တင်ႈတႄႇ မီးၵူၼ်းၶဝ်ႈၸူၼ်ၶၢႆႁၢၼ်ႉၶမ်းလႄႈ ႁၢၼ်ႉၶၢႆၶိူင်ႈၾႆးၾႃႉမႃး ၶၢဝ်းတၢင်း 2 လိူၼ်ထပ်းၵၼ်ၼႆႉ ႁဵတ်းႁႂ်ႈ ၵူၼ်းဝဵင်းပၢင်လူင် ဢမ်ႇမီးလွင်ႈႁူမ်ႇလူမ်ႈ မႆႈၸႂ်ၵူဝ်ယူႇတႃႇသေႇ။
ပူၼ်ႉမႃး မိူဝ်ႈဝၼ်းတီႈ 8/1/2024 ယၢမ်းၵၢင်ဝၼ်း 12 မူင်းပၢႆၼၼ်ႉ မီးၵူၼ်းဢမ်ႇႁူႉၾၢႆႇၵေႃႉၼိုင်ႈ ၶဝ်ႈၸူၼ်ႁၢၼ်ႉၶၢႆ ၶမ်း ၼႂ်းၵၢတ်ႇလူင် ဝဵင်းပၢင်လူင် ၸႄႈဝဵင်းလွႆလႅမ် ၸိုင်ႈတႆးပွတ်းၸၢၼ်း လႆႈၵႂႃႇၶမ်း 3 ၵျၢပ်ႈ (တေတူၵ်းမႅၼ်ႈငိုၼ်းမၢၼ်ႈ 100 သႅၼ်ပၢႆ) ၼႆယဝ်ႉ။
ၵူၼ်းပိုၼ်ႉတီႈ ဝဵင်းပၢင်လူင် လၢတ်ႈတီႈၽူႈတွႆႇႁွၵ်ႈဝႃႈ – “တီႈဝဵင်းပၢင်လူင်ၼႆႉ တင်ႈတႄႇ ၶဝ်မႃးၸူၼ်ၵၼ်၊ ယိုဝ်း ၵၼ်တၢႆ ၸိူင်ႉၼႆ ၵူၼ်းမိူင်းၼႆႉ ဢွၼ်ၵၼ်တူၵ်းၸႂ် တိုၼ်ႇၽၢၼ်ႈ ၵူဝ်ႁႄယူႇတႃႇသေႇၼၼ်ႉယဝ်ႉ။ လႆႈငိၼ်းမႃႁၢဝ်ႇ ၵူၺ်းၵေႃႈ ပေႃး ၵူဝ်ယဝ်ႉ ယၢမ်းလဵဝ်ၼႆႉ။ လွင်ႈႁူမ်ႇလူမ်ႈဢၼ်ဝႃႈၼၼ်ႉ မၼ်းတိုၼ်းဢမ်ႇမီးယဝ်ႉ။ ယၢမ်းၵၢင်ၶမ်ႈ/ ၵၢင်ၶိုၼ်း ၸိူဝ်းၼႆႉ ဢမ်ႇမီး ၽႂ်ႁတ်းဢွၵ်ႇႁိူၼ်းယဝ်ႉ ပေႃးဢမ်ႇၸမ်ပဵၼ်”- ဝႃႈၼႆ။
လိူဝ်ၼၼ်ႉ မိူၼ်ၼင်ႇ ၵူၼ်းၶၢႆၵၢတ်ႇ ႁၢၼ်ႉၶၢႆၶဝ်ႈသဵၼ်ႈ/ ၶဝ်ႈသွႆး၊ ႁၢၼ်ႉၶၢႆၶွင်ၵိၼ်ယႅမ်ႉ ၸိူဝ်းၼႆႉၵေႃႈ မိူၼ်ၵၼ် ပေႃးမိူင်း ဢမ်ႇလႅင်း ယၢမ်း 6 မူင်းၵၢင်ၼႂ်ၸိုင် ပႆႇမီးၽႂ်ႁတ်းပိုတ်ႇၶၢႆ။
ၵူၼ်းၶၢႆၵၢတ်ႇ ဝဵင်းပၢင်လူင် လၢတ်ႈတီႈၽူႈတွႆႇႁွၵ်ႈဝႃႈ – “ၵူႈပွၵ်ႈတႄႉ ယၢမ်းၵၢင်ၼႂ် 4-5 မူင်းၼႆႉ ႁဝ်းၶႃႈ ပေႃးဢွၼ် ၵၼ် မႃး ႁၢင်ႈႁႅၼ်း တႃႇပိုတ်ႇၶၢႆယဝ်ႉ။ ပေႃး 6 မူင်းၵၢင်ၼႂ်ၸိုင် ၸဵမ်ႁၢၼ်ႉၶၢႆၶူဝ်းၵုၼ်ႇၶွင်ၵိၼ်ယႅမ်ႉ၊ ႁၢၼ်ႉသိူဝ်ႈၽႃႈ၊ ႁၢၼ်ႉၶဝ်ႈသဵၼ်ႈ/ ၶဝ်ႈသွႆး ၸိူဝ်းၼႆႉ ပေႃးပိုတ်ႇၶၢႆၵၼ်မူတ်းယဝ်ႉ။ ယၢမ်းလဵဝ် ပေႃးမိူင်းပႆႇလႅင်း ပႆႇလႆႈ 6 -7 မူင်းၸိုင် ပႆႇမီးၽႂ်ၵႂႃႇပိုတ်ႇႁၢၼ်ႉၶၢႆ ၵၼ် ၵူဝ်ၶႃႈဢေႃႈ”- ဝႃႈၼႆ။
ယၢမ်းလဵဝ် ႁၢၼ်ႉၶၢႆၶမ်း ၼႂ်းၵၢတ်ႇလူင် ဝဵင်းပၢင်လူင်ၼႆႉ တင်းမူတ်းတေမီးမွၵ်ႈ 20 ႁၢၼ်ႉ ၸူဝ်ႈမီးၵူၼ်းဢမ်ႇႁူႉၾၢႆႇၶဝ်ႈၸူၼ် တီႈႁၢၼ်ႉၶၢႆၶမ်း မၶိၼ်ႇဢူးၼႆႉသေ ယၢမ်းလဵဝ် ဢွၼ်ၵၼ်ပိၵ်ႉဢိုတ်းၼမ် ႁၢၼ်ႉဢၼ်ပိုတ်ႇၶၢႆတႄႉ မီးၵမ်ႈ ဢေႇၵူၺ်း – ၵူၼ်း ပိုၼ်ႉတီႈလၢတ်ႈ။
“ႁၢၼ်ႉၶၢႆၶမ်းတႄႉ ပိၵ်ႉဢိုတ်းၼမ်ၼႃႇယဝ်ႉ။ ဢၼ်ပိုတ်ႇၶၢႆတႄႉ မီးဢဝ်လၢႆႁၢၼ်ႉၵူၺ်း။ ႁၢၼ်ႉဢၼ်ပိုတ်ႇၶၢႆ ၸိူဝ်းၼၼ်ႉတႄႉ ယၢမ်းလဵဝ် ၶဝ်တေဢဝ်ၶမ်းၵႃႈၶၼ်ထုၵ်ႇ ၸိူဝ်းၼႆႉ တမ်းၶၢႆဢဝ် ဢၼ်ပဵၼ်ၶမ်းၵႃႈၶၼ်ယႂ်ႇ ၸိူဝ်း ၼၼ်ႉတႄႉ ဢမ်ႇဢဝ်ဢွၵ်ႇ တမ်းၶၢႆ မိူၼ်မိူဝ်ႈၵူႈပွၵ်ႈယဝ်ႉ ပေႃးဢမ်ႇၸႂ်ႈ ၵူၼ်းႁူႉၸၵ်းယၢမ်ႈသိုဝ်ႉၶၢႆၵၼ်။ ၵူဝ် ၺႃးၸူၼ်ၶႃႈဢေႃႈ”- ဝႃႈၼႆ။
မိူၼ်ၼင်ႇ ၵူၼ်းၶၢႆၽၵ်းၶဵဝ်ၵေႃႈ မိူၼ်ၵၼ် ၵူႈပွၵ်ႈ ယၢမ်းၵၢင်ၶိုၼ်းလိုၵ်း 12 မူင်း 1 မူင်းၼႆႉ ၸင်ႇဢွၼ်ၵၼ်ၵႂႃႇသိုဝ်ႉ ၶၢႆၵၼ် ပေႃးယဝ်ႉ သႂ်ႇၵႃး/ ရူတ်ႉၶိူင်ႈသေ သိုပ်ႇဢႅဝ်ႇၶၢႆၸွမ်းၼႂ်းပွၵ်ႉ/ ၼႂ်းယွမ်ႇ/ ၼႂ်းမူႇဝၢၼ်ႈ ၸိူဝ်းၼႆႉ။ ယၢမ်းလဵဝ် ၵူၼ်းၵႃႉၽၵ်းၶဝ် တေသိုဝ်ႉဝႆႉၸဵမ်ၸဝ်ႉသေ ပေႃးမိူင်းလႅင်းမႃး ၸင်ႇတေလုၵ်ႉၵႂႃႇၶၢႆ။
