Friday, March 1, 2024

သိုၵ်းမၢၼ်ႈ ယိုဝ်းၵူၼ်းမိူင်းမိတ်ႈ တၢႆ 5 ၵေႃႉ

Must read

ၵူၼ်းမိူင်းမိတ်ႈ ထုၵ်ႇသိုၵ်းမၢၼ်ႈ ယိုဝ်းတၢႆ 5 ၵေႃႉ ၽွင်းပွၵ်ႈမိူဝ်းၸႂ်းႁိူၼ်းယေး ဝႃႈၼႆ။

ႁူဝ်လိူၼ်ၾႅပ်ႊပိဝ်ႊရီႊ 2024 ၼႆႉ ၵူၼ်းဝၢၼ်ႈသူၺ်ႇၸႃႇလီႇ ၸႄႈဝဵင်းမိူင်းမိတ်ႈ ၸိုင်ႈတႆးပွတ်းႁွင်ႇ 5 ၵေႃႉ ပွၵ်ႈမိူဝ်း ၸႂ်းႁိူၼ်း တႃႇတေမိူဝ်းဢဝ်ၶွင်ၵိၼ်ယႅမ်ႉၼႆသေ ထုၵ်ႇသိုၵ်းမၢၼ်ႈ တီႉၺွပ်း ၵူတ်ႇထတ်းၸႅတ်ႈထၢမ်ႁၢဝ်ႈႁႅင်းသေ ယိုဝ်း တၢႆပႅတ်ႈ။

- Subscription -

ၵူၼ်းပိုၼ်ႉတီႈ ဝဵင်းမိူင်းမိတ်ႈ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “တီႈတႄႉမၼ်း ၵူၼ်းမိူင်းၼႆႉ မႃးၸႂ်းႁိူၼ်း မႃးတူၺ်း မူ/ ၵႆႇၶဝ်သေ ယဝ်ႉၵေႃႈ မႃးဢဝ်ၶွင်ၵိၼ်ယႅမ်ႉ။ ၶဝ်မႃးႁူပ်ႉၺႃးသိုၵ်းမၢၼ်ႈသေ ထုၵ်ႇသိုၵ်းမၢၼ်ႈတီႉၺွပ်းၼႄ ၶေႃႈ ဢၢင်ႈ ဝႃႈ ပဵၼ်ၵူၼ်းၸုမ်းၼၼ်ႉၸုမ်းၼႆႉသေ ႁွင်ႉၵႂႃႇၵူတ်ႇထတ်းၸႅတ်ႈထၢမ်ႁၢဝ်ႈႁႅင်း။ ယဝ်ႉၵေႃႈ ၶႃႈႁႅမ်တၢႆပႅတ်ႈ ၼႂ်းဝၢင်း ၵျွင်းဝၢၼ်ႈသူၺ်ႇၸႃႇလီႇၼၼ်ႉ။ ၵွၼ်ႇၼႃႈၼၼ်ႉ ပေႃးသိုၵ်းမၢၼ်ႈ ႁွင်ႉၵႂႃႇၸႅတ်ႈထၢမ်ၼႆ တေႁွင်ႉၵႂႃႇ ၵၢင်ၶမ်ႈသေ ၵၢင် ၼႂ်မႃး ၶဝ်ပွႆႇပၼ်ၶိုၼ်း။ ၼႆႉသမ်ႉ ဢမ်ႇၸႂ်ႈၸိူင်ႉၼၼ် ၽိူဝ်ႇဝႃႈ ၵူၼ်းမိူင်းၵႂႃႇတူၺ်းၵေႃႈ ႁၼ်တၢႆဝႆႉယဝ်ႉ”- ဝႃႈၼႆ။

