Wednesday, May 22, 2024

ၾႃႉၽႃႇ ၵူၼ်းလၢင်းၶိူဝ်း တၢႆၵေႃႉၼိုင်ႈ

Must read

ၾႃႉၽႃႇ ၵူၼ်းၸၢႆး ဢႃယု 39 ပီ ၵူၼ်းလၢင်းၶိူဝ်း ၵေႃႉၼိုင်ႈ လူႉတၢႆ ၽွင်းၵႂႃႇလုမ်းလႃးမၢၵ်ႇမူင်ႈ တီႈၼႂ်းသူၼ်။

ဝၼ်းတီႈ 18/4/2024 ယၢမ်းဝၢႆးဝၼ်း 3 မူင်းၶိုင်ႈ ၾႃႉၽႃႇသႂ်ႇ ၸၢႆးၵျေႃႇ ဢႃယု 39 ပီ လူႉတၢႆ ၽွင်းၵႂႃႇလုမ်း လႃးမၢၵ်ႇမူင်ႈ တီႈၼႂ်းသူၼ် ႁိမ်းၾင်ႇတဵင်း ၼႂ်းဢိူင်ႇဝၢၼ်ႈတႃႈ ၸႄႈဝဵင်းလၢင်းၶိူဝ်း ၸိုင်ႈတႆးပွတ်းၸၢၼ်း။

- Subscription -

ၼၢင်းတဵင်း ၵေႃႉပဵၼ်မေးၼၢင်း ၸၢႆးၵျေႃႇ လၢတ်ႈတီႈၽူႈတွႆႇႁွၵ်ႈဝႃႈ – “မၼ်းၸၢႆးၵႂႃႇၶိုၼ်ႈတူၼ်ႈမၢၵ်ႇမူင်ႈ သေ တိုၵ်ႉႁေႃႇမၢၵ်ႇမူင်ႈ တီႈၼႂ်းသူၼ် ႁိမ်းၾင်ႇတဵင်းယူႇၼၼ်ႉ ၺႃးၾႃႉၽႃႇသႂ်ႇ မၼ်းၸၢႆး တူၵ်းလူင်း တူၼ်ႈမၢၵ်ႇမူင်ႈသေ လူႉတၢႆထင်တီႈ ၵမ်းလဵဝ် မိူဝ်ႈဝၼ်းတီႈ 18 ယၢမ်းဝၢႆးဝၼ်း 3 မူင်းၶိုင်ႈၶႃႈဢေႃႈ။ ၵွၼ်ႇၾႃႉတေၽႃႇသႂ်ႇ မၼ်းၸၢႆးၼႆႉ ၾူၼ်ယႂ်ႇလူမ်းလူင်ႁႅင်း တူၵ်းႁႅင်းၼႃႇၶႃႈ”- ဝႃႈၼႆ။

ၶၢပ်ႈတူဝ်တၢႆ ၸၢႆးၵျေႃႇတႄႉ လႆႈပူၼ်ႉတူဝ်ၵႂႃႇ ၼႂ်းဝၼ်းတီႈ 18 ၼၼ်ႉ ၵမ်းလဵဝ် ဝႃႈၼႆ။

“မိူဝ်ႈၶဝ်ၵႂႃႇသူၼ်တႄႉ ၵႂႃႇၵၼ် 3 ၵေႃႉ ၵူၺ်းၵႃႈ မိူဝ်ႈၾႃႉၽႃႇသမ်ႉ ၽႃႇၺႃးၵေႃႉပဵၼ် ၽူဝ်ၶႃႈ ၵေႃႉလဵဝ် ဢေႃႈ။ ၶၢပ်ႈတူဝ်တႄႉ ပူၼ်ႉၼႂ်းဝၼ်းတီႈ 18 ၼၼ်ႉ ၵမ်းလဵဝ်ယဝ်ႉ။ မၼ်းၸၢႆး လႆႈလူႉၵႂႃႇၸိူင်ႉၼႆၼႆႉ ၶႃႈ ႁဝ်း ပဵၼ်ဢၼ်တိူဝ်ႉၸႂ်တႄႉတႄႉ။ ယၢမ်းလဵဝ် ၵိုတ်းဝႆႉ ႁႃးသွင်ၵေႃႉမႄႈလုၵ်ႈၵူၺ်းယဝ်ႉ။ လုၵ်ႈၶႃႈၵေႃႈ တိုၵ်ႉမႅၼ်ႈၽွင်းလူဝ်ႇၶိုၼ်ႈ ႁဵၼ်းလႄႈ တႃႇတေသိုပ်ႇၵႂႃႇထႅင်ႈမိူဝ်းၼႃႈတႄႉ တေပဵၼ်ဢၼ်ယၢပ်ႇၽိုတ်ႇ လိူဝ်ႁႅင်းတႄႉဢေႃႈ ဢၼ်ႁႃလဵင်ႉၼႂ်း ၼႃႈႁိူၼ်းႁဝ်းသမ်ႉ ပဵၼ်ၽူဝ်ၶႃႈ ၸၢႆးၵျေႃႇၼႆႉ ၵမ်းလဵဝ်ၶႃႈယဝ်ႉ”- ၼၢင်းတဵင်း သိုပ်ႇလၢတ်ႈၼႄၼင်ႇၼႆ။

လိူဝ်ၼၼ်ႉ ၼႂ်းဝၼ်းတီႈ 18 ၼၼ်ႉၵူၺ်း တီႈၸႄႈဝဵင်းမွၵ်ႇမႆႇၵေႃႈ ယွၼ်ႉၾူၼ်ယႂ်ႇလူမ်းလူင်သေ ၽတ်ႉပဝ်ႇ ႁိူၼ်းယေး ၵူၼ်းဝၢၼ်ႈလူႉၵွႆၸွမ်း ဢမ်ႇယွမ်း 3 လင် ဝႃႈၼႆ။

မိူဝ်ႈဝၼ်းတီႈ 17 ယၢမ်းၵၢင်ၼႂ်ၸဝ်ႉ 4 မူင်းၶိုင်ႈ ၼၼ်ႉၵေႃႈ ၾူၼ်ယႂ်ႇလူမ်းလူင်သေ ၾႃႉၽႃႇသႂ်ႇဝူဝ်း ၵူၼ်းဝၢၼ်ႈပဵင်းသႃႇ ဢိူင်ႇႁူဝ်ယ ၸႄႈဝဵင်းမိူင်းယႆ ၸိုင်ႈတႆးပွတ်းႁွင်ႇ လူႉတၢႆ 13 တူဝ် လူႉသုမ်းၶၼ်ငိုၼ်း ဢမ်ႇယွမ်း 50 သႅၼ်ပျႃး ၼႆယဝ်ႉ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း