ပၢင်တိုၵ်းယိုတ်းတပ်ႉသိုၵ်းမၢၼ်ႈ တီႈဝၢၼ်ႈတယႅၵ်ႉၵူင်း ၸႄႈဝဵင်းၼွင်ၶဵဝ် ၸိုင်ႈတႆးပွတ်းႁွင်ႇၼႆႉ သိုၵ်းမၢၼ်ႈတၢႆ 59 ၵေႃႉ၊ မၢတ်ႇၸဵပ်းထႅင်ႈ မွၵ်ႈ 40 ၵေႃႉၼႆ ၽွင်းလူင်ၾၢႆႇၵႅတ်ႇၶႄ လူင်ပွင်ၸိုင်ႈ ၽွမ်ႉႁူမ်ႈၸိူဝ်ႉၸၢတ်ႈ NUG ပိုၼ် ၽၢဝ်ႇဢွၵ်ႇ မိူဝ်ႈဝၼ်းတီႈ 27 ၼႆႉ ၼင်ႇၼႆ။
ၽွင်းၶၢဝ်းသွၼ်းၼမ်ႉ ဝၼ်းတီႈ 15/04/2024 ၸုမ်းၵႅတ်ႇၶႄၵူၼ်းမိူင်း ဝဵင်းလိူဝ်ႇ MDY – PDF လူမ်ႇယိုဝ်း ယိုတ်းလႆႈ တပ်ႉသိုၵ်းမၢၼ်ႈ တီႈဝၢၼ်ႈတယႅၵ်ႉၵူင်း ၸႄႈဝဵင်းၼွင်ၶဵဝ် ယၢၼ်ၵႆႁူင်းႁဵၼ်းၾိုၵ်းၵၢၼ်သိုၵ်း DSA ဝဵင်းပၢင်ႇဢူႈလူင် မွၵ်ႈ 10 လၵ်း ၊ ဝၢႆးၼၼ်ႉ တႄႇဝၼ်းတီႈ 19 ၼႆႉ သိုၵ်းမၢၼ်ႈ ထႅမ်ႁႅင်းသိုၵ်းတင်းၼမ် ၸႂ်ႉပႃးၶိူင်ႈမိၼ်တိုၵ်း ၶိူင်ႈၵွင်ႈ ယႂ်ႇ ယိုဝ်းတိုၵ်းၶိုၼ်းႁၢဝ်ႈႁႅင်း။
တႄႇဝၼ်းတီႈ 19 – 25 ၶၢဝ်းတၢင်း 6 ဝၼ်းၼႆႉ မၢၵ်ႇလူင်သိုၵ်းမၢၼ်ႈ တူၵ်းတႅၵ်ႇၼႂ်းဝၢၼ်ႈတယႅၵ်ႉၵူင်း ဢမ်ႇယွမ်း 8 ၵမ်း၊ သိုၵ်းမၢၼ်ႈၸႂ်ႉၶိူင်ႈမိၼ်တိုၵ်း ယိုဝ်း 32 ၵမ်း၊ ဢွင်ႈတီႈ ဢမ်ႇပဵၼ်ပၢင်တိုၵ်း ဢမ်ႇပႃးၼႂ်းၵၢၼ်သိုၵ်းၵေႃႈ သိုၵ်းမၢၼ်ႈ လၢမ်းယိုဝ်းၵွင်ႈလူင်သႂ်ႇ လင်ႁိူၼ်းလႄႈ ဝတ်ႉဝႃးၽႃသိူဝ်ႇ လူႉၵွႆၸွမ်းတင်းၼမ်ၼႆ NUG ပိုၼ်ၽၢဝ်ႇဝႆႉၼင်ႇၼႆ။
ဢၢင်ႈဢိင် – Mekong News