ၵူၼ်းၵႃႉၽၵ်းၶဵဝ် ဝဵင်ပၢင်လူင် လၢတ်ႈတီႈၽူႈတွႆႇႁွၵ်ႈဝႃႈ – “ၵူဝ်ၵေႃႈလႆႈႁဵတ်းယဝ်ႉ ပဵၼ်ၵၢၼ်ႁႃၵိၼ်လဵင်ႉတွင်ႉၶႃႈလူး။ မႆႈၸႂ် ယူႇၵေႃႈ ဢမ်ႇၸၢင်ႈႁဵတ်းႁိုဝ် ၵႃႈလႆႈၵႂႃႇၼၼ်ႉယဝ်ႉ လႆႈဝႆႉသတိယူႇသေႇသေႇၶႃႈဢေႃႈ။ ၵူႈပွၵ်ႈ ႁဝ်းၶႃႈ တေၵႂႃႇႁပ်ႉသိုဝ်ႉၽၵ်း ၶဵဝ်ဝႆႉ ယၢမ်းၵၢင်ၶိုၼ်းလိုၵ်း။ ပေႃးယဝ်ႉ တေသိုပ်ႇဢႅဝ်ႇႁႃၶၢႆ ၸွမ်းၼႂ်းပိုၼ်ႉတီႈ ၵမ်းသိုဝ်ႈယဝ်ႉ။ ယၢမ်းလဵဝ် ဢမ်ႇၸႂ်ႈၸိူင်ႉၼၼ် ႁဝ်းၶႃႈ တေသိုဝ်ႉဝႆႉၸဵမ်ၸဝ်ႉသေ ပေႃးမိူင်းလႅင်းမႃး ၸင်ႇလုၵ်ႉၵႂႃႇၶၢႆ ႁဵတ်းၸိူင်ႉၼၼ်ဢဝ်ဢေႃႈ”- ဝႃႈၼႆ။
တေႃႈၼင်ႇ ၵူၼ်းလုၵ်ႉပႆတၢင်း ယၢမ်းၵၢင်ၼႂ်ၸဝ်ႉ ၸိူဝ်းၼႆႉၵေႃႈ ယၢမ်းလဵဝ် ဢမ်ႇမီးၽႂ် ႁတ်းလုၵ်ႉၸဝ်ႉသေ ဢွၵ်ႇပႆတၢင်း မိူၼ်မိူဝ်ႈၵူႈပွၵ်ႈယဝ်ႉ – ၵူၼ်းၼုမ်ႇ ဝဵင်းပၢင်လူင်လၢတ်ႈ။
“လွင်ႈႁူမ်ႇလူမ်ႈ တီႈဝဵင်းပၢင်လူင်ၼႆႉ တိုၼ်းဝႃႈ ဢမ်ႇမီးသေဢိတ်းယဝ်ႉ မိူၼ်ၼင်ႇ လွင်ႈႁူမ်ႇလူမ်ႈတေႃႇသၢႆၸႂ် ၸဝ်ႈၵဝ်ႇ၊ လွင်ႈႁူမ်ႇလူမ်ႈတေႃႇၼႃႈႁိူၼ်းယေး ၸိူဝ်းၼႆႉ ဢမ်ႇမီးယဝ်ႉ။ လူဝ်ႇလႆႈဢဝ် ပုၼ်ႈၽွၼ်းတူဝ်ၽႂ်မၼ်းၼၼ်ႉ ၵူၺ်းၶႃႈယဝ်ႉ။ တေႃႈၼင်ႇ ၵူၼ်းလုၵ်ႉပႆတၢင်းၶဝ် ယင်းဢမ်ႇမီးၽႂ်ႁတ်းလုၵ်ႉၸဝ်ႉသေ ဢွၵ်ႇပႆတၢင်း မိူၼ်မိူဝ်ႈၵူႈပွၵ်ႈယဝ်ႉ။ ပေႃးမိူင်းဢမ်ႇ လႅင်း မွၵ်ႈယၢမ်းၵၢင်ၼႂ် 6 မူင်းၼႆႉ”- ဝႃႈၼႆ။
ပူၼ်ႉမႃး မိူဝ်ႈဝၼ်းတီႈ 27/12/2023 ယၢမ်းၵၢင်ၶမ်ႈမွၵ်ႈ 7 မူင်း ၼၼ်ႉၵေႃႈ မီးၸုမ်းယိပ်းၵွင်ႈၵၢင်ႇ ၸုမ်းၼိုင်ႈ ၶဝ်ႈယိုဝ်း ႁၢၼ်ႉၶၢႆၶိူင်ႈၾႆးၾႃႉၵိုၵ်းႁိူၼ်း တီႈႁိမ်းၵၢတ်ႇ ၾၢႆႇတၢင်းဢွၵ်ႇဝဵင်းပၢင်လူင် တိူဝ်ႉၺႃး ၸဝ်ႈၶွင်ႁၢၼ်ႉ သွင်ပေႃႈလုၵ်ႈ လူႉတၢႆ ယဝ်ႉၵေႃႈ ၵူၼ်းႁဵတ်းၵၢၼ်ထႅင်ႈ 2 ၵေႃႉ။
