ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း ထႅမ်ႁႅင်းသိုၵ်း ဢိူမ်ႈၸမ်ဝဵင်းမိူင်းမိတ်ႈၼမ် ႁဵတ်းႁႂ်ႈၵူၼ်းမိူင်းမႆႈၸႂ် ၵူဝ်ပဵၼ်ပၢင်တိုၵ်း ႁၢဝ်ႈႁႅင်း။
မိူဝ်ႈဝႃး ဝၼ်းတီႈ 5/1/2024 ယၢမ်းၵၢင်ၶမ်ႈ သိုၵ်းၶၢင် KIA ၊ သိုၵ်းတဢၢင်း TNLA လႄႈ ၸုမ်းၵႅတ်ႇၶႄၵူၼ်းမိူင်း PDF ႁူမ်ႈၵၼ် ဢဵၼ်ႁႅင်းဢမ်ႇယွမ်း 600 တူင်ႉၼိုင် ၶဝ်ႈဢိူမ်ႈၸမ်ဝဵင်းမိူင်းမိတ်ႈ ