မေႃယႃ ၵေႃႉၼိုင်ႈ တီႈဝဵင်းမူႇၸေႊ ၺႃးတီႉဢဝ်ပဵၼ်တူဝ်ယိူဝ်ႇ (ပြန်ပေးဆွဲ)

မီးၸုမ်းဢမ်ႇႁူႉၾၢႆႇ မွၵ်ႈ 4 ၵေႃႉ တီႉၺွပ်းၵုမ်းတူဝ်မေႃယႃ ၵႂႃႇၵေႃႉၼိုင်ႈ တီႈဝဵင်းမူႇၸေႊ ဝႃႈၼႆ။

ဝၼ်းတီႈ 9/4/2024 ယၢမ်းႁူဝ်ၶမ်ႈ 5 မူင်းပၢႆ မေႃယႃ မူဝ်းၵျေႃႇၼၢႆႇ ၺႃးၸုမ်းဢမ်ႇႁူႉၾၢႆႇ ၶဝ်ႈတီႉၺွပ်း ၵုမ်းတူဝ်မၼ်း ၸၢႆးၵႂႃႇ မိူဝ်ႈၽွင်းတိုၵ်ႉယူတ်းယႃၵူၼ်းပဵၼ် တီႈႁွင်ႈယႃ (ဆေးခန်း) ဢၼ်ပိုတ်ႇဝႆႉ တီႈပွၵ်ႉၶရိတ်ႉယၢၼ်ႇ ဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ။

ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၽွင်း မေႃယႃ တိုၵ်ႉယူတ်းယႃ ၵူၼ်းပဵၼ်တီႈ (သေးၶၢၼ်း) ယူႇၼၼ်ႉ မီးၵူၼ်းၸုမ်းၼိုင်ႈ ၶီႇၵႃးမႃးလမ်းၼိုင်ႈ တေမီးဢဵၼ်ႁႅင်း 4 ၵေႃႉၼႆႉ။ ၵူၼ်း ႁၢႆႉၼၼ်ႉ တႃႇ 2 ၵေႃႉ ပႂ်ႉဝႆႉၼိူဝ်ၵႃး။ တႃႇ 2 ၵေႃႉ လူင်းၵႃးမႃးသေ မႃးပေႃႉထုပ်ႉ မေႃယႃၼၼ်ႉယဝ်ႉ တီႉၺွပ်း မၼ်းၸၢႆးၼၼ်ႉၵႂႃႇၸွမ်းၼႂ်း ၵႃးၶဝ်”- ဝႃႈၼႆ။

ၸုမ်းဢၼ် တီႉၺွပ်းမေႃယႃ မူဝ်းၵျေႃႇၼၢႆႇၵႂႃႇၼၼ်ႉ ပဵၼ်ၸုမ်းလႂ် ၺွပ်းၵႂႃႇဢၼ်ဝႃႈၼၼ်ႉတႄႉ ပႆႇႁူႉ ယဝ်ႉၵေႃႈ တီႉၵႂႃႇဝႆႉတီႈလႂ် ၸိူဝ်းၼႆႉၵေႃႈ ယင်းပႆႇႁူႉ ၼႆယဝ်ႉ။

မိူဝ်ႈဝၼ်းတီႈ 26/3/2024 ယၢမ်းၵၢင်ၶမ်ႈ 8 မူင်းပၢႆ ၼၼ်ႉၵေႃႈ မီးၸုမ်းဢမ်ႇႁူႉၾၢႆႇ ၶဝ်ႈတီႉဢဝ် ၸဝ်ႈႁၢၼ်ႉၶၢႆၾူၼ်း ဢၼ်ပိုတ်ႇၶၢႆဝႆႉ တီႈႁိမ်းႁူင်းသဝ်း ၽူႊလီႊလၢႆႊ (ဖူလီလိုက်တည်ခိုးခန်း) ပွၵ်ႉၵွင်းမူးလွႆ ဝဵင်းမူႇၸေႊ ၵႂႃႇၵေႃႉၼိုင်ႈယဝ်ႉ။

ယၢမ်းလဵဝ် ၵူၼ်းမူႇၸေႊ ၵႆႉၺႃးၸုမ်းဢမ်ႇႁူႉၾၢႆႇ ဢၢင်ႈဝႃႈ ပဵၼ်ၸုမ်းလုၵ်ႉၽိုၼ်ႉ MRTTD ၊ ၸုမ်း MSPDF ၸိူဝ်း ၼႆႉသေ သူင်ႇလိၵ်ႈၸူး ၼႂ်း Viber ၵူၼ်းၸိူဝ်းလႅၵ်ႈငိုၼ်း၊ ၸဝ်ႈႁၢၼ်ႉၶၢႆၶူဝ်းႁိူၼ်း ၵေႃႇသၢင်ႈ၊ ႁၢၼ်ႉၶၢႆ ၶိူင်ႈၾႆးၾႃႉ၊ ႁၢၼ်ႉၶၢႆၶူဝ်းၵုၼ်ႇ၊ ႁၢၼ်ႉၶၢႆၾူၼ်း၊ ႁၢၼ်ႉၶၢႆၶမ်း၊ ၵူၼ်းႁဵတ်းၵၢၼ် ပၢႆးမၢၵ်ႈမီး ၸိူဝ်းၼႆႉ မႃးၶိူဝ်းယႂ်း။

ၼႂ်းလိူၼ်မၢတ်ႊၶျ် ပူၼ်ႉမႃးၼႆႉ ၵူၼ်းမူႇၸေႊ ၺႃးၸုမ်းဢမ်ႇႁူႉၾၢႆႇၼႆႉ တီႉၺွပ်း ဢဝ်ပဵၼ်တူဝ်ယိူဝ်ႇလႄႈ ပႂ်ႉၸူၼ် ၸွမ်းတႃႈၸွမ်းတၢင်း ၸိူင်ႉၼႆၼႆႉ မီးမႃးမွၵ်ႈ 10 ၵေႃႉယဝ်ႉ ဝႃႈၼႆ။