သိုၵ်းမၢၼ်ႈ ပွႆႇမၢၵ်ႇၶိူင်ႈမိၼ် ႁိမ်းမိူင်းပွၼ် ႁဵတ်းႁႂ်ႈၵူၼ်းမိူင်းတိုၼ်ႇသၢၼ်ႈ

မိူဝ်ႈၼႆႉ ဝၼ်းတီႈ 20/2/2024 ယၢမ်းၵၢင်ဝၼ်း 12 မူင်း သိုၵ်းမၢၼ်ႈ ယိုတ်းမိူင်း ၸႂ်ႉၶိူင်ႈမိၼ် ပွႆႇမၢၵ်ႇလူင်သႂ်ႇ ၼႂ်းၵႄႈ မိူင်းပွၼ် – ႁူဝ်ပူင်း ၼႂ်းဝဵင်းမိူင်းပွၼ် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ႁဵတ်းႁႂ်ႈၵူၼ်းမိူင်း တူၵ်းၸႂ်တိုၼ်ႇ သၢၼ်ႈ မႆႈၸႂ်ၵူဝ်ပဵၼ်ပၢင်တိုၵ်းယႂ်ႇလူင်။

ၵူၼ်းပိုၼ်ႉတီႈ ဝဵင်းမိူင်းပွၼ် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၼႆႉ ယၢမ်းၵၢင်ဝၼ်း 12 မူင်း ငိၼ်းသဵင်မၢၵ်ႇ လူင် တူၵ်းတႅၵ်ႇ 2 ၵမ်း။ သဵင်ၵွင်ႈယိုဝ်းၵၼ် ၸိူဝ်းၼၼ်တႄႉ ဢမ်ႇငိၼ်း။ ၶိူင်ႈမိၼ်သိုၵ်းမၢၼ်ႈၵေႃႈ ပၼ်ႇၵႂႃႇပၼ်ႇမႃး ဢေႃႈ။ ပႆႇႁူႉဝႃႈ ၸုမ်းလႂ်တင်းၸုမ်းလႂ်ယိုဝ်းၵၼ်တႄႉတႄႉ။ ၵူၼ်းမိူင်းတႄႉ ပေႃးလႄႇႁႃတၢင်းပၢႆႈမၼ်းယူႇယဝ်ႉ။ ငိၼ်းဝႃႈ တႄႉ SSPP ၶဝ် တူင်ႉၼိုင်ဝႆႉတၢင်းသီႇဢုၼ် ဢၼ်မီးၼႂ်းၵႄႈႁူဝ်ပူင်း – မိူင်းပွၼ် ၼၼ်ႉၼႆလႄႈ သိုၵ်းမၢၼ်ႈတင်ႈၸႂ် ဢဝ်ၶိူင်ႈမိၼ်မႃးပွႆႇမၢၵ်ႇသႂ်ႇ”- ဝႃႈၼႆ။

ဝၢႆးသဵင်မၢၵ်ႇတႅၵ်ႇ ငဝ်းလၢႆးယဵၼ်ယဝ်ႉ ၵူၼ်းမိူင်းပွၼ် ၸင်ႇဢွၼ်ၵၼ်တူင်ႉၼိုင်ႈၵႂႃႇမႃးၶိုၼ်းမိူၼ်ၵဝ်ႇ။ ဢိင်ၼိူဝ် လွင်ႈ ၼႆႉ ၵမ်ႈၽွင်ႈၵေႃႈဝႃႈ သိုၵ်း PNLO တင်း သိုၵ်းမၢၼ်ႈ ႁိုၵ်ႉၺႃးၵၼ် ၼႂ်းၵႄႈႁူဝ်ပူင်း – မိူင်းပွၼ်လႄႈ သိုၵ်းမၢၼ်ႈ ၸင်ႇဢဝ်မၢၵ်ႇလူင်ပွႆႇသႂ်ႇ ဝႃႈၼႆ။

“ငိၼ်းဝႃႈ မိူဝ်ႈၼႆႉ သိုၵ်း SSPP ၵေႃႈ ထႅမ်ႁႅင်းသိုၵ်း ၶမ်ႈၼမ်ႉပွၼ်မႃး တၢင်းဢိူင်ႇၼႃးယၢင်း ၸဵင်ႇႁွင်ႇဝၼ်းတူၵ်း မိူင်း ပွၼ်ၼႆႉ။ ယဝ်ႉၵေႃႈ သိုၵ်း PNLO လႄႈ သိုၵ်းမၢၼ်ႈၵေႃႈ ယိုဝ်းၵၼ်တၢင်းၾၢႆႇတူၵ်းလွႆမႄးၼႄႇ (မဲနယ်တောင်) ၼၼ်ႉ ၼႆလႄႈ သိုၵ်းမၢၼ်ႈၸင်ႇတင်ႈၸႂ် ဢဝ်ၶိူင်ႈမိၼ် မႃးပွႆႇမၢၵ်ႇႁိုဝ်ဢမ်ႇႁူႉ။ ပဵၼ်ယွၼ်ႉသင်ၼႆ ပႆႇမီးၽႂ်ယိုၼ်ယၼ်ၶႃႈ” – ၵူၼ်းပိုၼ်ႉတီႈ မိူင်းပွၼ်ႇ သိုပ်ႇလၢတ်ႈၼင်ႇၼႆ။

တႄႇဢဝ် ႁၢင်လိူၼ်ၵျႅၼ်ႊၼိဝ်ႊရီႊ 2024 ၼႆႉမႃး သိုၵ်းမၢၼ်ႈလႄႈ ၸုမ်းပျီႇတူႉၸိတ်ႉပဢူဝ်း PNO တင်း တပ်ႉသိုၵ်း ပူတ်းပွႆႇၸိူဝ်ႉၸၢတ်ႈပဢူဝ်း PNLA ပဵၼ်ပၢင်တိုၵ်းၵၼ်ႁၢဝ်ႈႁႅင်း ၼႂ်းၸႄႈဝဵင်းသီႇသႅင်ႇ တေႃႇထိုင်မိူဝ်ႈလဵဝ် သဵင်ၵွင်ႈ ပႆႇယဵၼ်။ ယွၼ်ႉလွင်ႈၼႆႉသေ ၵူၼ်းမိူင်းမွၵ်ႇမႆႇ၊ မိူင်းၼၢႆး၊ လၢင်းၶိူဝ်း ၸိူဝ်းၼႆႉ မႆႈၸႂ် ၵူဝ်ပၢင်တိုၵ်းလၢမ်းထိုင်။

ယဝ်ႉၵေႃႈ ၾၢႆႇသိုၵ်းမၢၼ်ႈ ထႅမ်ႁႅင်းသိုၵ်းတင်းၼမ်မႃးယူႇဝႆႉ ၸွမ်းႁိမ်းႁွမ်း ဝဵင်းမိူင်းပွၼ် ၸိူဝ်းၼႆႉ။ ထႅင်ႈၾၢႆႇၼိုင်ႈ ပျီႇ တူႉၸိတ်ႉပဢူဝ်း PNO ၸိူဝ်းၼႆႉၵေႃႈ ပႂ်ႉၸွမ်းသဵၼ်ႈတႃႈသၢႆတၢင်းသေ ၵူတ်ႇထတ်းၸႅတ်ႈထၢမ် ၵူၼ်းမိူင်း ၵႂႃႇမႃးႁၢဝ်ႈႁႅင်း။