ဝၢႆးလင် သိုၵ်းၵဝ်ႈၵၢင်ႉ MNDAA ၵုမ်းလႆႈဝဵင်းသႅၼ်ဝီယဝ်ႉၼႆႉ ပၼ်ၶႂၢင်ႉပိုတ်ႇပၢင်တေႃႇလွင်းမႃး ဢမ်ႇထၢတ်ႇလႄႈ ႁဵတ်းႁႂ်ႈတၢင်းယၢမ်ႈၵူၼ်းမိူင်း လူႉမႃးၼမ်။

တႄႇဢဝ် ဝၼ်းတီႈ 16/06/2024 ၼႆႉမႃး ၸဝ်ႈငိုၼ်းသႃး ၵူၼ်းသူင်ပိုတ်ႇပၢင်တေႃႇလွင်း ဢၼ်ယူႇတႂ်ႈသိုၵ်းၵဝ်ႈၵၢင်ႉ ၵမ်းၵုမ်ၼၼ်ႉ သိုပ်ႇမိူဝ်းပိုတ်ႇပၢင်တေႃႇလွင်းထႅင်ႈ တီႈဢိူင်ႇမိူင်းပႃး ၸႄႈဝဵင်းသႅၼ်ဝီ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ ဢွင်ႈတီႈ ဢၼ်ၶဝ်ၵႂႃႇပိုတ်ႇၼၼ်ႉသမ်ႉ ၸမ်ၵၢတ်ႇ၊ ႁူင်းႁဵၼ်းၼႃႇလႄႈ ႁဵတ်းႁႂ်ႈၵူၼ်းမိူင်းမႆႈၸႂ်ႁႅင်း ၼႆယဝ်ႉ။

ၵူၼ်းသႅၼ်ဝီ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ပေႃႈမႄႈလုၵ်ႈဢွၼ်ႇတႄႉ မႆႈၸႂ်ႁႅင်းဢေႃႈ  ယွၼ်ႉၶဝ်မႃးပိုတ်ႇ ပၢင်တေႃႇလွင်း ၸမ်ႁူင်းႁဵၼ်းၼႃႇဢႃးလႃးလႄႈ ၵူဝ်တၢင်းယၢမ်ႈလုၵ်ႈဢွၼ်ႇ ၵူၼ်းၼုမ်ႇ လူႉၸွမ်းၼၼ်ႉၵူၺ်းၶႃႈယဝ်ႉ။ တေႃႈၼင်ႇ တီႈမိူင်းပႃးၼႆႉ တိုၵ်ႉႁႃမႃးပိုတ်ႇၵူၺ်း ၵူၼ်း ၸိူဝ်းလွင်းသုမ်းၼႆႉ ၼမ်ၼႃႇယဝ်ႉၶႃႈ။ မၢင်ၸိူဝ်း ဢဝ်သူၼ်ဢဝ်ၼႃး ၵႂႃႇၵမ်ႉၵေႃႈမီးဢေႃႈ။ မိူၼ် ၼင်ႇ ပၢင်တေႃႇလွင်းတီႈၼႂ်းၵၢင်ဝဵင်းသႅၼ်ဝီၼႆႉၵေႃႈ ၼိုင်ႈဝၼ်းလႂ် ၵူၼ်းလွင်းသုမ်းငိုၼ်းၶႄႇ 7 မိုၼ်ႇ ၵေႃႈ မီးဢေႃႈ။ ၵမ်ႈၽွင်ႈ ၶၢႆသူၼ်ၶၢႆၼႃး၊ ၶၢႆၶူဝ်းၶွင်ၼႂ်းႁိူၼ်းယေးသေ ၵႂႃႇလဵၼ်ႈၵေႃႈမီး” – ဝႃႈၼႆ။

ယွၼ်ႉပၢင်တေႃႇလွင်းၸိူဝ်းၼႆႉသေ ႁဵတ်းႁႂ်ႈတၢင်းယၢမ်ႈၵူၼ်းမိူင်းလူႉ ၸွမ်းၼမ်မႃးလႄႈ ၵွပ်ႈၼႆ ယူႇတီႈ ၵူၼ်းမိူင်းသေ ဢွၼ်ၵၼ်တုၵ်းယွၼ်းႁႂ်ႈသိုၵ်းၵဝ်ႈၵၢင်ႉ ပိၵ်ႉဢိုတ်းပႅတ်ႈပၢင်လွင်းၼႆႉ ဝႆးဝႆး ဝႃႈ ၼႆ။

“ပၢင်တေႃႇလွင်းၼႆႉ ပိုတ်ႇမႃးၸဵမ်မိူဝ်ႈ သိုၵ်းၵဝ်ႈၵၢင်ႉၶဝ် ၵုမ်းလႆႈသႅၼ်ဝီၼၼ်ႉယဝ်ႉ။ မိူဝ်ႈၶၢဝ်းပီမႂ်ႇၶႄႇလႄႈ ပွႆးတၢင်ႇၽီ(ႁိုဝ်) ပွႆးၼပ်ႉယမ်လုၵ်ႈလိူၼ်ၶဝ်ၼၼ်ႉတႄႉ ၶဝ်ပိၵ်ႉပၢင်လွင်းသေ ယဵၼ်ၵႂႃႇၵမ်းၼိုင်ႈ။ ဝၢႆးၼၼ်ႉၵေႃႈ ၶဝ်ပိုတ်ႇမႃး ဢမ်ႇထၢတ်ႇဢမ်ႇဝၢႆး ႁၢၼ်ႉတေႃႇထိုင်ယၢမ်းလဵဝ်ယဝ်ႉ။ ဢၼ်ၶဝ် ပိုတ်ႇမႃးၼႆႉ တီႈၵၢင်ဝဵင်းသႅၼ်ဝီ ၵမ်းလဵဝ်ယဝ်ႉ”- ၵူၼ်းသႅၼ်ဝီ သိုပ်ႇလၢတ်ႈၼႄၼင်ႇၼႆ။  

ၼႂ်းပၢင်တေႃႇလွင်းၼၼ်ႉ ဢၼ်တေႃႇလဵၼ်ႈၵၼ်သမ်ႉ မိူၼ်ၼင်ႇ – ထီႇ 36 တူဝ် (36 မိူင်းလူင်)၊ လေးၵွင်ႇၵျိၼ်ႇ၊ မၢၵ်ႇၵိင်ႈလွႆ ၊ ၽၢႆႉၶိဝ်းလႄႈ တႅမ်ႇသီႇတႅမ်ႇႁႃႈ ၸဵမ်ၸိူဝ်းၼႆႉ။ ၵူၼ်းမိူင်းၸိူဝ်းမႃးလဵၼ်ႈ ၼမ်သမ်ႉ မိူၼ်ၼင်ႇ – ဢိူင်ႇၵွင်းဢၢႆႇ၊ ဢိူင်ႇမိူင်းပႃးလႄႈ ဢိူင်ႇမွၵ်ႇၸလီႇ ၼႂ်းၼၼ်ႉ မီး 22 ဝၢၼ်ႈ လႆႈႁူႉၼင်ႇၼႆ။