ဝၢႆးသိုၵ်း MNDAA ပိုၼ်ၽၢဝ်ႇ ၵုမ်းလႆႈဝဵင်းပၢင်ႇသၢႆးယဝ်ႉ ၾၢႆႇသိုၵ်းမၢၼ်ႈ တတ်းၶၢတ်ႇ လႅင်းၾူၼ်း၊ လႅင်းဢိၼ်ႊထိူဝ်ႊ ၼႅတ်ႊပႅတ်ႈတင်းမူတ်းလႄႈ ႁဵတ်းႁႂ်ႈတုမ်ႉတိူဝ်ႉၵူၼ်းမိူင်း ယၢပ်ႇၽိုတ်ႇၵိၼ်းၸႂ်ႁႅင်း တႃႇၵၢၼ်ၵပ်းသိုပ်ႇတိတ်းတေႃႇ။

တႄႇဢဝ် ဝၼ်းတီႈ 28/11/2023 ၼၼ်ႉမႃး ႁၢၼ်ႉတေႃႇထိုင်ယၢမ်းလဵဝ် သိုၵ်းၵဝ်ႈၵၢင်ႉ MNDAA ၵုမ်းဝႆႉ ဝဵင်းပၢင်ႇသၢႆး ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ မီးၶၢဝ်းတၢင်း 2 လိူၼ်ပၢႆယဝ်ႉ ႁဵတ်းႁႂ်ႈၵူၼ်းမိူင်း ယၢပ်ႇ ၽိုတ်ႇ ၵၢၼ်တိတ်းတေႃႇလႄႈ လွင်ႈႁႃၵိၼ်လဵင်ႉတွင်ႉ ယၢပ်ႇၽိုတ်ႇႁႅင်း ယွၼ်ႉသိုၵ်းမၢၼ်ႈ တတ်းၶၢတ်ႇပႅတ်ႈတိတ်း တေႃႇ ၼႆယဝ်ႉ။

ၵူၼ်းပိုၼ်ႉတီႈ ဝဵင်းပၢင်ႇသၢႆး လၢတ်ႈတီႈၽူႈတွႆႇႁွၵ်ႈဝႃႈ – “လႅင်းၾူၼ်းမၢၼ်ႈ ဢမ်ႇလႆႈယဝ်ႉလႄႈ ႁဝ်းၶႃႈ လႆႈၸႂ်ႉသိမ်း ၵၢတ်ႉသ် (sim card) ၶွင်ၶႄႇ။ သိမ်းၵၢတ်ႉသ်ၼႆႉသမ်ႉ ၶဝ်ဝႃႈ ၸႂ်ႉလႆႈဢိၼ်ႊထိူဝ်ႊၼႅတ်ႊ 15 ဝၼ်း ၼႆဝႃႇ။ ပေႃးသိုဝ်ႉ မႃးၸႂ်ႉ ဢမ်ႇထိုင် 3 ဝၼ်းၵေႃႈ ၸႂ်ႉဢမ်ႇလႆႈယဝ်ႉ ထုၵ်ႇပိၵ်ႉပႅတ်ႈဢေႃႈ။ သိမ်းၵၢတ်ႇသ်ၼႆႉ လႆႈသိုဝ်ႉၵႃႈ 1 ဢၼ်လႂ် လႆႈ ပၼ်ငိုၼ်းၶႄႇ 250 ယႂၼ်ႊ တူၵ်းငိုၼ်းမၢၼ်ႈ သႅၼ်သီႇမိုၼ်ႇပျႃး။ ပေႃးၵႂႃႇသိုဝ်ႉ တီႈမိူင်းၶႄႇသမ်ႉ လႆႈပၼ် 50 ယႂၼ်ႊ တူၵ်းငိုၼ်းမၢၼ်ႈ 2 မိုၼ်ႇပျႃး”- ဝႃႈၼႆ။

တီႈဝဵင်းပၢင်ႇသၢႆးၼႆႉ မိူဝ်ႈဢွၼ်တၢင်း ၸႂ်ႉလႅင်းၾူၼ်း မိူၼ်ၼင်ႇ – Mytel ၊ MPT လႄႈ Telenor ၸိူဝ်းၼႆႉ။ ဝၢႆးသိုၵ်း MNDAA ၵုမ်းလႆႈဝဵင်းယဝ်ႉ ထုၵ်ႇသိုၵ်းမၢၼ်ႈ ပိၵ်ႉပႅတ်ႈ လႅင်းၾူၼ်းတင်းမူတ်းလႄႈ ႁဵတ်းႁႂ်ႈၵူၼ်းမိူင်းယၢပ်ႇၽိုတ်ႇ ၵၢၼ်တိတ်းတေႃႇၵၼ် ၼႆယဝ်ႉ။

