ပၢင်တိုၵ်း တီႈဝဵင်းမိူင်းမိတ်ႈ မၢၵ်ႇလူင်တူၵ်းသႂ်ႇ သွင်ပေႃႈလုၵ်ႈ လႆႈတိူဝ်ႉမၢတ်ႇၸဵပ်းႁႅင်း ယၢမ်းလဵဝ် လႆႈသူင်ႇယူတ်းယႃတူဝ်ဝႆႉ တီႈႁူင်းယႃသိုၵ်း။
ဝၼ်းတီႈ 3/1/2024 ယၢမ်းၵၢင်ၶမ်ႈ မၢၵ်ႇလူင်လုၵ်ႈၼိုင်ႈ တူၵ်းသႂ်ႇတီႈပၢင်ၽဝ်ဢုတ်ႇ(ၵဝ်ႇ) ႁိမ်းဝၢၼ်ႈဝဵင်းမႂ်ႇ ဝဵင်းမိူင်း မိတ်း ၸိုင်ႈတႆးပွတ်းႁွင်ႇသေ ၸၢၵ်ႇမၢၵ်ႇတိူဝ်ႉသႂ်ႇ သွင်ပေႃႈလုၵ်ႈ ဢၼ်ၼွၼ်းပႂ်ႉၼႂ်းသူၼ်ၼၼ်ႉ ဝႃႈၼႆ။
ၵူၼ်းပိုၼ်ႉတီႈ ဝဵင်းမိူင်းမိတ်ႈ လၢတ်ႈတီႈၽူႈတွႆႇႁွၵ်ႈဝႃႈ – “သွင်ပေႃႈလုၵ်ႈၼႆႉသမ်ႉ ၼွၼ်းပႂ်ႉၼႂ်းသူၼ် တီႈပၢင်ၽဝ်ဢုတ်ႇ (ၵဝ်ႇ) ၶွင်လုင်းၵလႃး – ပႃႈတဵင်း တီႈႁိမ်းဝၢၼ်ႈဝဵင်းမႂ်ႇၼၼ်ႉ။ ၸၢၵ်ႇမၢၵ်ႇတိူဝ်ႉသႂ်ႇၶဝ် ၵေႃႉပဵၼ်ပေႃႈတႄႉ တိူဝ်ႉသႂ်ႇၾၢႆႇ တႂ်ႈသၢႆလီၼၼ်ႉ ပွင်ႇၵႂႃႇ။ ၵေႃႉပဵၼ်လုၵ်ႈယိင်းသမ်ႉ ၸၢၵ်ႇမၢၵ်ႇတိူဝ်ႉသႂ်ႇတီႈၶႃမၼ်းၼၢင်း ၶႃသွင်ပေႃႈလုၵ်ႈ လႆႈတိူဝ်ႉမၢတ်ႇ ၸဵပ်းႁႅင်း ၶႃႈဢေႃႈ” – ဝႃႈၼႆ။
ထိုင်မႃး မိူဝ်ႈဝႃး ဝၼ်းတီႈ 4/1/2024 ယၢမ်းၵၢင်ၼႂ် သွင်ပေႃႈလုၵ်ႈၼႆႉ လႆႈထုၵ်ႇသူင်ႇၵႂႃႇ ယူတ်းယႃတူဝ် တီႈႁူင်းယႃသိုၵ်း ၸႄႈဝဵင်းတပဵၵ်ႉၵျိၼ်း ဝဵင်းလိူဝ်ႇ (မၼ်းတလေး) ၼၼ်ႉ ၵမ်းလဵဝ်။
ၼႂ်းဝၼ်းတီႈ 4 ယၢမ်းၵၢင်ဝၼ်း ၼႆႉၵူၺ်း သိုၵ်းမၢၼ်ႈ ယိုဝ်းမၢၵ်ႇလူင်ထႅင်ႈမွၵ်ႈ 5 လုၵ်ႈ ထိုင်မႃး ယၢမ်းဝၢႆးဝၼ်း 4 မူင်း သိုၵ်း မၢၼ်ႈ ၸႂ်ႉၶိူင်ႈမိၼ်တိုၵ်း (Jet) 2 လမ်း မႃးပွႆႇမၢၵ်ႇၸွႆႈတိုၵ်း တီႈႁိမ်းဝၢၼ်ႈၸၢင်ႈၵၢင်ႇၼၼ်ႉထႅင်ႈ 2 လုၵ်ႈ။ ၶိူင်ႈမိၼ်တိုၵ်း ၼႆႉ လုၵ်ႉတၢင်းဝဵင်းလႃႈသဵဝ်ႈမႃး။
