ဝၢႆးသိုၵ်း KIA တင်း PDF ထွႆဢွၵ်ႇ ၼႂ်းဝဵင်းမိူင်းမိတ်ႈယဝ်ႉ သိုၵ်းမၢၼ်ႈ ဢဝ်တိုဝ်ႉတၢင်းၼႆႉသေ ထၢင်ႇႁၢင်ႈသွၵ်ႈတဝ် ၼႂ်း ႁိူၼ်းယေးလႄႈ ႁၢၼ်ႉၶၢႆၶူဝ်းၵုၼ်ႇ ၶွင်ၵူၼ်းမိူင်း တင်းၼမ်လၢႆ။
ဝၼ်းတီႈ 28/1/2024 ယၢမ်းၵၢင်ၼႂ် သိုၵ်းမၢၼ်ႈ ၶဝ်ႈသွၵ်ႈယႃႉ ၼႂ်းႁၢၼ်ႉၶၢႆရူတ်ႉၶိူင်ႈ AZN (ဢွင်ႇၸေႃႇၼႅင်ႇ) ၼႂ်းဝဵင်းမိူင်းမိတ်ႈ ၸိုင်ႈတႆးပွတ်းႁွင်ႉ ယူၵ်ႉဢဝ်ရူတ်ႉၶိူင်ႈတၢင်ႇၵႃးသိုၵ်းၶဝ်ၵႂႃႇ ပဵၼ်လၢႆလမ်း ဝႃႈၼႆ။
ၵူၼ်းပိုၼ်ႉတီႈ ဝဵင်းမိူင်းမိတ်ႈ လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းမၢၼ်ႈ ဢၼ်ပႂ်ႉၸွမ်းဝဵင်းၼႆႉ ၶဝ်ႈသွၵ်ႈယႃႉ ၼႂ်း ႁၢၼ်ႉၶၢႆရူတ်ႉၶိူင်ႈ ဢွင်ႇၸေႃႇၼႅင်ႇသေ ယူၵ်ႉဢဝ်ရူတ်ႉၶိူင်ႈ တၢင်ႇၵႃးသိုၵ်းၶဝ်ၵႂႃႇ ပဵၼ်လၢႆလမ်းဢေႃႈ။ မိူဝ်ႈၽွင်းၶဝ်ဢဝ်ယူႇၼၼ်ႉ မႅၼ်ႈမိူဝ်ႈၸဝ်ႈၶွင်လၢၼ်ႉ ပွၵ်ႈမိူဝ်းၸႂ်းႁိူၼ်းသေ ႁၼ်သႂ်ႇ မၼ်းၸၢႆးဢမ်ႇၸၢင်ႈႁဵတ်းႁိုဝ် ဢမ်ႇၸၢင်ႈဝႃႈႁိုဝ်ၼၼ်ႉယဝ်ႉ။ သိုၵ်းမၢၼ်ႈ ဢဝ်ရူတ်ႉၶိူင်ႈၵႂႃႇလၢႆလမ်းတႄႉ ဢမ်ႇႁူႉၶႃႈ ယွၼ်ႉမၼ်းၸၢႆး တိုၵ်ႉပဵၼ်ၼမ်ႉႁူၼမ်ႉတႃ ႁႆႈယူႇလႄႈ ႁဝ်းၶႃႈ ပႆႇၸၢင်ႈထၢမ်” – ဝႃႈၼႆ။
မိူဝ်ႈၽွင်း ပဵၼ်ပၢင်တိုၵ်းယူႇ ၼႂ်းမိူင်းမိတ်ႈၼႆႉ သိုၵ်း KIA တင်း PDF ဢဝ်ရူတ်ႉၶိူင်ႈ တီႈႁၢၼ်ႉ (ဢွင်ႇၸေႃႇၼႅင်ႇ) ၼႆႉ ၵႂႃႇၸႂ်ႉ 12 လမ်း။ တႃႇတီႉၺွပ်း ၽူႈလၵ်ႉၸၵ်ႉၶုတ်ႈ ၸွမ်းၼႂ်းဝဵင်းဝႃႈၼႆ။ ဝၢႆးပၢင်တိုၵ်းယဵၼ်ယဝ်ႉ ၸင်ႇဢဝ်ရူတ်ႉၶိူင်ႈ ဢၼ်ၶဝ်ဢဝ် ၵႂႃႇၸႂ်ႉၼၼ်ႉ မႃးပၼ်ၸဝ်ႈၶွင်မၼ်း တင်းမူတ်းၶိုၼ်း ဝႃႈၼႆ။
“သိုၵ်းမၢၼ်ႈ သွၵ်ႈတဝ် ႁိူၼ်းယေး ၵူၼ်းဝၢၼ်ႈဢႃႇသမ်ႇသေ ယဝ်ႉၵေႃႈ ၶိုၼ်ႈယူႇၼိူဝ်ႁိူၼ်းၼွၼ်းၼႂ်းႁိူၼ်း ႁဵတ်းၼႆ ဢေႃႈ ၶဝ်ဝႃႈ ဢဝ်ႁူမ်ႇလူမ်ႈပၼ်ၵူၼ်းမိူင်းၼႆဝႃႇ ပဵၼ်ၼႃႈတိူၵ်ႈမၼ်းၵူၺ်းဢေႃႈ။ ၶမ်ႈဝၼ်းတီႈ 28 ၼႆႉ သိုၵ်းမၢၼ်ႈ ၽႅဝ်ပွၵ်ႉလႅၵ်ႉၶူၵ်ႉတၢၼ်း (လင်ခုတ်တန်းရပ်ကွက်) သေ ဢဝ်ၾႆးၸုတ်ႇၽဝ် ႁိူၼ်းယေး ၵူၼ်းဝၢၼ်ႈထႅင်ႈလၢႆလင် ဢေႃႈ”- ၵူၼ်းပိုၼ်ႉတီႈ ဝဵင်း မိူင်းမိတ်ႈ သိုပ်ႇလၢတ်ႈၼႄၼင်ႇၼႆ။
မိူဝ်ႈဝၼ်းတီႈ 25/1/2024 ၼၼ်ႉၵေႃႈ ၾႆးမႆႈလၢၼ်ႉၶၢႆၶူဝ်းၼုင်ႈ ၵူႈမဵဝ်းမဵဝ်းလႄႈ ၶူဝ်းတႆးတင်း လၢၼ်ႉ i7 ၶိူင်ႈၶွမ်း ၸၢၵ်ႈ ဢိတ်ႇ V9 ၸိူဝ်းၼႆႉ တီႈႁိမ်းႁူင်းယႃ ဝဵင်းမိူင်းမိတ်ႈ ၼႆယဝ်ႉ။
ယၢမ်းလဵဝ် ယွၼ်ႉသိုၵ်းမၢၼ်ႈ ထႅမ်ႁႅင်းသိုၵ်း ၶဝ်ႈမႃးမိူင်းမိတ်ႈၼႆႉ ၼမ်ႁႅင်းလႄႈ ယူႇတီႈ သိုၵ်းၶၢင် KIA တင်း PDF ၸင်ႇ ၶိုၼ်းထွႆ ဢွၵ်ႇဝဵင်းၵႂႃႇ တၢင်းပွတ်းဝၢၼ်ႈဢုင်းၵျေႃးမႂ်ႇလႄႈ ဝၢၼ်ႈသူၺ်ႇၸႃႇလီႇ ၸိူဝ်းၼၼ်ႉဝႆႉယဝ်ႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