သဵင်မၢၵ်ႇတႅၵ်ႇ လင်ႁႅင်း တၢင်းၾၢႆႇႁွင်ႇဝဵင်းလၢႆးၶႃႈ ၵမ်းၼိုင်ႈ ႁဵတ်းႁႂ်ႈၵူၼ်းမိူင်း ဢွၼ်ၵၼ်တူၵ်းၸႂ် တိုၼ်ႇသၢၼ်ႈ ၵူဝ်ပဵၼ် ပၢင်တိုၵ်းယႂ်ႇလူင်။
ဝၼ်းတီႈ 27/2/2024 ယၢမ်းႁူဝ်ၶမ်ႈမွၵ်ႈ 7 မူင်း သဵင်မၢၵ်ႇတႅၵ်ႇ လင်ႁႅင်း ၵမ်းၼိုင်ႈ တၢင်းၾၢႆႇတပ်ႉသိုၵ်းမၢၼ်ႈ ၶမယ 64 ၾၢႆႇႁွင်ႇဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ၵူၼ်းမိူင်းၵမ်ႈၼမ်တူၵ်းၸႂ် ၵူဝ်ပဵၼ်ပၢင်တိုၵ်းယႂ်ႇထႅင်ႈ ဝႃႈ ၼႆ။
ၵူၼ်းပိုၼ်ႉတီႈ ဝဵင်းလၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ – “သဵင်မၢၵ်ႇလင်မေႃးၵမ်းၼိုင်ႈ မေႃးမႃးတၢင်းတပ်ႉသိုၵ်းမၢၼ်ႈ ၶမယ 64 ၾၢႆႇႁွင်ႇဝဵင်း တၢင်းဝၢၼ်ႈၼွင်မိူင်း တၢင်းဢွၵ်ႇၵႂႃႇမိူင်းၵိုင်ၼၼ်ႉၶႃႈ။ သဵင်မၢၵ်ႇၼၼ်ႉ လင်မေႃးႁႅင်းၼႃႇ ယွၼ်ႉသင်လႄႈ တႅၵ်ႇၼႆၼၼ်ႉ ပႆႇမီးၽႂ်ႁူႉလီလီ။ ယွၼ်ႉမၢၵ်ႇတႅၵ်ႇၼႆႉ တေၸၢင်ႈပဵၼ်မၢၵ်ႇႁၢင်ႈၵၢင်သေ တူဝ်သတ်းတေၵႂႃႇၽႃႇၺႃး ဢမ်ႇ ၼၼ် ၵိင်ႇမႆႉတူၵ်းသႂ်ႇသေ တႅၵ်ႇၵေႃႈ ၸၢင်ႈပဵၼ်လႆႈ ႁဝ်းၶႃႈ ထၢင်ႇတႄႉ။ ၽိူဝ်ႇလႆႈငိၼ်းသဵင်မၢၵ်ႇလင်မေႃး ၸိူင်ႉၼႆယဝ်ႉ ၵူၼ်းမိူင်းတႄႉ ဢွၼ်ၵၼ်တူၵ်းၸႂ်ၵူဝ်ၶႃႈဢေႃႈ”- ဝႃႈၼႆ။
ဝၢႆးသေ သဵင်မၢၵ်ႇတႅၵ်ႇ လင်ႁႅင်း ၼႆႉယဝ်ႉ ၸဵမ်ရူတ်ႉၵႃး/ ၵူၼ်းမိူင်းၵႂႃႇမႃး ၸွမ်းၼႂ်းၵၢင်ဝဵင်း ၸိူဝ်းၼႆႉ ဢမ်ႇမီးၽႂ်ႁတ်းၵႂႃႇမႃး ယဵၼ်သီႇမူတ်း ဝႃႈၼႆ။
ပူၼ်ႉမႃး မိူဝ်ႈဝၼ်းတီႈ 31/1/2024 ယၢမ်းႁူဝ်ၶမ်ႈ 6 မူင်း ၸၢႆးၸၢမ်ႇထုၼ်း (ႁွင်ႉ) ၸၢႆးပီး ၵႂႃႇပတ်းၽဵဝ်ႈ ႁဵတ်းလွင်ႈမူတ်းသႂ်ႇ တႃႇပိုတ်ႇႁၢၼ်ႉမႄးရူတ်ႉ တီႈဝၢၼ်ႈမၢၵ်ႇလၢင်း တၢင်းၾၢႆႇဢွၵ်ႇတဵင်း ဝဵင်းလၢႆးၶႃႈ မိူဝ်ႈၽွင်းၸုတ်ႇၽဝ် ယုၵ်းယၢၵ်းယူႇၼၼ်ႉ ဢမ်ႇထၢင်ႇထိူမ်သေ မၢၵ်ႇတႅၵ်ႇတိူဝ်ႉသႂ်ႇမၼ်းၸၢႆး လႆႈလူႉတၢႆထင်တီႈ။
