တပ်ႉမတေႃႇသိုၵ်းမၢၼ်ႈ ဢၼ်ႁဵတ်းတီႈၵူၼ်းမိူင်းၼင်ႇၽူႈၶဵၼ်သေ ႁိမ်ၵေႃႇသၢင်ႈဢႃႇၼႃႇပွင်မိူင်းမႃး ႁႂ်ႈပဵၼ်တၢင်းၵၢၼ်ၼၼ်ႉ ႁိုင်ၵႂႃႇသၢမ်ပီပၢႆ သီႇလိူၼ်ယဝ်ႉၵေႃႈ ပႆႇႁၼ်သီငဝ်းသၢႆငၢႆ တႃႇတေၵုမ်းၵမ်လႆႈ မိူင်းလႂ်တိူင်းလႂ်ၵွၼ်ႇ။

သုတ်းတီႈ ၼေႇပျီႇတေႃႇ ယင်းၺႃး PDF ပွႆႇ Drone လွၵ်ႇငိုတ်ႈ။ ငဝ်ႈငုၼ်းတိူင်းသိုၵ်း သိတ့်တူၺ်ႇ၊ လႃႈသဵဝ်ႈ၊ မိူင်းၸေႈၼႃး (မျိတ်ႉၵျီးၼႃး) ၸိူဝ်းၼႆႈ လႆႈယုၵ်ႉၶဵင်ႈလိူင်ႈႁူမ်ႇလူမ်ႈယူႇ ႁၢဝ်ႈႁၢဝ်ႈႁႅင်းႁႅင်း။ တပ်ႉသိုၵ်းရၶႅင်ႇ (ဢႃရၵ့်ၶ) AA လႄႈ တပ်ႉသိုၵ်းၶၢင် KIA ၸိူဝ်းၼႆႉ ၶဝ်ႈတိုၵ်းလိုပ်ႈႁေႃႈပႅတ်ႈ တပ်ႉသိုၵ်းမၢၼ်ႈ ၸိူဝ်းဢဝ်ၵူၼ်းမိူင်းႁဵတ်းတမ်ႇတိူင်း ပဵၼ်ႁူဝ်ႉၶဝ်ၼၼ်ႉ တပ်ႉယဝ်ႉတပ်ႉ၊ ဝဵင်းယဝ်ႉဝဵင်းလႄႈ တေႃႉတႄႉၵိုတ်းဝႆႉ ငဝ်ႈဝဵင်းလူင် ၶွင်ၸႄႈမိူင်းၵူၺ်းယဝ်ႉ။

ႁူမ်ႈဝႃႈ ၶဝ်ႈတိုၵ်းဢဝ်လႆႈၶိုၼ်း မျႃႉဝတီႇ၊ လွႆၶေႃ၊ မိူင်းမိတ်ႈ၊ သီႇသႅင်ႇ ၸိူဝ်းၼႆႉယဝ်ႉၵေႃႈ ပႆႇပၼ်ႇႁွၼ်ႈလႆႈ ၵၢၼ်ၽွင်းငမ်းၸုမ်းသိုၵ်းၶဝ်။ ၸႄႈဝဵင်းၼႂ်းမိူင်းတႆးပွတ်းႁွင်ႇ ဢၼ်ၸုမ်းသိုၵ်းလွႆ၊ သိုၵ်းၵဝ်ႈၵၢင်ႉၶဝ် ဢဝ် ႁႅင်းၸွႆႈလၢႆပႃႈလၢႆ ၾၢႆႇသေ ၵုမ်းၵမ်လႆႈဝႆႉၸိူဝ်းၼၼ်ႉၼႆၵေႃႈ ႁူႉယူႇ ပဵၼ်ဢၼ်လမ်ႇလွင်ႈ တႃႇႁူးထူၺ်ႈၸႂ် ၶွင်ၵၢၼ်ၵႃႉၶၢႆ ၸွမ်းသၢႆတၢင်းလိၼ် ဢၼ်ယႂ်ႇလူင်သုတ်းထၢႆႉၼႆၵေႃႈယႃႇ တႃႇဢဝ်လႆႈၶိုၼ်း ပႆႇႁၼ်တၢင်း သေဢိတ်း။

