ဝၼ်းတီႈ 23/05/2024 ယၢမ်းၵၢင်ၶမ်ႈ ၵူၼ်းၸၢႆး 2 ၵေႃႉ ႁဵတ်းၵႅင်ႈထၢမ်သဵၼ်ႈတၢင်းသေ ဢဝ်မိတ်ႈတႅင်း ႁိမ်ၸူၼ် ၵႂႃႇရူတ်ႉၶိူင်ႈၼုမ်ႇၸၢႆး ၵေႃႉၼိုင်ႈ တီႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း ဝႃႈၼႆ။
ၼုမ်ႇၸၢႆးၵေႃႉၼၼ်ႉ တႅမ်ႈတၢင်ႇဝႆႉ တီႈ Facebook မၼ်းဝႃႈ – “မီးၵူၼ်း 2 ၵေႃႉ ႁဵတ်းၵႅင်ႈထၢမ်သဵၼ်ႈ တၢင်းသေ ဢဝ်မိတ်ႈတႅင်းႁိမ်ဢဝ်ရူတ်ႉၶိူင်ႈၵႂႃႇ။ မိုဝ်းၺႃးမိတ်ႈတႅင်း မၢတ်ႇၸဵပ်း၊ သင်ၽႂ်ႁၼ်ရူတ်ႉၶိူင်ႈ ၶႅၼ်းတေႃႈပွင်ႇၶၢဝ်ႇပၼ် ယဝ်ႉၵေႃႈ တေတွၼ်ႈသူးၼမ်ႉၸႂ်ပၼ်”- ဝႃႈၼႆ။
ဢိင်ၼိူဝ်လွင်ႈၼႆႉ ၵူၼ်းပိုၼ်ႉတီႈၵဵင်းတုင်ၵေႃႉၼိုင်ႈ လၢတ်ႈဝႃႈ – “တီႈဝဵင်းၵဵင်းတုင်ၼႆႉ ၽူႈလၵ်ႉၸၵ်ႉ ၶုတ်ႈၼမ်လိူင်ႇမႃးႁႅင်း။ ဢမ်ႇဝႃႈၵၢင်ၶမ်ႈ ၵၢင်ဝၼ်းတဵင်ႈၵေႃႈ မီးၵူၼ်းႁိမ်ၸူၼ်ၵၼ်။ ၵႆႉပဵၼ် တီႈသဵၼ်ႈ တၢင်းဝႄႈဝဵင်းၵဵင်းတုင်။ ယွၼ်ႉၼၼ် သင်တေၵႂႃႇတီႈမီးၵူၼ်းဢႄႇ ဢမ်ႇထုၵ်ႇလီၵႂႃႇၵေႃႉလဵဝ်”- ဝႃႈၼႆ။
ဝၢႆးသိုၵ်းမၢၼ်ႈ ယိုတ်းမိူင်းမႃးၼႆႉ လိူဝ်ဝဵင်းၵဵင်းတုင်ယဝ်ႉ တီႈဝဵင်းတႃႈၶီႈလဵၵ်း လႅၼ်လိၼ် တႆး – ထႆး ၼၼ်ႉၵေႃႈ ၽူႈလၵ်ႉၸၵ်ႉၶုတ်ႈ၊ ၵူၼ်းယိပ်းၵွင်ႈၶဝ်ႈၸူၼ်၊ ၶႃႈၵၼ်တၢႆ မီးမႃးၼမ်။
ၼႂ်းဝၼ်းတီႈ 22 ပူၼ်ႉမႃးၼၼ်ႉ တီႈဝဵင်းတႃႈၶီႈလဵၵ်းၼႆႉ မီးၵူၼ်းဢမ်ႇႁူႉၾၢႆႇ 2 ၵေႃႉ ၶဝ်ႈယိုဝ်း ၸၢႆးသၢမ် သိူဝ် ဢႃယု 40 ပၢႆ လူႉတၢႆထင်တီႈ၊ ၾၢႆႇလင်လုမ်းၽူႈၵွၼ်းပွၵ်ႉႁွင်ႈလိုၵ်ႉ ဝႃႈၼႆ။
ဢၢင်ႈဢိင် – Tachileik News Agency
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