ၵူၼ်းၼုမ်ႇ ဝဵင်းတူၼ်ႈတီး 7 ၵေႃႉ ၵႂႃႇဢႅဝ်ႇလႄႇ ထုင်ႉၸၢမ်ၵႃး ၼွင်ႁၢႆးယႃႈသေ ၽွင်းၶိုၼ်းပွၵ်ႈမႃးၼၼ်ႉ ၺႃးၸုမ်းပလိၵ်ႈမၢၼ်ႈ ပႂ်ႉလၢၼ်ႇတၢင်းၶဝ်ႈဝဵင်းယွင်ႁူၺ်ႈ ၵူတ်ႇထတ်းတီႉၺွပ်းၵႂႃႇ တေႃႇထိုင်ယၢမ်းလဵဝ် ဢမ်ႇပၼ်ႁူပ်ႉပေႃႈမႄႈပီႈၼွင်ႉ။
ပူၼ်ႉမႃး မိူဝ်ႈဝၼ်းတီႈ 23/04/2024 ၼၼ်ႉ ၵူၼ်းၼုမ်ႇ 7 ၵေႃႉ ပဵၼ်ၸၢႆး 6 ၵေႃႉလႄႈ ယိင်း 1 ၵေႃႉ ယူႇၼႂ်းပွၵ်ႉၽြႃးၽိဝ်ႇ (ၽြႃးၶၢဝ်) ဝဵင်းတူၼ်ႈတီး ၸိုင်ႈတႆးပွတ်းၸၢၼ်း ၺႃးပလိၵ်ႈမၢၼ်ႈ တီႉၺွပ်းၵုမ်းတူဝ်ဝႆႉ တီႈတပ်ႉၸုမ်းၾၢႆႇႁူမ်ႇလူမ်ႈ (သယၽ) ၾၢႆႇၵၢၼ်သိုၵ်း ဝဵင်းတူၼ်ႈတီး ၼႆယဝ်ႉ။
ဝၢႆးၺႃးတီႉၺွပ်းယဝ်ႉ ပလိၵ်ႈသိုပ်ႇၾူၼ်း ပွင်ႇၶၢဝ်ႇၵူၼ်းတီႈႁိူၼ်းသေ ၵူၼ်းတီႈႁိူၼ်းၵႂႃႇယွၼ်းႁူပ်ႉထူပ်း ယူႇသေတႃႉ ပလိၵ်ႈသိုၵ်းမၢၼ်ႈ ဢမ်ႇပၼ်ႁူပ်ႉၼႆ ၵူၼ်းၸမ်ၸႂ်တင်းၵူၼ်းၼုမ်ႇၵေႃႉၼိုင်ႈ လၢတ်ႈၼင်ႇၼႆ။
ယဝ်ႉၵေႃႈ ရူတ်ႉၶိူင်ႈ၊ ၾူၼ်းလႄႈ ငိုၼ်း ၶွင်ၵူၼ်းၼုမ်ႇၸိူဝ်းၼၼ်ႉၵေႃႈ ပလိၵ်ႈသိုၵ်းမၢၼ်ႈ ယိုတ်းသိမ်း ဢဝ်ဝႆႉမူတ်း ဝႃႈၼႆ။
မိူဝ်ႈႁူဝ်လိူၼ်ၾႅပ်ႊပိဝ်ႊရီႊ ပူၼ်ႉမႃးၼၼ်ႉၵေႃႈ ၵူၼ်းၼုမ်ႇတူၼ်ႈတီး 11 ၵေႃႉ ၵႂႃႇဢႅဝ်ႇလႄႇ ၼႂ်းၸႄႈဝဵင်းယႂႃႇငၢၼ်ႇ ၼၼ်ႉၵေႃႈ ၽွင်းပွၵ်ႈမႃးၶိုၼ်း ၺႃးပလိၵ်ႈမၢၼ်ႈတီႉၺွပ်း တီႈတၢင်းၶဝ်ႈဝဵင်းပင်းတရႃႉ တေႃႇထိုင်ယၢမ်းလဵဝ် ပႆႇပွႆႇလွတ်ႈၶိုၼ်း။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