ၵၢၼ်ၵႃႉၵူး ၵႆႈလႅၵ်ႈတေႃႇၵူႈမိူင်းမိူင်းၼႆႉ လႆႈၸႂ်ယႂ်ႇသၢႆတၢင်းပၢင်ႇလၢႆႇဢၼ်လဵဝ် ၵူၺ်းသေ၊ ၵုၼ်ႇသိၼ် ဢၼ်ႁဵတ်း ဢွၵ်ႇလႆႈ ဢမ်ႇမီးသင်တႄႉတႄႉ၊ မၢၵ်ႇတဝ်ႈၶဝ်ႈၼမ်ႉ ဢၼ်ပဵၼ်ၵုၼ်ႇသိၼ် ပိူင်လူင်သူင်ႇၸူးမိူင်းၶႄႇၼၼ်ႉ ယွၼ်ႉသဵၼ်ႈတၢင်း ဢမ်ႇပွင်ႇၵေႃႈႁင်းမၼ်း၊ ၸုမ်းၵဵပ်းၶွၼ်ႇႁႅင်ႉလိူင်ႇၼႃႇ ဢႃးလႃးၵေႃႈပႃးသေ ဢမ်ႇၸၢင်ႈတေႃႉတၢင်ႇၶၢႆ၊

ပၢႆသေလိူဝ် ၸုမ်းသိုၵ်းၶဝ်ဢမ်ႇမေႃၸတ်း ၽႅၼ်ၵၢၼ်မၢၵ်ႈမီး ဢဝ်ၸဵမ်ၸွမ်သိုၵ်းၸွမ်ႁၢၼ် တေႃႇထိုင် ၸိူဝ်း ၽူႈႁၢပ်ႇၵၢၼ်ၵူႈထၢၼ်ႈ ႁၵ်းယႃႉသိၼ်ၵၢၼ် ၵိၼ်သူးၵိၼ်လၢပ်ႈလူၼ့်လိူဝ် တိူဝ်းမႃးတိၵ်းတိၵ်း၊ ၵူႈမိူင်းမိူင်းၵေႃႈ ဢိုတ်းတၼ်တိုတ်းၶၢတ်ႇပႅတ်ႈ လွင်ႈသိုဝ်ႇသၢၼ်ၵႃႉၵူးတေႃႇၶဝ်လႄႈ ၸုမ်းမိၼ်းဢွင်ႇလႅင်ႇၼႆႉ ၸွမ်း လူၺ်ႈမေႃဢိတ်ႇဢွၵ်ႇ ငိုၼ်းၸေႈပိူင်လဵဝ်သေ ဢမ်ႇႁူႉဝႃႈတေလႆႈၵႄႈၶႆ ၸိူင့်ႁိုဝ်လႄႈ မိူၼ်တင်းတင်ႈၸႂ် ႁဵတ်းႁႂ်ႈၼမ်ႉငိုၼ်းၼႂ်းမိူင်း ဝူင်တူၵ်းယူႇဢမ်ႇထၢတ်ႇ၊ ၶၼ်ၵုၼ်ႇသိၼ် တႄႇဢဝ် ၶဝ်ႈသၢၼ်၊ ၵိူဝ်၊ ၽွင်ဝၢၼ် ၽၵ်းမီႇ၊ ၼမ်ႉမၼ်း၊ ၽၵ်းယိူဝ်ႈၶိူဝ်းၶဵဝ်၊ ယႃႈယႃ၊ ဢၼ်ဢမ်ႇမီးဢမ်ႇပဵၼ်ၼႆႉ ပုင်ႈၶိုၼ်ႈယူႇ ၵူႈဝၼ်းဝၼ်း။

ၼႂ်းၵႄႈၼၼ်ႉ ၶွၼ်ႇၵူၼ်းၶွၼ်ႇၵႃး ၶွၼ်ႇၼွၵ်ႈၶွၼ်ႇၼႂ်း ၶွၼ်ႇၼၼ်ႉၶွၼ်ႇၼႆႉ ဢၼ်ဢမ်ႇသႂ်ႇ ဢမ်ႇၸူးၼၼ်ႉ သမ်ႉ တဵၵ်းမိပ်ႇႁိပ်ႇႁွမ်ႈထႅင်ႈၵူႈႁူးၵူႈတၢင်းလႄႈ ဝၢၼ်ႈမိူင်းၼႆႉ ဢမ်ႇတၢပ်ႈယႃႉထႅင်ႈၵေႃႈ ပေႃးလႅဝ်လႅၵ်ႇ တႅၵ်ႇငၢၵ်ႈယူၼ်ႈယဝ်းယူႇယဝ်ႉ။ ၼင်ႇၼႆ တိုၵ်ႉတဵၵ်းၸႂ်ႉၵူၼ်းမိူင်း ၶဝ်ႈႁဵတ်းသိုၵ်းၶဝ်သေ ဢၢင်ႈတိုၵ်းမူၺ်ႉ ၽူႈလုၵ်ႉၽိုၼ်ႉတူဝ်ႈမိူင်းယူႇၼႆႉ မိူၼ်ၵူၼ်းႁဵတ်းၵႅင်ႈၼွၼ်းၾၼ် လပ်းတႃပႅတ်ႉတူဝ်ၵဝ်ႇၶိုၼ်းၼၼ်ႉ ၵူၺ်းယဝ်ႉ။

ပေႃးတူၺ်းၾၢႆႇၶတ်းသၢၼ်လုၵ်ႉၽိုၼ်ႉၼႆ ဢၼ်ဝႃႈၶႂ်ႈႁႂ်ႈၶွင်ႇသီႇသိုၵ်းမၢၼ်ႈ တူၵ်းသုမ်းၼၼ်ႉတႄႉၵေႃႈ ၽႂ်ၶႂ်ႈမိူၼ် ၵၼ်ယူႇ၊ ဢၼ်လူင်းမိုဝ်းတိုၵ်းတေႃးၵေႃႈ ၸိူဝ်းႁဵတ်းႁဵတ်းတႄႉယူႇ။ ၵူၺ်းၵႃႈ ပဵၼ်ဝႆႉ လၢႆးၽႂ်လၢႆးမၼ်း၊ မူႇၽႂ်ၸုမ်းမၼ်းၵူၺ်း။

မိူၼ်ၸိူင်ႉ FPNCC ၶဝ် ဢမ်ႇၼတ်ႉဢမ်ႇၼၢႆၵၼ် ႁႂ်ႈႁူမ်ႈႁူႉတင်းၸဵတ်းၸုမ်းသေ လၵ်ႉလွမ်ၽႅၼ်တိုၵ်း တၢင်းမိူင်းတႆးပွတ်းႁွင်ႇ ၼႂ်းႁၢင်လိူၼ်ထူၼ်ႈသိပ်း ပီပူၼ်ႉမႃးၼၼ်ႉလႂ်၊ လုၵ်ႈၸုမ်းဢူၺ်းလီသၢမ်ပီႈၼွင်ႉ 3 Brother hood ၼင်ႇၵၼ် ႁဵတ်းၵႃၼႄးၵဝ်ႉ ၵဝ်ႉၼႄးၵႃ ၶဵင်ႈၶႅင်တေႃႇၵၼ်ယူႇလႂ်၊ NUG ၶဝ် ႁူမ်ႈမိုဝ်းလႆႈ တင်း KIA ယူႇၵေႃႈ သမ်ႉဢမ်ႇၶဝ်ႈၸူးလႆႈ FPNCC တင်းလုမ်ႈၼၼ်ႉလႂ်၊ PDF ၼင်ႇၵၼ် ဢမ်ႇထုၵ်ႇမေႃ ပေႃးၵႂၢမ်းၵၼ်လႆႈ တေႃႇထိုင်တီႉၺွပ်းလၼ်ႇသူၼ်ႈၵၼ်လႂ်၊ ၸုမ်းၸၢဝ်းၶိူဝ်းလုၵ်ႉၽိုၼ်ႉ ၾၢႆႇပွတ်းႁွင်ႇလႄႈ ၾၢႆႇပွတ်းၸၢၼ်း ဢမ်ႇၶဝ်ႈဢွၵ်ႇႁႃႁူမ်ႈၵၼ်လႆႈ ၼၼ်ႉလႂ် ၸိူဝ်းၼႆႉ ပဵၼ်တႃႇၵူႈမိူင်းမိူင်းမႆႈၸႂ်ဝႃႈ တိူၵ်ႈတီႈ ၸုမ်းသိုၵ်းမဢလ ပူတ်းတူၵ်းၵႂႃႇယဝ်ႉၵေႃႈ ယင်းတေ ဢမ်ႇမီး ၸုမ်းၸၢဝ်းဢၼ်တေတႅၼ်းတၢင် ႁႂ်ႈပဵၼ်လူင် ပွင်ၸိုင်ႈသုၼ်ၵၢင်လႆႈယူဝ်ႉ ၼႆယူႇယဝ်ႉ။