“ပေႃးလႅင်းၾူၼ်းၶၢတ်ႇယဝ်ႉၼႆၵေႃႈ ႁဵတ်းႁႂ်ႈႁဝ်းၶႃႈ ၵူၼ်းမိူင်းၼႆႉ ယၢပ်ႇၽိုတ်ႇ ၵၢၼ်ၵႃႉၶၢႆၵမ်းလဵဝ်။ မိူဝ်ႈဢွၼ်တၢင်းၼႆႉ ပေႃးပိုတ်ႇလၢၼ်ႉၶူဝ်းၵုၼ်ႇ/ ၶၢႆၶဝ်ႈၽၵ်းၸိုင် ၸဵမ်ၵူၼ်းသိုဝ်ႉၵူၼ်းၶၢႆ တေတိတ်းတေႃႇႁႃၵၼ်ငၢႆႈ။ မိူဝ်ႈလဵဝ် ဢမ်ႇမိူၼ် ၼၼ်ယဝ်ႉ”- ၵူၼ်းပိုၼ်ႉ တီႈသိုပ်ႇလၢတ်ႈၼင်ႇၼႆ။

လိူဝ်သေ ၵၢၼ်ၵပ်းသိုပ်ႇ တိတ်းတေႃႇ ယၢပ်ႇၽိုတ်ႇလိူဝ်ႁႅင်းယဝ်ႉ မိူၼ်ၼင်ႇ – ၶွင်ၵိၼ်ယႅမ်ႉ၊ ၶူဝ်းၵုၼ်ႇ ၸိူဝ်းၼႆႉၵေႃႈ ၵႃႈ ၶိုၼ်ႈႁႅင်း ယၢမ်းလဵဝ် ၶဝ်ႈသၢၼ် 1 ထူင် 20 ပေႇ တေတူၵ်းမႅၼ်ႈငိုၼ်း 2 သႅၼ်ပျႃး ။ ၵူႈပွၵ်ႈ ၵွၼ်ႇသိုၵ်းမၢၼ်ႈ ပႆႇယိုတ်း မိူင်းၼၼ်ႉ 1 ထူင်လႂ် 5 မိုၼ်ႇပျႃး ၼႆယဝ်ႉ။

“တီႈပၢင်ႇသၢႆးၼႆႉ ဢမ်ႇၸၢင်ႈၽုၵ်ႇသွမ်ႈသင် ယွၼ်ႉပဵၼ်လိၼ်ႁၢတ်ႇသၢႆးလႄႈ လႆႈၸႂ်ယႂ်ႇၶဝ်ႈသၢၼ် ၽၵ်းၶဵဝ် တၢင်းမိူင်း ပေႃႈ – မူႇၸေႊ တေႃႉမႃးၵူၺ်း။ ယၢမ်းလဵဝ် တီႈမူႇၸေႊၼႆႉ ဢမ်ႇၸၢင်ႈၵႂႃႇမႃး ယွၼ်ႉသိုၵ်းၶဝ်ပိၵ်ႉတၢင်းဝႆႉလႄႈ လႆႈၵႂႃႇ တေႃႉဢဝ်တၢင်းမိူင်းပေႃႈမႃး။ ၵူၺ်းၵႃႈ ၼႂ်းၵႄႈမိူင်းပေႃႈ – ပၢင်ႇသၢႆးသမ်ႉ မီးသိုၵ်းၶၢင် ၶဝ်ပႂ်ႉဝႆႉလႄႈ ဢမ်ႇၸၢင်ႈတေႃႉ သူင်ႇၵႂႃႇမႃးလႆႈလီလီ။ ၶဝ်ပၼ်တၢင်ႇၶဝ်ႈသၢၼ် 1 ၵမ်းလႂ် 2 ထူင်ၵူၺ်း။ ယွၼ်ႉၼၼ်လႄႈ လႆႈသိုဝ်ႉၵိၼ်ၶဝ်ႈၵႃႈ”- ၵူၼ်း ပိုၼ်ႉတီႈ ဝဵင်းပၢင်ႇသၢႆး သိုပ်ႇလၢတ်ႈၼႄၼင်ႇၼႆထႅင်ႈ။

ဝဵင်းပၢင်ႇသၢႆးၼႆႉ တင်းမူတ်း မီး 8 ပွၵ်ႉ ယဝ်ႉၵေႃႈ မီးၸၢဝ်းတႆး၊ ၶၢင်၊ မၢၼ်ႈလႄႈ ၶႄႇ ၸိူဝ်းၼႆႉ ယူႇသဝ်းဝႆႉ။ မိူဝ်ႈလဵဝ် ၵူၼ်းပၢႆႈၽေးသိုၵ်းဝႆႉ ၸိူဝ်းၼၼ်ႉ ၶိုၼ်းဢွၼ်ၵၼ် ပွၵ်ႈမႃးႁိူၼ်းယေး ၽႂ်မၼ်းၶိုင်ႈပႃႈၼမ်ယဝ်ႉ ဝႃႈၼႆ။

ယၢမ်းလဵဝ် ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း တူင်ႉၼိုင်ၵႂႃႇမႃး ၼႂ်းဝဵင်းပၢင်ႇသၢႆးၼႆႉသမ်ႉ တေမီး မိူၼ်ၼင်ႇ – သိုၵ်းတႆး SSPP ၊ သိုၵ်းၵဝ်ႈၵၢင်ႉ MNDAA လႄႈ သိုၵ်းၶၢင် KIA ၸိူဝ်းၼႆႉ။