ၽွင်းပၢင်တိုၵ်းၼႆႉ သိုၵ်းမၢၼ်ႈ ၸူၼ်ၵူၼ်းၶၢႆၶမ်း မိူင်းမိတ်ႈ လႆႈၵႂႃႇၶမ်းၼမ်ႉၼၵ်း ဢမ်ႇယွမ်း 5 ၸွႆႉ (500 ၵျၢပ်ႈ) ယဝ်ႉၵေႃႈ ငိုၼ်းမၢၼ်ႈ ၼပ်ႉႁူဝ်ပၢၵ်ႇသႅၼ်။

ၼႂ်းဝၼ်းတီႈ 18-19/1/2024 ၼႆႉ သိုၵ်းၶၢင် KIA တင်း ၸုမ်းၵႅတ်ႇၶႄၵူၼ်းမိူင်း PDF ႁူမ်ႈၵၼ် လေႃႇတိုၵ်း တပ်ႉသိုၵ်း မၢၼ်ႈ ႁၢဝ်ႈႁႅင်း ၼႂ်းဝဵင်းမိူင်းမိတ်ႈ ၸိုင်ႈတႆးပွတ်းႁွင်ႇ မိူဝ်ႈၽွင်းၼၼ်ႉ မႅၼ်ႈမိူဝ်ႈၵူၼ်းမိူင်းဢွၼ်ၵၼ်ပၢႆႈၽေးသိုၵ်းလႄႈ ႁိုၵ်ႉ ၺႃးသိုၵ်းမၢၼ်ႈ ၸွမ်းတၢင်းသေ ၵူၼ်းၶၢႆၶမ်း 2 ၵေႃႉ ထုၵ်ႇၶဝ်ၸူၼ် လႆႈၵႂႃႇၶမ်းၼမ်ႉၼၵ်း ဢမ်ႇယွမ်း 5 ၸွႆႉ ငိုၼ်းထႅင်ႈ 550 သႅၼ်ပျႃး။

ၵူၼ်းပိုၼ်ႉတီႈ ဝဵင်းမိူင်းမိတ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်သိုၵ်းမၢၼ်ႈ တပ်ႉမ 99 ၶႃႈဢေႃႈ မိူဝ်ႈၽွင်းၵူၼ်းၶၢႆၶမ်း တေဢၢၼ်းဢဝ်ၶမ်းပၢႆႈၼၼ်ႉ မႃးႁိုၵ်ႉၺႃးၶဝ်ၸွမ်းတၢင်းသေ ထုၵ်ႇၶဝ်ၸူၼ် လႆႈၵႂႃႇၶမ်းၼမ်ႉၼၵ်း 3 ၸွႆႉပၢႆ ငိုၼ်းမၢၼ်ႈထႅင်ႈ 500 သႅၼ်ပျႃး။ ၵူၼ်းတႄႉ ဢမ်ႇဢဝ်တၢႆ လွတ်ႈမႃးၶႃႈဢေႃႈ။ ဢၼ်ၺႃးၼၼ်ႉ ပဵၼ်ၸဝ်ႈၶွင်ႁၢၼ်ႉၶမ်း ၸိုဝ်ႈႁၢၼ်ႉၶမ်း ၶဝ်ႁွင်ႉဝႃႈ “ၸၢႆးၸူဝ်းမိၼ်ႉ” ဢၼ်ပိုတ်ႇၶၢႆၼႂ်းၵၢတ်ႇမိူင်းမိတ်ႈၼႆႉဢေႃႈ”- ဝႃႈၼႆ။

ယဝ်ႉၵေႃႈ ၵူၼ်းၶၢႆၶမ်း ထႅင်ႈၵေႃႉၼိုင်ႈ ဢၼ်ယူႇတီႈဝၢၼ်ႈသူၺ်ႇၸႃႇလီႇၼႆႉ ၼၼ်ႉၵေႃႈ ထုၵ်ႇသိုၵ်းမၢၼ်ႈ တပ်ႉမ 99 သွၵ်ႈ တဝ်လႆႈ ၼႂ်းထူင် မိူဝ်ႈၽွင်းတေပၢႆႈၽေးၼၼ်ႉ လႆႈၵႂႃႇၶမ်း မွၵ်ႈ 2 ၸွႆႉလႄႈ ငိုၼ်းမၢၼ်ႈထႅင်ႈ 50 သႅၼ်ပျႃး။  

