သိုၵ်းမၢၼ်ႈ ၸႂ်ႉၵူၼ်းဝဵင်းပၢင်ႁူႈ ၾိုၵ်းၵၢၼ်သိုၵ်း

သိုၵ်းမၢၼ်ႈ ၼႄၶေႃႈဢၢင်ႈဝႃႈ တႃႇဢဝ်ႁူမ်ႇလူမ်ႈ ၼႂ်းမူႇဝၢၼ်ႈဢိူင်ႇၽႂ်မၼ်းၼႆသေ ၸႂ်ႉၵူၼ်းဝဵင်းပၢင်ႁူႈ (ဝဵင်းပၢင်ႇ ဢူႈလူင်) ၾိုၵ်းၽွၼ်ႉၵၢၼ်သိုၵ်းဝႆႉ။

ဝၼ်းတီႈ 14/1/2024 ၼႆႉ သိုၵ်းမၢၼ်ႈ ယိုတ်းမိူင်း တဵၵ်းၸႂ်ႉ ႁႂ်ႈၵူၼ်းဝၢၼ်ႈဢိၼ်းပူၵ်ႉ (အင်းပုတ်ကျေးရွာ) ၼႂ်းၸႄႈ ဝဵင်းပၢင်ႁူႈ (မေႇမဵဝ်ႉ) ၵႂႃႇၾိုၵ်းၽွၼ်ႉၵၢၼ်သိုၵ်းဝႆႉ တႃႇဢဝ်ႁူမ်ႇလူမ်ႈ ၼႂ်းမူႇဝၢၼ်ႈဢိူင်ႇၽႂ်မၼ်းၼႆသေ ႁဵတ်းႁႂ်ႈၵူၼ်း မိူင်း ဢမ်ႇႁၼ်လီ ၵူဝ်လႆႈၶဝ်ႈပၢင်တိုၵ်းၸွမ်းသိုၵ်းမၢၼ်ႈ ၼႆယဝ်ႉ။

ၵူၼ်းပိုၼ်ႉတီႈ ဝဵင်းပၢင်ႁူႈ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၶဝ်လၢတ်ႈဝႃႈ တႃႇဢဝ်လွင်ႈႁူမ်ႇလူမ်ႈၼႂ်းဝၢၼ်ႈ ၼႆဝႃႈ။ ၵူၼ်းဝၢၼ်ႈတႄႉ ဢမ်ႇၶႂ်ႈၵႂႃႇၵေႃႈ တဵၵ်းၸႂ်ႉၵႂႃႇဢေႃႈ။ ၶဝ်ဝႃႈ တေပၼ်ပၢင်ၾိုၵ်းၽွၼ်ႉၵူႈဝၢၼ်ႈၼႆဝႃႇ။ တီႈဝၢၼ်ႈ ဢိၼ်းပူၵ်ႉၼႆႉ လႆႈၵႂႃႇၾိုၵ်းယဝ်ႉ 3 ၵေႃႉ”- ဝႃႈၼႆ။

ၵူၼ်းဝဵင်းပၢင်ႁူႈ ဢၼ်ထုၵ်ႇႁွင်ႉၵႂႃႇၾိုၵ်းၵၢၼ်သိုၵ်းၼႆႉသမ်ႉ ၵမ်ႈၼမ် ပဵၼ်သႅၼ်းပၢၼ်ဢႃယု 50 ပီ လူင်းတႂ်ႈ၊ ၼိုင်ႈ ဝၢၼ်ႈလႂ် 3 ၵေႃႉ ထိုင် 10 ၵေႃႉ တေလႆႈသူင်ႇပၼ်။ ယၢမ်းလဵဝ် ၵူၼ်းဝဵင်းပၢင်ႁူႈ လႆႈၾိုၵ်းၵၢၼ်သိုၵ်းၼႆႉ မီးၵႂႃႇ 200 ပၢႆယဝ်ႉ။

“သိုၵ်းမၢၼ်ႈဝႃႈ တႃႇၵႅတ်ႇၶႄၵူၼ်းမိူင်း၊ တႃႇၵႅတ်ႇၶႄဝၢၼ်ႈမိူင်း ၼႆဝႃႇ။ ပေႃးမီးၸုမ်းယိပ်းၵွင်ႈၵၢင်ႇ တၢင်ႇမူႇတၢင်ႇ ၸုမ်း ၶဝ်ႈဝၢၼ်ႈၶဝ်ႈဝဵင်းမႃးၵေႃႈ ႁႂ်ႈလၢတ်ႈၶဝ်။ တႃႇတေတုမ်ႉတွပ်ႇၶိုၼ်းၸုမ်းယိပ်းၵွင်ႈၵၢင်ႇၼၼ်ႉ တေလႆႈႁဵတ်းႁိုဝ် ၼႆၵေႃႈ ၶဝ်လၢတ်ႈပႃး။ မိူဝ်ႈလဵဝ်တႄႉ ၶဝ်ပႆႇၸႂ်ႉယိပ်းၵွင်ႈၵၢင်ႇသင် ၼင်ႇၵဝ်ႇ။ ၵူၼ်းမိူင်းတႄႉ ၽႂ်ၵေႃႈ ဢမ်ႇၶႂ်ႈၵႂႃႇႁဵတ်း သိုၵ်း ဢွၼ်ၵၼ်မႆႈၸႂ်ဝႆႉဢေႃႈ”- ၵူၼ်းပိုၼ်ႉတီႈ ဝဵင်းပၢင်ႁူႈ သိုပ်ႇလၢတ်ႈၼႄၼင်ႇၼႆ။

