO လၢတ်ႈဝႆႉၼင်ႇၼႆ။
ၵူၼ်းဝၢၼ်ႈယေႇၽိဝ်ႇ ဢၼ်ၺႃးတီႉၺွပ်းဝႆႉ မွၵ်ႈၶိုင်ႈၼႆႉ ပဵၼ်ၼၢင်းယိင်းသေ ယၢမ်းလဵဝ် လႆႈၵိၼ်ယူႇသဝ်းၸိူင်ႉႁိုဝ် ဢၼ်ဝႃႈၼၼ်ႉတႄႉ ပႆႇမီးၽႂ်ႁူႉၸွမ်း ဝႃႈၼႆ။
မိူၼ်ၼႆ ပူၼ်ႉမႃး မိူဝ်ႈလိူၼ်မေႊ ဝၼ်းတီႈ 6 ၼၼ်ႉၵေႃႈ သိုၵ်းမၢၼ်ႈ မၢပ်ႇၼႄးဝႃႈ ၵဵဝ်ႇၶွင်ႈတင်း ၸုမ်းၵႅတ်ႇၶႄၵူၼ်းမိူင်း PDF ၼႆသေ တီႉၺွပ်းၸႅတ်ႈထၢမ် ၵူၼ်းဝၢၼ်ႈယေႇၽိဝ်ႇ 9 ၵေႃႉ။
လိူဝ်ၼၼ်ႉ ၼႂ်းဝၼ်းတီႈ 2 လိူၼ်ၵျုၼ်ႊၼႆႉ ၸုမ်းပျီႇတူႉၸိတ်ႉပဢူဝ်း PNO တႂ်ႈသိုၵ်းမၢၼ်ႈ ယိုတ်းမိူင်း ၵုမ်းၵမ် တီႉ ၺွပ်းႁႅမ်တၢႆပႅတ်ႈ ဢူးၵျေႃႉလၢဝ်ႇ ဢႃယု 50 ပီ ၵူၼ်းဝၢၼ်ႈၵယၢၼ်းလေး ၸႄႈဝဵင်းသီႇသႅင်ႇ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