ၸိူဝ်ႉၽႂ်ၶိူဝ်းမၼ်း၊ ၸႄႈၽႂ်မိူင်းမၼ်း၊ ထုင်ႉၽႂ်ဢိူင်ႇမၼ်း ဢဝ်ၵွင်ႈၵၢင်ႇလၢၵ်ႈၼၢၵ်ႈ လူင်းတိုၼ်းလၢင်းသေ လုၵ်ႉႁဵတ်းၶုၼ်ၵွမ်ႈဢွၼ်ႇ သိုဝ်ႈၽႂ်တၼ်းမၼ်းမႃးတႄႉၸိုင် ၵူၼ်းမိူင်းၸိူဝ်းဢမ်ႇၸၢင်ႈပိုင်ႈၽႂ် ပဵၼ်ငဝ်ႈ ပဵၼ်ၵၼ်းတႄႉ ၼၼ်ႉ တၵ်းၽူင်ႉယၢႆႈပၢႆႈၶဝ်ႈၸူး မိူင်းႁိမ်းႁွမ်းဢမ်ႇႁၢင်ႉယဝ်ႉ။ မုင်ႈႁၼ်မႆႈၸႂ်ထႃႈ ၼိူဝ်လွင်ႈၼႆႉသေ ႁူဝ်ၼႃႈၸိုင်ႈမိူင်းႁိမ်းႁွမ်းၶဝ်ၼႆႉ တေႃႈဝႃႈႁၼ်လီၼိူဝ်ၵၢၼ်လုၵ်ႉၽိုၼ်ႉၵေႃႈယႃႇ လႆႈတူၺ်းထိုင် ၽွၼ်းပၢင်ႈမိူင်းမၼ်းသေ ၶႄးတေလိူၵ်ႈၵမ်ႉယၼ်ပၼ် ၸုမ်းသိုၵ်းမဢလယူႇ။

ယႃႇဝႃႈ ၸုမ်းၸၢဝ်းလုၵ်ႉၽိုၼ်ႉ လၢႆလၢႆၸိူဝ်ႉၶိူဝ်း တေၶဝ်ႈႁႃႁူမ်ႈမိုဝ်းၶွၼ်ႈၵၼ်လႆႈ တႂ်ႈၸွင်ႈပဝ်း လုၵ်ႉၽိုၼ်ႉလူင်ႇလဵဝ်လႃႈ တေႃႈၼင်ႇ ၸုမ်းတႆး SSA ၼင်ႇၵၼ် ယင်းယႅၵ်ႈပဵၼ်သၢမ်ငႃး၊ ၼႄးလိၼ်ႉၸႃး သဵင်ၸၢင်တီႈၵၼ်ယူႇ ထိုင်တီႈပေႃးလိုမ်းတိုၵ်း ၽူႈၶဵၼ်တႄႉပႅတ်ႈၵွၼ်ႇ။

ပၼ်ႁႃမိူၼ်ၼႆ ႁူမ်ႈဝႃႈၼႂ်းယၢင်း၊ ၼႂ်းၶျၢင်းၶဝ်ၵေႃႈ မီးယူႇသေတႃႉ ပိူၼ်ႈယင်းတၼ်းတိုၵ်း ၽူႈၶဵၼ်ၽုင်ႇယူႇ၊ တႆးတႄႉ ၶႂ်ႈၼႃႇလိူဝ် ပဢူဝ်း ဢၼ်ၾၢႆႇၼိုင်ႈ ႁဵတ်းလုၵ်ႈၸၢင်ႈသိုၵ်းမၢၼ်ႈ ထႅင်ႈၾၢႆႇၼိုင်ႈ လုၵ်ႉၽိုၼ်ႉယူႇ ၼၼ်ႉယဝ်ႉ။  

