သိုၵ်းမၢၼ်ႈ တင်ႈၸႂ် ယိုဝ်းၵွင်ႈလူင် ၶဝ်ႈၼႂ်းဝၢၼ်ႈထႅင်ႈ တူၵ်းသႂ်ႇႁိူၼ်းယေး ၵူၼ်းဝၢၼ်ႈလူႉၵွႆ 2 လင်လႄႈ တိူဝ်ႉပႃး ၵူၼ်း ဝၢၼ်ႈ လူႉတၢႆၵိုၵ်းႁိူၼ်းၸွမ်းထႅင်ႈ 2 ၵေႃႉ။
ဝၼ်းတီႈ 12/1/2024 ယၢမ်းဝၢႆးဝၼ်း 3 မူင်းၶိုင်ႈ သိုၵ်းမၢၼ်ႈ ယိုဝ်းမၢၵ်ႇလူင် ၶဝ်ႈၼႂ်းဝၢၼ်ႈဢုင်းၵျေႃးမႂ်ႇ ၸႄႈဝဵင်းမိူင်း မိတ်ႈ ၸိုင်ႈတႆးပွတ်းႁွင်ႇသေ တူၵ်းသႂ်ႇႁိူၼ်း လုင်းၵျွၵ်ႉၶႄး – ပႃႈၵျေႃႇ သွင်ၽူဝ်မေး လူႉတၢႆၵိုၵ်းႁိူၼ်း ၼႆယဝ်ႉ။
ၵူၼ်းပိုၼ်ႉတီႈ ဝဵင်းမိူင်းမိတ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်မၢၵ်ႇလူင် သိုၵ်းမၢၼ်ႈ တင်ႈၸႂ်ယိုဝ်းၶဝ်ႈဝၢၼ်ႈ ၵမ်းလဵဝ်ၶႃႈ ယဝ်ႉ။ တူၵ်းသႂ်ႇႁိူၼ်းၵူၼ်းဝၢၼ်ႈ လူႉလႅဝ် 2 လင်။ ႁိူၼ်းဢၼ်မၢၵ်ႇလူင် တူၵ်းသႂ်ႇ 2 လင်ၼႆႉ တႃႇလင်ၼိုင်ႈ ပဵၼ်ႁိူၼ်းလုင်း ၵျွၵ်ႉၶႄး – ပႃႈၵျေႃႇ သွင်ၽူဝ်မေးၼႆႉတႄႉ တိူဝ်ႉၺႃးမၢၵ်ႇသေ လူႉတၢႆထင်တီႈၵမ်းလဵဝ် ႁိူၼ်းယေး ၵေႃႈ ယွၵ်းယွႆမူတ်းၶႃႈ”- ဝႃႈ ၼႆ။
ႁိူၼ်းၵူၼ်းဝၢၼ်ႈ ထႅင်ႈလင်ၼိုင်ႈသမ်ႉ တိူဝ်ႉသႂ်ႇႁိူၼ်း လုင်းသၢမ်သွႆႇ – ပႃႈဢူး ၼၼ်ႉတႄႉ ဢမ်ႇတၼ်းတိူဝ်ႉၺႃး ၵူၼ်း။ ၸၢၵ်ႇ မၢၵ်ႇတိူဝ်ႉသႂ်ႇ သိုင်ႇဝႆႉၸၢၵ်ႈ၊ ယွင်ဝႆႉၶဝ်ႈပိူၵ်ႈလႄႈ ၸၢၵ်ႈၽတ်ႉၶဝ်ႈ ၸိူဝ်းၼႆႉ လူႉၵွႆမူတ်း ဝႃႈၼႆ။
ဝၼ်းတီႈ 11/1/2024 ယၢမ်းၵၢင်ဝၼ်း 12 မူင်း သိုၵ်းမၢၼ်ႈ ပွႆႇမၢၵ်ႇသႂ်ႇ ၼႂ်းဝၢၼ်ႈဢုင်းၵျေႃးမႂ်ႇၼႆႉသေ ၸၢၵ်ႇမၢၵ်ႇတိူဝ်ႉသႂ်ႇ ၸၢႆးမူဝ်းတီႇ ဢႃယု 9 ၶူပ်ႇ လႆႈတိူဝ်ႉမၢတ်ႇၸဵပ်းၸွမ်းတီႈၼႃႈလႄႈ ႁူ ။ လိူဝ်ၼၼ်ႉ ဝတ်ႉမုၼ်ၸဝ်ႈလႄႈ ႁိူၼ်းယေး ၵူၼ်း ဝၢၼ်ႈလူႉၵွႆၸွမ်း ဢမ်ႇယွမ်း 10 လင်။
ယဝ်ႉၵေႃႈ ၼႂ်းဝၼ်းတီႈ 11 ၼႆႉၵူၺ်း သိုၵ်းမၢၼ်ႈ ယိုဝ်းၵွင်ႈၸၢၵ်ႈၶဝ်ႈၼႂ်းဝၢၼ်ႈဢုင်းၵျေႃးလူင် ၼႂ်းၸႄႈဝဵင်းမိူင်းမိတ်ႈ ၼၼ်ႉၵေႃႈ မၢၵ်ႇၵွင်ႈတိူဝ်ႉသႂ်ႇႁိူၼ်းယေး ၵူၼ်းဝၢၼ်ႈလူႉၵွႆၸွမ်းထႅင်ႈ လၢႆလင်။
ဝၢၼ်ႈဢုင်းၵျေႃးမႂ်ႇလႄႈ ဢုင်းၵျေႃးလူင် (ၵဝ်ႇ) ၼႆႉ တေယၢၼ်ၵၼ် ၶိုင်ႈလၵ်းပၢႆ ၼႆယဝ်ႉ။
ပူၼ်ႉမႃး မိူဝ်ႈဝၼ်းတီႈ 3/1/2024 ယၢမ်းၵၢင်ၶမ်ႈ ၼၼ်ႉၵေႃႈ မၢၵ်ႇလူင်လုၵ်ႈၼိုင်ႈ တူၵ်းသႂ်ႇတီႈပၢင်ၽဝ်ဢုတ်ႇ (ၵဝ်ႇ) ႁိမ်း ဝၢၼ်ႈဝဵင်းမႂ်ႇ ဝဵင်းမိူင်းမိတ်ႈၼႆႉသေ ၸၢၵ်ႇမၢၵ်ႇတိူဝ်ႉသႂ်ႇ သွင်ပေႃႈလုၵ်ႈ ဢၼ်ၼွၼ်းပႂ်ႉတီႈၼႂ်းသူၼ်ၼၼ်ႉ ၵေႃႉပဵၼ် လုၵ်ႈ ယိင်း လႆႈၵႂႃႇလူႉသဵင်ႈ တီႈႁူင်းယႃသိုၵ်း ဝဵင်းလိူဝ်ႇ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