မိူဝ်ႈၼႆႉ ဝၼ်းတီႈ 8/1/2024 ယၢမ်းၵၢင်ၼႂ် သိုၵ်းၶၢင် KIA, သိုၵ်းတဢၢင်း TNLA လႄႈ ၸုမ်းၵႅတ်ႇၶႄၵူၼ်းမိူင်း PDF ႁူမ်ႈၵၼ် လေႃႇတိုၵ်း တပ်ႉသိုၵ်းမၢၼ်ႈသေ ယိုတ်းလႆႈ တပ်ႉၸၵၸ 276 ဢၼ်ပၵ်းဝႆႉတီႈ ဝၢၼ်ႈၼမ်ႉၶွႆႈ (မြစ်ဆုံရွာ) ၼႂ်းဝဵင်း မၢၼ်ႈပဵင်း ၸႄႈဝဵင်းမိူင်းမိတ်ႈ ၸိုင်ႈတႆးပွတ်းႁွင်ႇ။  

ၵူၼ်းပိုၼ်ႉတီႈ ဝဵင်းမိူင်းမိတ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၶဝ်သိမ်းလႆႈယဝ်ႉၶႃႈ တပ်ႉၸၵၸ 276 ဢၼ်ပၵ်းသဝ်းဝႆႉ တီႈႁိမ်း ဝၢၼ်ႈၼမ်ႉၶွႆႈ မိူဝ်ႈၼႆႉ ယၢမ်းၵၢင်ၼႂ်။ ယၢမ်းလဵဝ် ၶဝ်သၢမ်ၸုမ်းၼႆႉ တိုၵ်ႉၽဵဝ်ႈႁႃ မၢၵ်ႇဢၼ်ႁၢင်ႈၵၢင်ဝႆႉ ၸွမ်းတပ်ႉၼၼ်ႉယူႇၶႃႈ”- ဝႃႈၼႆ။

ဢိင်ၼိူဝ် လွင်ႈၸုမ်းဢူၺ်းလီ ၶဝ်ႈယိုတ်းလႆႈ တပ်ႉသိုၵ်းမၢၼ်ႈ ၸၵၸ 276 ၼႆႉ မိူဝ်ႈဝႃး ဝၼ်းတီႈ 7 ယၢမ်းႁူဝ်ၶမ်ႈမွၵ်ႈ 5 မူင်း ၶဝ် 3 ၸုမ်းၼႆႉ ႁူမ်ႈၵၼ် ၶဝ်ႈလေႃႇတိုၵ်း ႁၢဝ်ႈႁႅင်း။ ထိုင်မႃး ယၢမ်းၵၢင်ၶမ်ႈ မွၵ်ႈ 8 မူင်း ၶဝ်ႈလေႃႇတိုၵ်းထႅင်ႈ ၵမ်ႉၼိုင်ႈ သေ ထိုင်မႃး မိူဝ်ႈၼႆႉ ယၢမ်းၵၢင်ၼႂ် ၸင်ႇယိုတ်းလႆႈ တပ်ႉၼႆႉ။

“တပ်ႉသိုၵ်းမၢၼ်ႈ တီႈဝၢၼ်ႈၼမ်ႉၶွႆႈၼႆႉ ပဵၼ်တပ်ႉၸူဝ်ႈၶၢဝ်း မိူဝ်ႈတႄႇမၼ်း ၶဝ်တင်ႈဝႆႉ တီႈဝၢၼ်ႈမိူင်းလိူဝ်ႇၼၼ်ႉ မီးမႃးၶၢဝ်း တၢင်း 10 ပီပၢႆ ထုၵ်ႇသိုၵ်း KIA, PDF လေႃႇတိုၵ်း သိမ်းလႆႈ ၼႂ်းပီ 2023 ၼႆႉသေ ၶဝ်ၶိုၼ်းၶၢႆႉမႃးတင်ႈတပ်ႉ တီႈႁိမ်းဝၢၼ်ႈ ၼမ်ႉၶွႆႈၼႆႉထႅင်ႈ ထိုင်မႃး မိူဝ်ႈၼႆႉ ထုၵ်ႇၶဝ်သၢမ်ၸုမ်း လေႃႇတိုၵ်းထႅင်ႈလႄႈ ၸင်ႇသိမ်းလႆႈတပ်ႉၼႆႉမႃးထႅင်ႈ”- ၵူၼ်းပိုၼ်ႉတီႈ ဝဵင်းမိူင်းမိတ်ႈ သိုပ်ႇလၢတ်ႈၼႄၼင်ႇၼႆ။

ဢိင်ၼိူဝ် လွင်ႈပၢင်တိုၵ်းၼႆႉသေ လွင်ႈတုမ်ႉတိူဝ်ႉ မၢတ်ႇၸဵပ်းတင်းသွင်ၾၢႆႇတႄႉ ပႆႇႁူႉ ၵူၺ်းၵႃႈ ၸၢၵ်ႇမၢၵ်ႇ တိူဝ်ႉသႂ်ႇပလိၵ်ႈ မၢၼ်ႈ ၵႅမ်ၽူႈၵွၼ်းဝဵင်းမၢၼ်ႈပဵင်း ၵေႃႉၼိုင်ႈ တီႈၶႃမၼ်းၸၢႆး ဝႃႈၼႆ။

ဝၢၼ်ႈၼမ်ႉၶွႆႈၼႆႉ မီးဝႆႉႁိမ်းၾင်ႇၼမ်ႉမၢဝ်းလႄႈ ၼမ်ႉမိတ်ႈ ၶွႆႈၵၼ် မီးလင်ႁိူၼ်းတင်းမူတ်းမွၵ်ႈ 400 လင် တေယၢၼ် ဝဵင်းမိူင်းမိတ်ႈ မွၵ်ႈ 18 လၵ်း မီးၼႂ်းၵႄႈမၢၼ်ႈပဵင်းလႄႈ မိူင်းမိတ်ႈ။ ယဝ်ႉၵေႃႈ သဵၼ်ႈတၢင်းမိူင်းမိတ်ႈ – ဝၢၼ်ႈ ၼမ်ႉၶွႆႈ – မၢၼ်ႈပဵင်းၼႆႉ ပဵၼ်သဵၼ်ႈတၢင်းဢၼ်ၵၢႆႇၸူး တၢင်းမိူင်းၶၢင်ဝႆႉၵေႃႈၸႂ်ႈ ဝႃႈၼႆ။

လိူဝ်ၼၼ်ႉ ဝၢၼ်ႈၼမ်ႉၶွႆႈၼႆႉ တေၸမ်ပႃးထႅင်ႈ ဢွင်ႈတီႈၵေႃႇသၢင်ႈၾၢႆၾႆး (ၾၢႆၼမ်ႉမၢဝ်း) ဢၼ်သၢင်ႈဝႆႉ ပႆႇယဝ်ႉ ၼၼ်ႉ ၾၢႆၼႆႉ တေပဵၼ်ၾၢႆယႂ်ႇသေပိူၼ်ႈ ၼႂ်းမိူင်းႁူမ်ႈတုမ် မၢႆ 1 လႄႈ ယႂ်ႇထီႉ 2 ၼႂ်းၵုၼ်ဢေးသျႃးလႄႈ ယႂ်ႇတီႈသုတ်းၼႂ်းၵမ်ႇၽႃႇ ထီႉ 4 ဝႃႈၼႆ။

ၼႂ်းလိူၼ်ၵျႅၼ်ႊၼိဝ်ႊရီႊၼႆႉၵူၺ်း သိုၵ်းၶၢင် KIA, TNLA လႄႈ PDF ယိုတ်းလႆႈ တပ်ႉသိုၵ်းမၢၼ်ႈ ၼႂ်းၸႄႈဝဵင်းမိူင်းမိတ်ႈ ၼႆႉ တင်းမူတ်း 3 ဢွင်ႈတီႈယဝ်ႉ။ မိူဝ်ႈဝၼ်းတီႈ 1/1/2024 ယၢမ်းၵၢင်ၼႂ် 6 မူင်း ယိုတ်းလႆႈ တပ်ႉသိုၵ်းမၢၼ်ႈ တီႈဝၢၼ်ႈပၢတ်ႈ ။ ဝၼ်းတီႈ 5 ယၢမ်းၵၢင်ၼႂ် 5 မူင်းၶိုင်ႈ ယိုတ်းလႆႈ တီႈဝၢၼ်ႈၸၢင်ႈၵၢင်ႇလႄႈ မိူဝ်ႈၼႆႉ ဝၼ်းတီႈ 8 ယၢမ်းၵၢင်ၼႂ် ယိုတ်းလႆႈထႅင်ႈ တီႈဝၢၼ်ႈၼမ်ႉၶွႆႈၼႆႉ။