တႄႇဢဝ် ဝၼ်းတီႈ 2/1/2024 ၼၼ်ႉမႃး သိုၵ်းၶၢင် KIA တင်း PDF ႁူမ်ႈၵၼ် လေႃႇတိုၵ်း တပ်ႉပၢင်သဝ်း သိုၵ်းမၢၼ်ႈ တီႈ ႁိမ်းဝၢၼ်ၸၢင်ႈၵၢင်ႇ ဢိူင်ႇသၢႆးလႅင် ၸႄႈဝဵင်းမိူင်းမိတ်ႈၼႆႉ ႁၢၼ်ႉတေႃႇထိုင်ယၢမ်းလဵဝ် ပႆႇသိမ်းလႆႈ တပ်ႉပၢင်သဝ်း။ ယၢမ်း လဵဝ် ၵူၼ်းဝၢၼ်ႈၸၢင်ႈၵၢင်ႇလႄႈ ဝၢၼ်ႈမၢၵ်ႇမူင်ႈဝၢၼ် ၵမ်ႈၼမ် ဢွၼ်ၵၼ်ပၢႆႈၵႂႃႇသွၼ်ႈဝႆႉ တၢင်းဝၢၼ်ႈၺွင်ႇလႅင် ၼႆယဝ်ႉ။
“ပၢင်တိုၵ်းၶဝ်ၼႆႉ ပဵၼ်မႃးလႆႈ 3 ဝၼ်းယဝ်ႉ ပႆႇသိမ်းလႆႈတပ်ႉသိုၵ်းမၢၼ်ႈ။ သိုၵ်းမၢၼ်ႈတႄႉ ထႅမ်ႁႅင်းသိုၵ်း လုၵ်ႉတၢင်းတိူင်းဝဵင်း လိူဝ်ႇ ၶိုၼ်ႈမႃးၵႃး 3 လမ်း ၶဝ်ၽႄၵၼ် ႁဵတ်းပဵၼ်လၢႆၸုမ်းသေ ပႂ်ႉၸွမ်းၼႂ်းဝဵင်းၼႆႉ တင်းၼမ်။ သိုၵ်းၶၢင် KIA, PDF ၶဝ် လၢတ်ႈတီႈၵူၼ်းမိူင်းဝႃႈ ပေႃးဢမ်ႇသိမ်းလႆႈ မိူင်းမိတ်ႈၼႆႉ တေဢမ်ႇထွႆၼႆသေ ႁဵတ်းႁႂ်ႈၵူၼ်းမိူင်း ၵမ်ႈၽွင်ႈ ဢွၼ်ၵၼ်ငိူင်ႉ ပၢႆႈ ၵႂႃႇသွၼ်ႈဝႆႉတီႈ ဝဵင်းလိူဝ်ႇတင်းၼမ်ဢေႃႈ”- ၵူၼ်းပိုၼ်ႉတီႈ သိုပ်ႇလၢတ်ႈၼင်ႇၼႆ။
မိူဝ်ႈၼႆႉ ဝၼ်းတီႈ 5 ယၢမ်းၵၢင်ၼႂ် သိုၵ်းမၢၼ်ႈတင်း သိုၵ်း KIA, PDF တိုၵ်ႉသိုပ်ႇပဵၼ်ပၢင်တိုၵ်းၵၼ်ထႅင်ႈႁၢဝ်ႈႁႅင်း တၢင်း ဝၢၼ်ႈၸၢင်ႈၵၢင်ႇၼၼ်ႉ။ ဝၢၼ်ႈၸၢင်ႈၵၢင်ႇၼႆႉ တေယၢၼ်ဝဵင်းမိူင်းမိတ်ႈမွၵ်ႈ 7 လၵ်း။ သဵၼ်ႈတၢင်းမိူင်းမိတ်ႈ – ဝၢၼ်ႈၸၢင်ႈၵၢင်ႇၼႆႉသမ်ႉ တေၵၢႆႇၸူးတၢင်း ၸႄႈဝဵင်းမၢၼ်ႈတူင်ႈဝႆႉ။