“ၸဝ်ႈၶမ်း ထႅင်ႈၵေႃႉၼိုင်ႈ ပဵၼ်ၸၢဝ်းမၢၼ်ႈ ယူႇႁိမ်းၵျွင်းသူၺ်ႇၸႃႇပၢင်ႇ ၼႂ်းဝၢၼ်ႈသူၺ်ႇၸႃႇလီႇ ၼၼ်ႉၵေႃႈ ဢၢၼ်းပၢႆႈသေ ႁိုၵ်ႉၺႃးသိုၵ်းမၢၼ်ႈ ၸွမ်းတၢင်း ၽွင်းတိုၵ်ႉမီးၼိူဝ်ၵႃးၼၼ်ႉ ယွၼ်ႉၸဝ်ႈၶမ်း ႁွႆႈဝႆႉပေႇႁူ၊ သၢႆၶေႃးၶမ်းဝႆႉလႄႈ ၶဝ်ႁၼ် သေ ၸႂ်ႉပူတ်း ယဝ်ႉၵေႃႈ ၵီႈတူၺ်းၼႂ်းထူင်ထႅင်ႈ ႁၼ်ၶမ်းၼမ်ႉၼၵ်း မွၵ်ႈ 2 ၸွႆႉ၊ ငိုၼ်း 50 သႅၼ်ပျႃး ၼၼ်ႉၵေႃႈ ၸူၼ်ဢဝ် ၵႂႃႇမူတ်း။ ဢၼ်ၼႆႉ တီႈႁဝ်းႁူႉၵူၺ်း။ ဢၼ်ႁဝ်းၶႃႈ ဢမ်ႇႁူႉၵေႃႈ တေမီးထႅင်ႈတင်းၼမ်”- ၵူၼ်းပိုၼ်ႉတီႈ ဝဵင်းမိူင်းမိတ်ႈ သိုပ်ႇလၢတ်ႈၼႄၼင်ႇၼႆ။

လိူဝ်ၼၼ်ႉ မိူၼ်ၼင်ႇ ၵူၼ်းပႂ်ႉႁိူၼ်းယေး ၸိူဝ်းၼႆႉၵေႃႈ ထုၵ်ႇသိုၵ်းမၢၼ်ႈ တီႉၺွပ်ႉသေ ၶဝ်ႈသွၵ်ႈတဝ် ၶူဝ်းၶွင်ၼႂ်း ႁိူၼ်းယေး ထႅင်ႈတင်းၼမ်။

 ၵူၼ်းၼုမ်ႇ ဢႃယု 30 ပၢႆ မိူင်းမိတ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ပေႃးၶဝ်ထူပ်းၺႃး ၵူၼ်းပႂ်ႉႁိူၼ်း ၶဝ်တေၺွပ်းထုပ်ႉသေ ဢဝ်ၵွင်ႈငႃ ၸႂ်ႉဢဝ်ၶူဝ်းငိုၼ်းၶမ်းဢွၵ်ႇမႃးပၼ် ယဝ်ႉၵေႃႈ မတ်ႉၸဝ်ႈႁိူၼ်းဝႆႉသေ ပေႃးထိုင်မႃးၵၢင်ၼႂ် ၸင်ႇပွႆႇတူဝ်ၶိုၼ်း လိူဝ်ၼၼ်ႉ ပၢႆဢဝ်ၽႆးၸုတ်ႇၽဝ်ႁိူၼ်းယေး ပႃးထႅင်ႈ။ မၢင်တီႈ ၵူၼ်းမိူင်းပၢႆႈမူၵ်းၼႂ်းလုၵ်းပဵမ်ႇ ၼၼ်ႉၵေႃႈ ဢမ်ႇလွတ်ႈ ၶဝ် ဢဝ်ၵွင်ႈငႃသေ ႁႂ်ႈဢဝ်ငိုၼ်းၶမ်းဢွၵ်ႇပၼ်ၶဝ် ဢမ်ႇၼၼ် ႁႂ်ႈလၢတ်ႈဢွင်ႈတီႈဝႆႉၶူဝ်းငိုၼ်းၶမ်းၸိူဝ်းၼၼ်ႉ ပေႃးယဝ်ႉ ၸင်ႇ သွၵ်ႈတဝ် ၼႂ်းႁိူၼ်းယေး ၸိူင်ႉၼၼ်ဢေႃႈ”- ဝႃႈၼႆ။

