ၼႃႈလိၼ်သိုၵ်းမၢႆ 1 RCSS ၸတ်းႁဵတ်း ပၢင်ယွင်ႈၵုင်ႇယေႃးမုၼ် ၼႂ်းဝၼ်းၵိူတ်ႇ ၸဝ်ႈၼၢင်းႁေႃၶမ်းထႆး တူၼ်ထီႉ 10 ၽွင်းဢႃယုထူၼ်ႈတဵမ် 46 ပီ ဝႃႈၼႆ။
ဝၼ်းတီႈ 03/06/2024 ယၢမ်းႁူဝ်ၶမ်ႈ 6 မူင်းထိုင် 8 မူင်းၵၢင်ၶမ်ႈ ယူႇတီႈ ၸဝ်ႈသိုၵ်းလူင် ၶမ်းၵွၼ်းၸိုၼ်ႈ ဢွၼ်ၼမ်း ၵေႃႉသိုၵ်း/ ၵေႃႉႁၢၼ်လႄႈ ပေႃႈမႄႈၵူၼ်းမိူင်း ၸတ်းႁဵတ်းပၢင်ယုၵ်ႉယွင်ႈဢဝ်ၵုင်ႇမုၼ် ၸဝ်ႈၼၢင်းႁေႃၶမ်းထႆး တူၼ်ထီႉ 10 ဢႃယုထူၼ်ႈတဵမ် 46 ပီ တီႈႁူင်းႁေႃးလူင် ပၢင်ႇပဵင်းၾႃႉ လွႆၵေႃႇဝၼ်း ၼႃႈလိၼ်သိုၵ်းမၢႆ 1 RCSS ၼႆယဝ်ႉ။
ၼႂ်းပၢင်ၵႅဝ်ႈၼၼ်ႉ ယၢမ်းႁူဝ်ၶမ်ႈ 6 မူင်း ၵူၼ်းသိုၵ်းဢိၵ်ႇၵူၼ်းမိူင်း ႁၢင်ႈႁႅၼ်းၶဝ်ႈထႅဝ် ဢဝ်တီႈယူႇ။ ယၢမ်း 7 မူင်း ၽူႈၵႅဝ်ႈပၢင် ပိုၼ်ၽၢဝ်ႇ ၶပ်ႉမၢႆပၢင်ၵၼ်ႇတေႃးၵႂႃႇ။ ၽူႈယႂ်ႇၵူၼ်းလူင်လႄႈ ၵူႈႁွင်ႈၵၢၼ် ၶိုၼ်ႈႁွတ်ႈသၢၵ်ႈဢုပ်းမွၵ်ႇ။ ၽူႈယႂ်ႇၵူၼ်းလူင် ၸပ်းတဵၼ်းသေ သိုပ်ႇၸပ်းယိုၼ်ႈထိုင် ၽူႈယႂ်ႇၵူၼ်းလူင် ဢိၵ်ႇပေႃႈမႄႈၵူၼ်းမိူင်း ၽူႈၶိုၼ်ႈႁွတ်ႈပၢင်ၵၼ်ႇတေႃး ႁႂ်ႈၸွတ်ႇတူဝ်ႈထိုင်ၼႂ်းမိုဝ်းၽႂ်မၼ်းၵႂႃႇ ၵူႈၵေႃႉ။
ႁူမ်ႈၵၼ် ၵၼ်ႇတေႃးယွၼ်းသူးတိူင်ႇၵၢဝ်ႇ ပၼ်ပွၼ်းၾၢႆႇၼႃႈ ၶႅပ်းႁၢင်ႈ ၸဝ်ႈၼၢင်းႁေႃၶမ်း ပိုတ်ႇ ၽဵင်း ၵႂၢမ်း ယုၵ်ႉယွင်ႈ ၸဝ်ႈၼၢင်းႁေႃၶမ်း 2 ႁူဝ်။ ႁူမ်ႈၵၼ် တႆႈတဵၼ်းၾၢႆႇ ၼႃႈႁၢၼ်ႉၶဵင်ႇ ပၢင်ၵၼ်ႇတေႃး ၸဝ်ႈၼၢင်းႁေႃၶမ်းလႄႈ ယွၼ်းသူးတိူင်ႇၵၢဝ်ႇသိုဝ်ႈၽႂ်သိုဝ်ႈမၼ်းၵႂႃႇ ၼႆယဝ်ႉ။
ဢိင်ၼိူဝ် ဝၼ်းၵိူတ်ႇၸဝ်ႈၼၢင်းႁေႃၶမ်း ဢႃယုထူၼ်ႈတဵမ် 46 ပီၼႆႉသေ ယၢမ်းၵၢင်ၼႂ် 5 မူင်းၶိုင်ႈၼၼ်ႉ လႆႈတၢင်ႇသွမ်း ဢႃႈသၢၵ်ႈၸေႉ ၸဝ်ႈၼၢင်းႁေႃၶမ်း။ ယၢမ်း 6 မူင်းၶိုင်ႈ ၵၢပ်ႈသွမ်းသင်ၶၸဝ်ႈ။ ယၢမ်း 10 မူင်း လူႇတၢၼ်းယၢတ်ႇၼမ်ႉလႄႈ ယၢမ်းၵၢင်ဝၼ်း 11 မူင်း ၵၢပ်ႈသွမ်းဝၼ်း သင်ၶၸဝ်ႈ လဵင်ႉလူၵူၼ်း ထဝ်ႈၵူၼ်းၵႄႇ ၼႆယဝ်ႉ။
တီႈလွႆၵေႃႇဝၼ်း ၼႃႈလိၼ်သိုၵ်းမၢႆ 1 RCSS ၼႆႉ ပေႃးထိုင်မႃး ဝၼ်းပေႃႈ/မႄႈ ၽႅၼ်ႇလိၼ်ၸိုင်ႈထႆးၸိုင် တေၸတ်းႁဵတ်းပၢင်ယုၵ်ႉယွင်ႈ ဢဝ်ၵုင်ႇမုၼ် မႃးၵူႈပီ တင်ႈတႄႇပၢၼ်ၶုၼ်ႁေႃၶမ်းထႆး တူၼ်ထီႉ 9 ၼၼ်ႉမႃးယဝ်ႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