ၸုမ်းၸူဝ်းၽိဝ်ႇ PDF (ဢမ်ႇၼၼ်) Ywangan PDF – JRPF ၶဝ်ႈလူမ်ႇယိုဝ်း ႁူင်းပလိၵ်ႈမၢၼ်ႈ တီႈဝဵင်းယႂႃႇငၢၼ်ႇ ၾၢႆႇသိုၵ်းမၢၼ်ႈလူႉတၢႆ ဢမ်ႇယွမ်း 3 ၵေႃႉ။
ဝၼ်းတီႈ 21/04/2024 ယၢမ်းၵၢင်ၼႂ်မွၵ်ႈ 10 မူင်း ၸုမ်းၸူဝ်းၽိဝ်ႇ PDF ဢဵၼ်ႁႅင်းၵႃး 2 လမ်း ၶဝ်ႈလူမ်ႇယိုဝ်း ႁူင်းပလိၵ်ႈမၢၼ်ႈ ဢၼ်ပၵ်းဝႆႉတီႈ ဝၢၼ်ႈမိၼ်းၵျႃႇတူဝ်း (မြင်းကျဒိုးရွာ) ၼႂ်းဝဵင်းယႂႃႇငၢၼ်ႇ ၸိုင်ႈတႆးပွတ်းၸၢၼ်း ၾၢႆႇသိုၵ်းမၢၼ်ႈလူႉတၢႆ ဢမ်ႇယွမ်း 3 ၵေႃႉ တီႉလႆႈ 1 ၵေႃႉလႄႈ ၶိူင်ႈၵွင်ႈၵၢင်ႇထႅင်ႈ ၼႆယဝ်ႉ။
ၽူႈၶဝ်ႈၸုမ်း ၸူဝ်းၽိဝ်ႇ PDF လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ လႆႈပဵၼ်ပၢင်တိုၵ်းၵၼ် တၢင်းႁိုင်ပၢင်တိုၵ်း တေမီးမွၵ်ႈ 45 မိၼိတ်ႉၼႆႉ ၵူၼ်းသိုၵ်းမၢၼ်ႈၼႂ်းႁူင်းပလိၵ်ႈၼၼ်ႉ တေမီးမွၵ်ႈ 30 ၼႆႉ။ ၼႂ်းၼၼ်ႉ ၺႃးယိုဝ်းတၢႆ ဢမ်ႇယွမ်း 3 ၵေႃႉ။ လိူဝ်ၼၼ်ႉ မၢတ်ႇၸဵပ်းၵမ်ႈၽွင်ႈ ၼၼ်ႉတႄႉ ပၢႆႈလွတ်ႈမူတ်းဢေႃႈ။ ၵူၺ်းၵႃႈ တီႉလႆႈတူဝ်လိပ်း 1 ၵေႃႉ ယဝ်ႉၵေႃႈ ၵွင်ႈ 2 လဝ်းလႄႈ မၢၵ်ႇၵွင်ႈမွၵ်ႈ 300 လုၵ်ႈ”- ဝႃႈၼႆ။
ၵဵဝ်ႇလူၺ်ႈ လွင်ႈပၢင်တိုၵ်းၼႆႉသေ ၾၢႆႇၸုမ်းၸူဝ်းၽိဝ်ႇ PDF ၸႂ်ႉႁႅင်းၵႃး 2 လမ်း ၶဝ်ႈလူမ်ႇယိုဝ်းလႄႈ ႁဵတ်းႁႂ်ႈၵူၼ်းသိုၵ်း ၾၢႆႇၸုမ်းၸူဝ်းၽိဝ်ႇ လႆႈတိူဝ်ႉမၢတ်ႇၸဵပ်း ၵေႃႉၼိုင်ႈ ဝႃႈၼႆ။
ဝၢၼ်ႈမိၼ်းၵျႃႇတူဝ်းၼႆႉ မီးဝႆႉၼႂ်းၵႄႈသဵၼ်ႈတၢင်းလူင် ယႂႃႇငၢၼ်ႇ – ဝဵင်းလိူဝ်ႇ (မၼ်းတလေး) တေယၢၼ် ဝဵင်းယႂႃႇငၢၼ်ႇ မွၵ်ႈ 18 လၵ်း ဝႃႈၼႆ။
 Ywangan PDF - JRPF ၶဝ်ႈလူမ်ႇယိုဝ်း ႁူင်းပလိၵ်ႈမၢၼ်ႈ တီႈၸႄႈဝဵင်းယႂႃႇငၢၼ်ႇ ၾၢႆႇသိုၵ်းမၢၼ်ႈလူႉတၢႆ ဢမ်ႇယွမ်း 3 ၵေႃႉ။ ){kind=link}