ႁူဝ်ၼႃႈ ၾၢႆႇသိုၵ်းၸၢဝ်းၶိူဝ်း ၸိူဝ်းဢမ်ႇပႃးၸွမ်းၼႂ်းၵၢၼ်လုၵ်ႉၽိုၼ်ႉတေႃႇ ၸဝ်ႈဢႃႇၼႃႇသိုၵ်းၸုမ်းမဢလၼၼ်ႉ ၵႆႉၼပ်ႉသွၼ်ႇဝႃႈ ၵႃႈၸူဝ်ႈမိူင်းၶႄႇ တိုၵ်ႉၸုၵ်းလင်ၾင်ႁႅင်းပၼ်တႄႉ မဢလ တေဢမ်ႇၵူၼ်ႇ ပင်းလႆႈ၊ ၸဵဝ်းလႄႈ ၼၢၼ်း မဢလ တၵ်းပေႉၶိုၼ်းယူႇ။

ပေႃးပဵၼ်ၼၼ်မႃး တပ်ႉတူဝ်ၵဝ်ႇၵေႃႈ ဢမ်ႇတၢပ်ႈသုမ်းသင်ၸွမ်း၊ ၾၢင်ႁၢင်ႈၽႅၼ်ႇတီႈမိူင်းတႆးၵေႃႈ တေမိူၼ်ၵဝ်ႇ ၶိုၼ်းသေ ၵွႆႈၽႅၼ်တိုၵ်းဢဝ်မႂ်ႇမႂ်ႇ၊ ပိူင်ယႂ်ႇ ယႃႇႁႂ်ႈမိူင်းတႆးတႅၵ်ႇၵူၺ်း လႅပ်ႈဝႃႈၼၼ်ၵေႃႈ မီးယဝ်ႉ။

ၽွင်းမိူဝ်ႈ ၵူၼ်းမိူင်းၵူႈၸၢဝ်းၶိူဝ်း ၶွမ်ႈၶတ်းတိုၵ်းတေႃးယူႇ ဢိင်ဢၢင်ႈဝႃႈ မႃႇႁႅင်းပႆႇတဵမ်တီႈၼႆသေ ယင်း ဢမ်ႇႁူမ်ႈတိုၵ်းၸွမ်းပိူၼ်ႈလႆႈ၊ ဝၢႆးလင် ၸုမ်းသိုၵ်းမဢလ ၵုမ်းၵမ်မၼ်ႈၵႅၼ်ႇလႆႈၼၼ်ႉ ယိုင်ႈၶႅၼ်းဢမ်ႇ ၸၢင်ႈလုၵ်ႉတိုၵ်းၶိုၼ်းယူဝ်ႉၼႆ တႃႉလီငမ်းငဝ်းဝႆႉယဝ်ႉ။

ၶႆႈၸႂ်ပိၼ်ႈၽူၼ်ၼၼ်ႈသေ ပေႃးၶိုၼ်းထၢမ်ဝႃႈ သင်ၸိူဝ်ႉမဢလ ၵၢၼ်ႉသုမ်းသေ ၾၢႆႇလုၵ်ႉၽိုၼ်ႉဢွင်ႇပေႉ ၵႂႃႇၼႆလူး၊ လူၺ်ႈဢမ်ႇ ၶဝ်ႈႁူမ်ႈပႃးၸွမ်း ၵၢၼ်တိုၵ်းတေႃးသင်လႄႈ ၸွင်ႇၶဝ်တေဝႆႉပဵၼ်ပီႈဢၢႆႈတၢႆႈႁူဝ် မိူၼ် ၵႃႈၵွၼ်ႇပူၼ်ႉမႃးသေ မွပ်ႈယိုၼ်ႈၸႅၵ်ႇမႅင်ႇပၼ် ၼႃႈတီႈသုၼ်ႇလႆႈယူႇၼေႇ၊ ၵွပ်ႈဢမ်ႇမိူၼ်ၼင်ႇၸႂ်လႄႈ ယူႇတီႈၸုမ်းသိုၵ်းတႆး ၸွင်ႇသမ်ႉတေၸၢင်ႈတိုၵ်းဢဝ်လႆႈၶိုၼ်း ဢၼ်တူၵ်းမီးၼႂ်းမိုဝ်း ၸုမ်းၸိူဝ်း လုၵ်ႉၽိုၼ်ႉ တေႃႇသိုၵ်းမၢၼ်ႈၼၼ်ႉယူႇႁိုဝ် ၼႆ ၵူၼ်းမိူင်းတႄႉ ႁူႉတေၵႂင်ၵႃးငမ်းငဝ်းဝႆႉယဝ်ႉ။

