ၽွင်းပဵၼ်ပၢင်တိုၵ်း ႁၢဝ်ႈႁႅင်းၼႆႉ သိုၵ်းမၢၼ်ႈ ၸႂ်ႉၶိူင်ႈမိၼ် ပွႆႇမၢၵ်ႇသႂ်ႇ ၼႂ်းၵၢတ်ႇမိူင်းမိတ်း ထုၵ်ႇၾႆးမႆႈ ပဵၼ်ၽဝ်ႇမူတ်း။
ဝၼ်းတီႈ 19/1/2024 ယၢမ်းၵၢင်ၶမ်ႈ 7 မူင်း သိုၵ်းမၢၼ်ႈ ၸႂ်ႉၶိူင်ႈမိၼ် မႃးပွႆႇမၢၵ်ႇသႂ်ႇ တီႈၼႂ်းၵၢတ်ႇလူင် ဝဵင်းမိူင်းမိတ်ႈ ၸိုင်ႈတႆး ပွတ်းႁွင်ႇ ထုၵ်ႇၾႆးမႆႈမူတ်း ၶူဝ်းၶွင်ၼႂ်းႁၢၼ်ႉ ဢမ်ႇတၼ်းလႆႈသင် ႁဵတ်းႁႂ်ႈၵူၼ်းၶၢႆၵၢတ်ႇ ဢွၼ်ၵၼ်လူႉသုမ်းၼမ် ၼႆယဝ်ႉ။
ၵူၼ်းႁိမ်းၵၢတ်ႇ မိူင်းမိတ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်ၶိူင်ႈမိၼ်သိုၵ်းမၢၼ်ႈ မႃးပွႆႇမၢၵ်ႇသႂ်ႇၶႃႈဢေႃႈ ဢမ်ႇမီးၽႂ်ႁတ်း ဢွၵ်ႇတူၺ်း ငိၼ်းသဵင်မၢၵ်ႇတူၵ်းလင်ႁႅင်းၵေႃႈ ဢဝ်ၾႆးမႆႈၵၢတ်ႇ ၸွမ်းၵမ်းလဵဝ်။ တႄႇမႆႈၵၢင်ၶမ်ႈ 7 မူင်းပၢႆ ထိုင် 9 မူင်းပၢႆ ယၢမ်းလဵဝ် ပဵၼ်ၽဝ်ႇမူတ်းယဝ်ႉ။ မိူဝ်ႈၶမ်ႈဝႃးၼႆႉ ယွၼ်ႉဢမ်ႇၸၢင်ႈၶႄၾႆး မီးရူတ်ႉၶႄၾႆးယူႇသေတႃႉၵေႃႈ ဢမ်ႇမီးၵူၼ်း ယွၼ်ႉဝႃႈ ပိူၼ်ႈဢွၼ်ၵၼ်ပၢႆႈမူတ်း ၵိုတ်းထႅင်ႈႁဝ်း ၸိူဝ်းၼႆႉၵူၺ်း ပႆႇပၢႆႈ”- ဝႃႈၼႆ။
ယဝ်ႉၵေႃႈ မိူဝ်ႈၼႆႉ ဝၼ်းတီႈ 20 ယၢမ်းၸဝ်ႉ 2:30 မူင်း ၾႆးမႆႈႁၢၼ်ႉၶၢႆ Phone & electronics ၾၢႆႇဢွၵ်ႇၵၢတ်ႇ ဝဵင်းမိူင်း မိတ်ႈထႅင်ႈ ႁၢၼ်ႉၼိုင်ႈ ၼႆႉၵေႃႉ ၺႃးမၢၵ်ႇလူင်ယိုဝ်းသႂ်ႇ၊ ႁၢၼ်ႉၶၢႆၾူၼ်းၼႆႉ ပဵၼ်ႁၢၼ်ႉယႂ်ႇလူင် ဢၼ်ၼိုင်ႈၵေႃႈၸႂ်ႈ ဝႃႈၼႆ။
ၽွင်းပဵၼ်ပၢင်တိုၵ်း ႁၢဝ်ႈႁႅင်းယူႇၼႆႉ ႁိူၼ်းယေး ၵူၼ်းမိူင်းမိတ်ႈ လင်ၼိုင်ႈ ထုၵ်ႇၸူၼ် လႆႈၵႂႃႇၶမ်းၸွႆႉပၢႆ ဝႃႈၼႆ။