ၵူၼ်းမိူင်း ဢၼ်ထုၵ်ႇယိုဝ်းတၢႆၼႆႉ ပဵၼ်ၵူဝ်ႇၸေႃႇဝိၼ်း ၊ ၵူဝ်ႇမွင်ႇမျိၼ်ႉ ၊ ၵူဝ်ႇမွင်ႇတိၼ်ႉလႄႈ ပႃးၵူၼ်းၵႃႉၶၢႆၶွင်ၵိၼ်ယႅမ်ႉ 2 ၵေႃႉ ၼႂ်းၵူၼ်းမိူင်း 5 ၵေႃႉၼႆႉ တေမီးဢႃယု ၼႂ်းၵႄႈ 40 – 50 ပီ။ ယဝ်ႉၵေႃႈ ၵူၼ်းမိူင်းမိတ်ႈ ၸိူဝ်းဢွၼ်ၵၼ်ပွၵ်ႈမိူဝ်း ၸႂ်းႁိူၼ်းၽႂ်မၼ်းသေ ထုၵ်ႇသိုၵ်းမၢၼ်ႈတီႉၺွပ်းဝႆႉၵေႃႈ မီးထႅင်ႈ ဢမ်ႇယွမ်း 40 ဝႃႈၼႆ။

“ၸဝ်ႈၵႃးၵေႃႉၼိုင်ႈ ၵႂႃႇႁၼ်မႃးတႄႉ ရူတ်ႉၶိူင်ႈဢၼ်သိုၵ်းမၢၼ်ႈ ၶဝ်ဢဝ်ဝႆႉၼၼ်ႉ တေမီးမွၵ်ႈ 40 လမ်းၼႆႉ။ ပဵၼ်ရူတ်ႉၶိူင်ႈ ၵူၼ်းမိူင်း ၸိူဝ်းပွၵ်ႈမိူဝ်းၸႂ်းႁိူၼ်းယေး။ ၵူၺ်းၵႃႈ မိူဝ်းၺႃးသိုၵ်းမၢၼ်ႈတီႉၺွပ်းၵုမ်းၶင်ဝႆႉ။ ယၢမ်းလဵဝ် ၵူၼ်းမိူင်းဢၼ် ထုၵ်ႇသိုၵ်းမၢၼ်ႈ တီႉၺွပ်းဝႆႉ ၸိူဝ်းၼၼ်ႉ မီးဝႆႉတီႈ ဝတ်ႉသႃႇသၼႃႇပဵၵ်ႉမၢၼ်ႇ (သာသနာ့ဗိမာန်) ၵၢင်ဝဵင်း ၼၼ်ႉ ၼႆၶႃႈ ဢေႃႈ” – ၵူၼ်းပိုၼ်ႉတီႈ ဝဵင်းမိူင်းမိတ်ႈ သိုပ်ႇလၢတ်ႈၼင်ႇၼႆ။

ၸႄႈဝဵင်းမိူင်းမိတ်ႈၼႆႉ မိူဝ်ႈဝၼ်းတီႈ 24/1/2024 ၼၼ်ႉ သိုၵ်း KIA ပိုၼ်ၽၢဝ်ႇ ၵုမ်းလႆႈဝဵင်းယဝ်ႉ ဝႃႈၼႆသေတႃႉ ထိုင် မႃး ဝၼ်းတီႈ 27/1/2024 ၼႆႉ ၾၢႆႇသိုၵ်းမၢၼ်ႈ ပိုၼ်ၽၢဝ်ႇ ယိုတ်းလႆႈၶိုၼ်းယဝ်ႉ ဝႃႈၼႆ။

မိူဝ်ႈၽွင်းပၢင်တိုၵ်းၼၼ်ႉ ႁဵတ်းႁႂ်ႈၵူၼ်းမိူင်းမိတ်ႈ လူႉတၢႆၸွမ်း 12 ၵေႃႉ ၼႂ်းၼၼ်ႉ ပႃးၼၢင်းယိင်း 4 ၵေႃႉ။ ႁိူၼ်းယေး ၵူၼ်းမိူင်းလူႉၵွႆၸွမ်း 100 ပၢႆ။ လိူဝ်ၼၼ်ႉ ႁၢၼ်ႉၶၢႆရူတ်ႉၶိူင်ႈ ၼႂ်းဝဵင်းမိူင်းမိတ်ႈၵေႃႈ ထုၵ်ႇသိုၵ်းမၢၼ်ႈ တပ်ႉၶလယ – 276 သွၵ်ႈတဝ်ဢဝ်ၵႂႃႇ ရူတ်ႉၶိူင်ႈတင်းၼမ် လႆႈႁူႉၼင်ႇၼႆ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း