Tuesday, May 21, 2024

ပၢင်သွၼ်လိၵ်ႈတႆး တီႈမိူင်းတူၼ် ပီၼႆႉ လုၵ်ႈႁဵၼ်းလူတ်းယွမ်းၼမ်

Must read

ၽွင်းဢိုတ်းႁဵၼ်း လူင်ပွင်ၸိုင်ႈမၢၼ်ႈ ၶၢဝ်းမႆႈ 3 လိူၼ်ၼႆႉ ယူႇတီႈ သင်ၶၸဝ်ႈ မိူင်းတူၼ် ဢဝ်တိုဝ်ႉတၢင်းၼႆႉသေ ပူင်သွၼ်လိၵ်ႈတႆးပၼ်လုၵ်ႈဢွၼ်ႇ ၸွမ်းပွၵ်ႉယွမ်ႇ ပီၼႆႉ လုၵ်ႈႁဵၼ်း လူတ်းယွမ်းၼမ် ယွၼ်ႉၶူးသွၼ်ဢေႇ။

တႄႇဢဝ် ဝၼ်းတီႈ 3/3/2024 ၼၼ်ႉမႃး သင်ၶၸဝ်ႈ ဢွၼ်ႁူဝ်ၼမ်းၼႃႈသေ ပိုတ်ႇပၢင်သွၼ်လိၵ်ႈတႆး ၶၢဝ်းမႆႈ တီႈဝတ်ႉပီႇတၵၢတ်ႇ၊ ဝတ်ႉဝၢၼ်ႈမႂ်ႇလႄႈ ပွၵ်ႉၼွင်ပႃယဵၼ်ႇ ၼႂ်းဝဵင်းမိူင်းတူၼ် ၸႄႈတွၼ်ႈမိူင်းသၢတ်ႇ ၸိုင်ႈတႆးပွတ်းဢွၵ်ႇ ၶူင်း ပီၼႆႉ လုၵ်ႈႁဵၼ်းမီး မွၵ်ႈ 60 ၵေႃႉၵူၺ်း။

- Subscription -
ပၢင်သွၼ်လိၵ်ႈတႆး ဝဵင်းမိူင်းတူၼ်
Photo by – ၵူၼ်းပိုၼ်ႉတီႈ/ ပၢင်သွၼ်လိၵ်ႈတႆး တီႈဝတ်ႉပီႇတၵၢတ်ႈ

ၶူးသွၼ် တီႈဝဵင်းမိူင်းတူၼ် ၸဝ်ႈၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၵူႈပီ ပူၼ်ႉမႃးၼႆႉ လုၵ်ႈႁဵၼ်း မီးၼပ်ႉႁူဝ်ပၢၵ်ႇၶႃႈယဝ်ႉ။ ပီၼႆႉ တီႈဝတ်ႉပီႇတၵၢတ်ႈ မီး 42 ၵေႃႉ။ တီႈပွၵ်ႉၼွင်ပႃယဵၼ်ႇ မီး 7-8 ၵေႃႉ။ တီႈဝတ်ႉဝၢၼ်ႈမႂ်ႇတႄႉ ပႆႇႁူႉ။ ယွၼ်ႉၶူးသွၼ်ဢေႇဢေႃႈ ၸင်ႇဝႃႈ လုၵ်ႈႁဵၼ်းလူတ်းယွမ်းၼမ်။ မိူဝ်ႈပီၵၢႆၵေႃႈ ဢမ်ႇလႆႈပိုတ်ႇပၢင်သွၼ်လိၵ်ႈတႆး ၶၢဝ်းမႆႈ ၶၢတ်ႇၵႂႃႇပီၼိုင်ႈ ယွၼ်ႉၸဝ်ႈၶူးၶဝ် ၵႂႃႇၶိုၼ်ႈပၢင်ၾိုၵ်းၽွၼ်ႉမူတ်းလႄႈ ဢမ်ႇပဵၼ်ပိုတ်ႇ”- ဝႃႈၼႆ။

ၵူႈပီ ပူၼ်ႉမႃးတႄႉ ပၢင်သွၼ်လိၵ်ႈတႆး ၶၢဝ်းမႆႈ တီႈဝဵင်းမိူင်းတူၼ်ၼႆႉ တေပိုတ်ႇပူင်သွၼ်ပၼ် လုၵ်ႈဢွၼ်ႇ မိူၼ်ၼင်ႇ – ပွၵ်ႉဝၢၼ်ႈမႂ်ႇ၊ ပွၵ်ႉဢူးယဵၼ်ႇ၊ ပွၵ်ႉၼွင်ပႃယဵၼ်ႇလႄႈ တီႈဝတ်ႉပီႇတၵၢတ်ႈ ၸိူဝ်းၼႆႉ။

ပၢင်သွၼ်လိၵ်ႈတႆး ဝဵင်းမိူင်းတူၼ်
Photo by – ၵူၼ်းပိုၼ်ႉတီႈ/ ပၢင်သွၼ်လိၵ်ႈတႆး တီႈဝတ်ႉပီႇတၵၢတ်ႈ

ပီၼႆႉ ပၢင်သွၼ်လိၵ်းတႆး ၶၢဝ်းမႆႈ တီႈဝဵင်းမိူင်းတူၼ်ၼႆႉ ပူင်သွၼ်ပၼ် လုၵ်ႈဢွၼ်ႇ တႄႇဢဝ် ဝၼ်းတီႈ 3/3/2024 တေႃႇထိုင် ဝၼ်းတီႈ 21/5/2024 တႃႇၶၢဝ်းတၢင်းမွၵ်ႈ 3 လိူၼ် ယွၼ်ႉဝႃႈ ဝၼ်းတီႈ 1/6/2024 သမ်ႉ လုၵ်ႈဢွၼ်ႇလူဝ်ႇသိုပ်ႇၶိုၼ်ႈႁူင်းႁဵၼ်း လူင်ပွင်ၸိုင်ႈမၢၼ်ႈယဝ်ႉ ဝႃႈၼႆ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း