“ၸႂ်ႈဢေႃႈ ဝၼ်းတီႈ 19 ၼႆႉ မီးၵူၼ်းၶဝ်ႈၸူၼ် ၵူၼ်းမိူင်းမိတ်း လႆႈၵႂႃႇၶမ်းၸွႆႉပၢႆ ၶမ်းၼၼ်ႉ ပဵၼ်ၶမ်းလုၵ်ႈၶူၺ်ၶဝ် မႃးၾၢၵ်ႇ ဝႆႉ ပဵၼ်ၶမ်းဢၼ်ပိူၼ်ႈမႃးပွင်ႇ ၊ မႃးမႄးဝႆႉ တီႈႁၢၼ်ႉၶဝ် ၸိူင်ႉၼႆ။ မိူဝ်ႈၽွင်း ပဵၼ်ပၢင်တိုၵ်းၼႆႉ ၸဝ်ႈၶွင်ႁၢၼ်ႉၶမ်းၼႆႉ ပၢႆႈၵႂႃႇမီး ဝႆႉတီႈဝဵင်းလိူဝ်ႇ။ ၵွၼ်ႇတေမိူဝ်းၼၼ်ႉ ဢဝ်ၶမ်းၸိူဝ်းၼႆႉ မႃးၾၢၵ်ႇဝႆႉ တီႈမႄႈဢွၵ်ႇၼၢႆးၶဝ်။ ၵူၼ်းၸူၼ်ၼၼ်ႉ လႅပ်ႈပဵၼ်ၵူၼ်း တၢင်းၼႂ်းၶဝ်သေ ၸင်ႇၵႂႃႇၸူၼ်ၵူၺ်း ပေႃးဢမ်ႇၼၼ် ၵူၼ်းၸူၼ်ၼၼ်ႉ တေႁဵတ်းႁိုဝ်ႁူႉဝႃႈ ၶမ်းမီးတီႈၼၼ်ႈ”- ၵူၼ်းပိုၼ်ႉ တီႈ ဝဵင်းမိူင်းမိတ်ႈ သိုပ်ႇလၢတ်ႈ ၼႄၼင်ႇၼႆ။
ၶမ်းၸွႆႉပၢႆ ဢၼ်ထုၵ်ႇၸူၼ်ၵႂႃႇၼႆႉ ၸဝ်ႈၶွင်မၼ်းပဵၼ် ႁၢၼ်ႉၶၢႆၶမ်း ဢၼ်ပိုတ်ႇၶၢႆဝႆႉ ၼႂ်းၵၢတ်းလူင်မိူင်းမိတ်ႈ ၸိုဝ်ႈ ႁၢၼ်ႉၶမ်း ႁွင်ႉဝႃႈ “ၸၢႆးၸူဝ်းမိၼ်ႉ သူၺ်ႇပတဵင်ႇ” ဝႃႈၼႆ။
ပၢင်တိုၵ်း တီႈဝဵင်းမိူင်းမိတ်ႈ ၼႂ်းဝၼ်းတီႈ 18-19 ၶၢဝ်းတၢင်း 2 ဝၼ်းမႃးၼႆႉ ထူပ်းႁၼ် တူဝ်တၢႆ သိုၵ်းမၢၼ်ႈ ဢမ်ႇယွမ်း 10 ဝႃႈၼႆ။
ၵူၼ်းၼုမ်ႇ ၼႂ်းပိုၼ်ႉတီႈ ဝဵင်းမိူင်းမိတ်ႈ လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းမၢၼ်ႈ တၢႆမၢၵ်ႇမိူဝ်ဝႆႉ ၼႂ်းဝၢင်းၵျွင်းဢႃႇသၢမ်ႇၼႆႉ မီး 4-5 ၵေႃႉၼႆႉ။ တၢႆမိူဝ်ႈသိုၼ်း ဝၼ်းတီႈ 18 ၼၼ်ႉသေ ႁၢၼ်ႉတေႃႇထိုင် မိူဝ်ႈၼႆႉ ပႆႇမီးၽႂ်ၵႂႃႇၽဵဝ်ႈ တူဝ်တၢႆသိုၵ်းၸိူဝ်း ၼၼ်ႉ။ ယဝ်ႉၵေႃႈ ဢၼ်တၢႆၸွမ်းတၢင်း ၸိူဝ်းၼႆႉၵေႃႈ မီးထႅင်ႈလၢႆၵေႃႉ ႁၼ်သိုၵ်းမၢၼ်ႈၶဝ် ဢဝ်ၵႃးမႃးတေႃႉတၢင်ႇၵႂႃႇယူႇ မိူဝ်ႈၽွင်း ၶဝ်မႃးၵဵပ်းတူဝ်တၢႆၼၼ်ႉ ႁဝ်းဢမ်ႇႁတ်းဢွၵ်ႇၵႂႃႇတူၺ်း ၵူဝ်ၶဝ်ယိုဝ်းသႂ်ႇဢေႃႈ”- ဝႃႈၼႆ။
မိူဝ်ႈဝၼ်းတီႈ 18 ၼၼ်ႉ သိုၵ်း KIA တင်း ၸုမ်းၵႅတ်ႇၶႄၵူၼ်းမိူင်း PDF လေႃႇတိုၵ်း တပ်ႉသိုၵ်းမၢၼ်ႈ ႁၢဝ်ႈႁႅင်း တၢင်း ဝၢၼ်ႈဢႃႇသၢမ်ႇ၊ ဝၢၼ်ႈသူၺ်ႇၸႃႇလီႇ တုမ်ႉတိူဝ်ႉႁိူၼ်းယေး ဝတ်ႉမုၼ်ၸဝ်ႈ ထုၵ်ႇၾႆးမႆႈ လူႉၵွႆ ၸွမ်းတင်းၼမ်။ ဝၼ်းတီႈ 19 ၼႆႉသမ်ႉ ပၢင်တိုၵ်း သိုပ်ႇလၢမ်းထိုင် ၼႂ်းဝဵင်းမိူင်းမိတ်ႈထႅင်ႈ ႁၢဝ်ႈႁႅင်း။
“ယွၼ်ႉပၢင်တိုၵ်းၼႆႉသေ တုမ်ႉတိူဝ်ႉထဝ်ႈယိင်း ပႃႈၸဵင်ႇၺုၼ်ႉ ၵူၼ်းဝၢၼ်ႈဢႃႇသၢမ်ႇ ပဵၼ်လူမ်းႁူဝ်ၸႂ်သေ လူႉတၢႆ ၵႂႃႇ မိူဝ်ႈဝႃး ၵေႃႉၼိုင်ႈ။ ယွၼ်ႉတူၵ်းၸႂ် သဵင်ၵွင်ႈလူင်၊ ၶိူင်ႈမိၼ်ပွႆႇမၢၵ်ႇ၊ ႁိူၼ်းယေး ထုၵ်ႇၾႆးမႆႈလူႉၵွႆ ၸိူဝ်းၼႆႉ ဢေႃႈ။ ယဝ်ႉၵေႃႈ ႁိူၼ်း ၵူၼ်း ဝၢၼ်ႈဢႃႇသၢမ်ႇ ထႅင်ႈလင်ၼိုင်ႈ ၼၼ်ႉၵေႃႈ မီးၵူၼ်းႁိူၼ်း 3 ပေႃႈလုၵ်ႈ။ လုၵ်ႈဢွၼ်ႇ 2 ၵေႃႉ ၼၼ်ႉ ၸွင်ႇတၼ်း ပၢႆႈလွတ်ႈ ဢမ်ႇလွတ်ႈတႄႉ ဢမ်ႇႁူႉ ၵပ်းၾူၼ်းၸူးၵေႃႈ ဢမ်ႇလႆႈ။ ယၢမ်းလဵဝ် တီႈမိူင်းမိတ်ႈၼႆႉ သိုၵ်းသၢမ်ၸုမ်းၼၼ်ႉ ပႆႇသိမ်းလႆႈ”- ၵူၼ်းၼုမ်ႇ မိူင်းမိတ်ႈ သိုပ်ႇလၢတ်ႈၼင်ႇၼႆ။
ယၢမ်းလဵဝ် ၵူၼ်းမိူင်းမိတ်ႈ ဢွၼ်ၵၼ်ပၢႆႈဢွၵ်ႇဝဵင်း ၵမ်ႈၽွင်ႈ ပၢႆႈၵႂႃႇၾၢႆႇႁွင်ႇဝဵင်း သွၼ်ႈဝႆႉ ၸွမ်းဝၢၼ်ႈပၢတ်ႈလႄႈ ပုင်ႇၵၢင် ဢၼ်ယၢၼ်ဝဵင်းမိူင်းမိတ်ႈ 8 လၵ်း။ ၵမ်ႈၽွင်ႈ ပၢႆႈလူင်းၸူး ဝဵင်းလိူဝ်ႇ ၸိူဝ်းၼႆႉ။ ယဝ်ႉၵေႃႈ ယၢမ်းလဵဝ် တီႈဝဵင်းမိူင်းမိတ်ႈၼႆႉ ဢမ်ႇလႆႈလႅင်းၾူၼ်း၊ လႅင်းဢိၼ်ႊထိူဝ်ႊၼႅတ်ႊသင် ဝႃႈၼႆ။
မိူဝ်ႈၼႆႉ ဝၼ်းတီႈ 20 ယၢမ်းၵၢင်ၼႂ် ပၢင်တိုၵ်း သိုပ်ႇလၢမ်းထိုင် တၢင်းမၢၼ်ႈပဵင်းထႅင်ႈ – ၵူၼ်းပိုၼ်ႉတီႈလၢတ်ႈ။