ၶၢဝ်းတၢင်း ၽႅၼ်တိုၵ်း 1027 မႃးၼႆႉ ၾၢႆႇသိုၵ်းမၢၼ်ႈ မီးလွင်ႈမၢတ်ႇၸဵပ်းလူႉတၢႆ ဢမ်ႇယွမ်း 1,000 ။ ထႅင်ႈၾၢႆႇၼိုင်ႈ ၵေႃႈ သိုၵ်းမၢၼ်ႈ တေၸႂ်ႉၵူၼ်းမိူင်း ၾိုၵ်းၵၢၼ်သိုၵ်းၵူႈဝဵင်းၼႆလႄႈ ယိုင်ႈၶႅၼ်းႁဵတ်းႁႂ်ႈၵူၼ်းမိူင်းမႆႈၸႂ် ၵူဝ်လႆႈၶဝ်ႈပႃး ၼႂ်းပၢင်တိုၵ်း ဝႃႈၼႆ။

ၽူႈယိင်း ဢႃယု 40 ပၢႆ ၵေႃႉၼိုင်ႈ ဝဵင်းပၢင်ႁူႈ လၢတ်ႈတီႈၽူႈတွႆႇႁွၵ်ႈဝႃႈ -“ မိူဝ်ႈလဵဝ် ၾၢႆႇသိုၵ်းမၢၼ်ႈ ဢၼ်လူႉတၢႆ ၵေႃႈၼမ်။ ပေႃးၸုမ်းယိပ်းၵွင်ႈၵၢင်ႇၶဝ် ၶဝ်ႈဝၢၼ်ႈၶဝ်ႈဝဵင်းမႃးၼႆ ၶဝ်တေၸႂ်ႉၵူၼ်းမိူင်းတိုၵ်ႉတႅၼ်းၶဝ်ႁႃႉဢမ်ႇႁူႉ။ ပေႃး ၶဝ်ၾိုၵ်းၵၢၼ်သိုၵ်းပၼ်ႁဵတ်းၼႆတႄႉ ၶဝ်တေၸၢင်ႈႁွင်ႉဢဝ်ၵႂႃႇ တိုၵ်းသိုၵ်းငၢႆႈငၢႆႈၼၼ်ႉၼႃႇၼေႃ။ ဢၼ်ႁဝ်းၶႃႈမႆႈၸႂ် တႄႉ ပေႃးလူင်းပၢင်ၾိုၵ်းၽွၼ်ႉၵၢၼ်သိုၵ်းယဝ်ႉၼႆၸိုင် ၵူဝ်လႆႈၵႂႃႇတိုၵ်းသိုၵ်း ၸွမ်းၶဝ်ၼၼ်ႉၵူၺ်းယဝ်ႉ”- ဝႃႈၼႆ။

ပၢင်တိုၵ်း 1027 ၼႆႉ တင်ႈတႄႇ ဝၼ်းတီႈ 27 လိူၼ်ၼူဝ်ႊဝႅမ်ႊပိူဝ်ႊ 2023 ၼၼ်ႉမႃး ႁၢၼ်ႉတေႃႇထိုင်ယၢမ်းလဵဝ် သဵင် ၵွင်ႈပႆႇယဵၼ်။ သိုၵ်းမၢၼ်ႈ ဢၼ်လႆႈမၢတ်ႇၸဵပ်း တီႈၼႂ်းပၢင်တိုၵ်းၼၼ်ႉသမ်ႉ လႆႈတေႃႉသူင်ႇမႃးယူတ်းယႃတူဝ် တီႈႁူင်း ယႃသိုၵ်း ဝဵင်းပၢင်ႁူႈ၊ ဝဵင်းလိူဝ်ႇ၊ ဝဵင်းလႃႈသဵဝ်ႈ ၸိူဝ်းၼႆႉ။ လိူဝ်ၼၼ်ႉ လူႉတၢႆၵႂႃႇ 300 ၵေႃႉယဝ်ႉၼႆ ယူႇတီႈ သိုဝ်ႇၶၢဝ်ႇၼႂ်း တပ်ႉသိုၵ်းမၢၼ်ႈႁူဝ်ႈဢွၵ်ႇမႃး မိူဝ်ႈဝၼ်းတီႈ 14/1/2024 ၼင်ႇၼႆ။

ၸွမ်းၼင်ႇ ၸုမ်းၶၢဝ်ႇၽူႈတွႆႇႁွၵ်ႈ လႆႈယိုၼ်ႈထိုင်သေ ၵဵပ်းဝႆႉၶေႃႈမုလ်းတႄႉ ၼႂ်းပၢင်တိုၵ်း 1027 ၶၢဝ်းတၢင်း 70 ဝၼ်းပၢႆ မႃးၼႆႉ ၾၢႆႇသိုၵ်းမၢၼ်ႈ ယိုတ်းၵွင်ႈလူင်လႄႈ ၸႂ်ႉၶိူင်ႈမိၼ် ပွႆႇမၢၵ်ႇသႂ်ႇ ၸိူဝ်းၼႆႉ ႁဵတ်းႁႂ်ႈၵူၼ်းမိူင်းတႆး ပွတ်းႁွင်ႇ လူႉတၢႆ မွၵ်ႈ 160 ၵေႃႉ၊ ႁိူၼ်းယေးလူႉၵွႆ ၼပ်ႉႁူဝ်ႁဵင်လင် ၼႆယဝ်ႉ။