ၸႅင်ႈလႅင်းလီၼႃႇတႄႉ ၸုမ်းသိုၵ်းမဢလ ပေႉၵႂႃႇၵေႃႈ လူၺ်ႈဢမ်ႇတိုၵ်းတေႃးမၼ်းသေ ဢမ်ႇၸႂ်ႈဝႃႈမၼ်းတေမႅင်ႇပၼ်မိူင်းတႆး၊ ထိုင်ၵမ်းမၼ်းသုမ်းၵၢၼ်ႉၵေႃႈယႃႇ တႃႇမၼ်းတေဝၢင်းၶိူင်ႈယွမ်းတူဝ်ၸူးၼႆႉ ၸွင်ႇတေၸႂ်ႈၸုမ်းၸၢဝ်းၶိူဝ်း ၸိူဝ်းဢၼ်မၼ်း ဢမ်ႇတွၼ်ႉဝႆႉႁူဝ်မႃႇပဵင်းၵၼ်မႃး ၼၼ်ႉႁိုဝ်၊ ဝႃႈလႃးတေ ပဵၼ်ၽူႈၵိူဝ်းၵုမ်ၸိုင်ႈမိူင်းၵေႃႉၵဝ်ႇ ဢၼ်ဢူႈမၼ်းပဵၼ်ၵေႃႉ ၵေႃႇ တင်ႈတပ်ႉ မတေႃႇသိုၵ်းမၢၼ်ႈမႃး ၼၼ်ႉ ၵူၺ်းယူဝ်ႉ။

ၸင်ႇၼၼ် ၼင်ႇႁိုဝ် တေဢမ်ႇပဵၼ်မီး လွၵ်းပၢင်ႇပဝ်ႇဢႃႇၼႃႇ ဢၼ်ဢမ်ႇမီး ၸုမ်းပုတ်ႈတႅၼ်းၵုမ်းၵမ်လႆႈ ဢႃႇၼႃႇသုၼ်ၵၢင် ၼင်ႇၵူႈမိူင်းမိူင်း မႆႈၸႂ်ၼၼ်ႉ ၵူႈၸုမ်းၸၢဝ်းလုၵ်ႉၽိုၼ်ႉ တၵ်းလႆႈႁူမ်ႈမိုဝ်းၶွၼ်ႈႁႅင်းၵၼ် ပဵၼ်ၶေႃႈလဵဝ်သဵင်လဵဝ်ယဝ်ႉ။

မိူၼ်ၼႆ ၼင်ႇၵဝ်ႇ ပိူဝ်ႈတႃႇၶိူဝ်းတႆးမိူင်းတႆး တေဢမ်ႇတၢႆဢမ်ႇႁၢႆၵေႃႈ ၸုမ်းလုၵ်ႉၽိုၼ်ႉ ၼႂ်းၶိူဝ်းတႆးၼႂ်း မိူင်းတႆး တၵ်းလႆႈၽွမ်ႉသဵင်ပဵင်းပၢၵ်ႇၵၼ်ဢွၼ်တၢင်းယဝ်ႉ ၸင်ႇၵွႆႈၶိုင်ၶႆႈၸႂ်လႆႈတႃႇၵူၼ်းမိူင်းၸၢဝ်းၶိူဝ်း ႁူမ်ႈယူႇသဝ်း ၸွမ်း ၵၼ်ၵတ်းယဵၼ်ၼၼ်ႉယဝ်ႉၼႆ ႁႂ်ႈလႆႈယွၼ်းပၢႆးၼႄ လွင်ႈယိၼ်းမႆႈ ၶႆႈၸႂ်သုၼ်ႇတူဝ်သေၵမ်းၶႃႈ။