ၼႂ်းဝဵင်းမိူင်းမိတ်ႈၼႆႉ တင်းမူတ်းမီး 4 ပွၵ်ႈ ဢၼ်ၺႃးသိုၵ်းမၢၼ်ႈ သွၵ်ႈတဝ် ၼႂ်းႁိူၼ်းယေး ၼမ်တီႈသုတ်းတႄႉ ပဵၼ်ပွၵ်ႉ ၸၢၼ်း၊ ပွၵ်ႉႁွင်ႇလႄႈ ပွၵ်ႉၵုင်းႁေႃ ယဝ်ႉၵေႃႈ ႁိူၼ်းယေး ထုၵ်ႇၾႆးၽဝ်ပႅတ်ႈ လူႉၵွႆၵေႃႈ မီးၼမ်။

မိူဝ်ႈၽွင်းၵူၼ်းမိူင်းပၢႆႈၽေးသိုၵ်းယူႇၼၼ်ႉ ပေႃးႁိုၵ်ႉၺႃးသိုၵ်းမၢၼ်ႈၸွမ်းတၢင်းၸိုင် တေၸႂ်ႉၶွမ်ႈၼႃႈလူင်းသေ ႁႂ်ႈ ဢဝ်ငိုၼ်းၾူၼ်း ၸိူဝ်းၼႆႉ ဢွၵ်ႇပၼ်ၶဝ် ၸိူဝ်းၼၼ်ၵေႃႈ မီးၼမ်။

ယွၼ်ႉပၢင်တိုၵ်းၼႆႉသေ ၾၢႆႇသိုၵ်းမၢၼ်ႈ ၸႂ်ႉၶိူင်ႈမိၼ် ပွႆႇမၢၵ်ႇသႂ်ႇၼႂ်းဝဵင်းမိူင်းမိတ်ႈၼမ်လႄႈ ၵူၼ်းမိူင်း လႆႈလူႉတၢႆ ၸွမ်းၼႂ်းၵႄႈပၢင်တိုၵ်းၼႆႉ ဢမ်ႇယွမ်း 15 ၵေႃႉ မၢတ်ႇၸဵပ်းၸွမ်းၼမ် ထုၵ်ႇသိုၵ်းမၢၼ်ႈ တီႉၺွပ်းၵႂႃႇၸွမ်းသၢႆသိုၵ်း ၸိူဝ်းၼႆႉ ၵေႃႈမီးထႅင်ႈ – ၵူၼ်းပိုၼ်ႉတီႈလၢတ်ႈ။

တပ်ႉသိုၵ်းမၢၼ်ႈ ဢၼ်တူင်ႉၼိုင်ပၵ်းယူႇဝႆႉ ၼႂ်းဝဵင်းမိူင်းမိတ်ႈၼႆႉသမ်ႉ မိူၼ်ၼင်ႇ – တပ်ႉၶမယ 348 ၊ ၶလယ 223 လႄႈ ၶလယ 276 ၸိူဝ်းၼႆႉ တပ်ႉမ 99 တႄႉ တိုၵ်ႉထႅမ်ႁႅင်းသိုၵ်းမႃး မိူဝ်ႈၽွင်းပဵၼ်ပၢင်တိုၵ်းၼႆႉၵူၺ်း ဝႃႈၼႆ။

တႄႇဢဝ် လိူၼ်ၵျႅၼ်ႊၼိဝ်ႊရီႊၼႆႉမႃး သိုၵ်းၶၢင် KIA ႁူမ်ႈတင်း PDF လေႃႇတိုၵ်းတပ်ႉသိုၵ်းမၢၼ်ႈ မႃးႁၢဝ်ႈႁႅင်း ၼႂ်း ၸႄႈဝဵင်းမိူင်းမိတ်ႈလႄႈမၢၼ်ႈပဵင်း ထိုင်မႃး ဝၼ်းတီႈ 21 ယၢမ်းၵၢင်ၼႂ် ၵုမ်းလႆႈ တင်းသွင်ဝဵင်းယဝ်ႉ – ၽူႈၶၢၼ်ပၢၵ်ႇ သိုၵ်းၶၢင် KIA လၢတ်ႈ။