သိုၵ်းမၢၼ်ႈ လၢမ်းလိမ်း ယိုဝ်းၵွင်ႈၸၢၵ်ႈ ၵႂႃႇၵူႈႁူးၵူႈတၢင်းသေ တိူဝ်ႉသႂ်ႇႁိူၼ်းၵူၼ်းဝၢၼ်ႈ လူႉၵွႆၸွမ်း လင်ၼိုင်ႈ တီႈဝဵင်းမိူင်းမိတ်ႈ။
မိူဝ်ႈဝႃး ဝၼ်းတီႈ 6/1/2024 ယၢမ်းၵၢင်ၼႂ်ၸဝ်ႉ 12:10 မူင်း သိုၵ်းမၢၼ်ႈ တပ်ႉၶလယ 348 ယိုဝ်းၵွင်ႈၸၢၵ်ႇ ၵႂႃႇတၢင်း ဝၢၼ်ႈတူၼ်ႈၵႅင်း ဢိူင်ႇလွၵ်းလူင် ၸႄႈဝဵင်းမိူင်းမိတ်ႈ ၸိုင်ႈတႆးပွတ်းႁွင်ႇ ၼၼ်ႉသေ ႁဵတ်းႁႂ်ႈၸၢၵ်ႇမၢၵ်ႇတိူဝ်ႉသႂ်ႇႁိူၼ်း လုင်း ဢွင်ႇလႃႉ – ပႃႈၶိၼ်ႇဢွင်ႇ ၼႆယဝ်ႉ။
ၵူၼ်းပိုၼ်ႉတီႈ ဝဵင်းမိူင်းမိတ်ႈ လၢတ်ႈတီႈၽူႈတွႆႇႁွၵ်ႈဝႃႈ – “မၢၵ်ႇၵွင်ႈၸၢၵ်ႈၼၼ်ႉ တိူဝ်ႉသႂ်ႇလဵၵ်းမုင်းႁိူၼ်း ပွင်ႇၵႂႃႇ 2 တီႈ။ တိူဝ်ႉၺႃးတူႈဝႆႉၶူဝ်းၶွင် မေႃႇဝၢၼ်ႇ ၸိူဝ်းၼႆႉ လူႉလႅဝ် ၵမ်ႈၽွင်ႈ။ ယဝ်ႉၵေႃႈ ၽႃႁိူၼ်း ၸိူဝ်းၼႆႉၵေႃႈ ပွင်ႇၵႂႃႇၵမ်ႈၽွင်ႈ။ ၵၢမ်ႇလီ လႄႈ ဢမ်ႇတိူဝ်ႉၺႃးၵူၼ်းႁိူၼ်း ၵွၼ်ႇဢေႃႈ။ ထိုင်မႃး ယၢမ်းၵၢင်ၼႂ် ၵူၼ်းၼႂ်းဝၢၼ်ႈ ၵပ်းၾူၼ်းၸူးထိုင် ၽူႈယႂ်ႇၼႂ်းဢိူင်ႇ သေ ယူႇတီႈၵူၼ်းလူင်မႃးၵဵပ်းသိမ်းၵႂႃႇယဝ်ႉ ပၢႆမၢၵ်ႇၵွင်ႈ ဢၼ်မႃးတိူဝ်ႉသႂ်ႇ ႁိူၼ်းယေးၼၼ်ႉ။ မၢၵ်ႇၵွင်ႈၸၢၵ်ႈ ဢၼ်မႃးတိူဝ်ႉ သႂ်ႇႁိူၼ်းယေးၼၼ်ႉ တင်းမူတ်း 4 လုၵ်ႈ” – ဝႃႈၼႆ။
လိူဝ်ၼၼ်ႉ မၢၵ်ႇၵွင်ႈၸၢၵ်ႈ သိုၵ်းမၢၼ်ႈၼႆႉ တူၵ်းသႂ်ႇၼႂ်းဝၢင်းႁိူၼ်းယေး ၵူၼ်းဝၢၼ်ႈတူၼ်ႈၵႅင်း ထႅင်ႈသွင်လင်။ ပဵၼ် ၼႂ်းဝၢင်းႁိူၼ်း လုင်းၸၢႆးတွင်းလူႇ – ပႃႈၼၢင်းဢေးလႄႈ ႁိူၼ်းပႃႈမေႇဢေး ၼၼ်ႉတႄႉ ဢမ်ႇတိူဝ်ႉၺႃးႁိူၼ်းယေးလႄႈ ၵူၼ်း။ ၵူၺ်း ၵႃႈ တၢင်းဝၢၼ်ႈတူၼ်ႈၵႅင်းၼၼ်ႉတႄႉ ဢမ်ႇမီးပၢင်တိုၵ်း သိုၵ်းသိူဝ်သင် ဝႃႈၼႆ။
မီးၶၢဝ်ႇလိုဝ်းဢွၵ်ႇမႃးဝႃႈ သိုၵ်း KIA ၊ သိုၵ်း TNLA လႄႈ ၸုမ်းၵႅတ်ႇၶႄၵူၼ်း မိူင်း PDF တေၶဝ်ႈယိုတ်းၼႂ်းဝဵင်းၼႆသေ ယူႇတီႈ တပ်ႉသိုၵ်းမၢၼ်ႈ တီႈဝဵင်းမိူင်းမိတ်ႈၼႆႉ လုၵ်ႉတီႈၼႂ်းတပ်ႉၶဝ် ယိုဝ်းၵွင်ႈဢွၼ်ႇ၊ ၵွင်ႈလူင်၊ ပွႆႇမၢၵ်ႇၵႂႃႇ ၵူႈႁူးၵူႈတၢင်း ၼႆယဝ်ႉ။
