ၽွင်းသိုၵ်းမၢၼ်ႈတင်း သိုၵ်းၶၢင် KIA ပဵၼ်ပၢင်တိုၵ်းၵၼ်ယူႇၼၼ်ႉ မၢၵ်ႇလူင်တူၵ်းသႂ်ႇ ၵူၼ်းဝၢၼ်ႈ (ၸၢဝ်းတႆး) တီႈမိူင်းၶၢင် လူႉတၢႆၵေႃႉၼိုင်ႈ မၢတ်ႇၸဵပ်းၵေႃႉၼိုင်ႈ ဝႃႈၼႆ။
ဝၼ်းတီႈ 11/06/2024 ယၢမ်းဝၢႆးဝၼ်း 12 မူင်းၶိုင်ႈ မၢၵ်ႇလူင်တူၵ်းသႂ်ႇ ၽူႈယိင်းသွင်ၵေႃႉ တီႈမၢၼ်ႈသိမ်ႇ ဝဵင်းမႂ်ႇ ၸႄႈတွၼ်ႈမျိတ်ႉၵျီးၼႃး ၸႄႈမိူင်းၶၢင် ၸၢၵ်ႇမၢၵ်ႇတိူဝ်ႉသႂ်ႇ ၽူႈယိင်း ဢႃယု 57 ပီ ၵေႃႉၼိုင်ႈ လူႉတၢႆထင်တီႈ ၼႆယဝ်ႉ။
ၵူၼ်းပိုၼ်ႉတီႈ ဝဵင်းမႂ်ႇ လၢတ်ႈတီႈၽူႈတွႆႇႁွၵ်ႈဝႃႈ – “မၢၵ်ႇလူင် ဢၼ်မႃးတူၵ်းသႂ်ႇၼၼ်ႉ ပဵၼ်မၢၵ်ႇၸုမ်းလႂ် ယိုဝ်းမႃးတႄႉ ဢမ်ႇႁူႉၶႃႈ။ မိူဝ်ႈၽွင်းၼၼ်ႉ ၶဝ်တိုၵ်ႉၼင်ႈလိုဝ်ႈႁိူဝ်ႉ ၵိၼ်မၢၵ်ႇမူင်ႈၸွမ်းၵၼ် တီႈႁိူၼ်းသေ မၢၵ်ႇလူင်တူၵ်းသႂ်ႇ ၶဝ် တႅၵ်ႇတိူဝ်ႉသႂ်ႇ ၽူႈယိင်း ဢႃယု 57 ပီ လူႉတၢႆၵေႃႉၼိုင်ႈဢေႃႈ။ ထႅင်ႈၵေႃႉၼိုင်ႈတႄႉ မၢတ်ႇၸဵပ်းၸွမ်း ၵမ်ႈၽွင်ႈ ဢမ်ႇထိုင်တီႈၶိုၼ်ႈႁူင်းယႃ” – ဝႃႈၼႆ။
မိူၼ်ၼႆ ၼင်ႇၵဝ်ႇ မိူဝ်ႈဝၼ်းတီႈ 10 ယၢမ်းၵၢင်ၶမ်ႈမွၵ်ႈ 8 မူင်း ၼႆႉၵေႃႈ မၢၵ်ႇလူင်တူၵ်းသႂ်ႇ တီႈဝၢၼ်ႈၵၢတ်ႇၵဵဝ် ဝဵင်းမႂ်ႇ ၸၢၵ်ႇမၢၵ်ႇတိူဝ်ႉသႂ်ႇၵူၼ်းဝၢၼ်ႈ လူႉတၢႆ 1 ၵေႃႉ၊ မၢတ်ႇၸဵပ်း 6 ၵေႃႉ ၼၼ်ႉၵေႃႈ ယွၼ်ႉပၢင်တိုၵ်း သိုၵ်းမၢၼ်ႈတင်း သိုၵ်းၶၢင် KIA ဝႃႈၼႆ။
“ၵူၼ်းမိူင်း ဢၼ်ၺႃးၸၢၵ်ႇမၢၵ်ႇသေ လူႉတၢႆ ၵေႃႉၼိုင်ႈၼၼ်ႉ ၸိုဝ်ႈႁွင်ႉ တႃးငႄႇ ဢႃယုတေမီးမွၵ်ႈ 26 ပီ။ ယွၼ်ႉမၢတ်ႇၸဵပ်းႁႅင်းသေ လႆႈၵႂႃႇလူႉတၢႆ တီႈႁူင်းယႃၶႃႈဢေႃႈ။ ယဝ်ႉၵေႃႈ တိူဝ်ႉၺႃးၵူၼ်းဝၢၼ်ႈ မၢတ်ႇၸဵပ်းထႅင်ႈ 6 ၵေႃႉ ၸၢၵ်ႇမၢၵ်ႇတိူဝ်ႉပႃး ႁိူၼ်းသွင်လင်လႄႈ ရူတ်ႉၵႃးထႅင်ႈ 2 လမ်း”- ၵူၼ်းပိုၼ်ႉတီႈ ဝဵင်းမႂ်ႇ သိုပ်ႇလၢတ်ႈၼႄၼင်ႇၼႆ။
ၶၢဝ်းတၢင်း 2 ဝၼ်းထပ်းၵၼ်မႃးၼႆႉ သိုၵ်းမၢၼ်ႈ ယိုတ်းမိူင်း ၵႆႉလၢမ်းလိမ်းယိုဝ်းၵွင်ႈလူင်ၵႂႃႇၵူႈႁူးၵူႈတၢင်းသေ ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းမိူင်းလူႉတၢႆ 2 ၵေႃႉ မၢတ်ႇၸဵပ်းဢမ်ႇယွမ်း 7 ၵေႃႉယဝ်ႉ တီႈဝဵင်းမႂ်ႇၼႆႉ။
မိူဝ်ႈဝၼ်းတီႈ 8 လိူၼ်ၵျုၼ်ႊ ၼႆႉၵေႃႈ မၢၵ်ႇလူင်တူၵ်းသႂ်ႇ ၼႂ်းဝၢင်းဝတ်ႉဝေႇလုဝုၼ်ႇလႄႈ ႁိမ်းႁွမ်းဝတ်ႉ 2 လုၵ်ႈ။ ပွၵ်ႈၼၼ်ႉၵေႃႈ ႁဵတ်းႁႂ်ႈၸၢၵ်ႇမၢၵ်ႇတိူဝ်ႉၺႃးႁိူၼ်းယေးလႄႈ ရူတ်ႉၵႃး ၵူၼ်းမိူင်းလူႉၵွႆ ၸွမ်းၵမ်ႈ ၽွင်ႈ။
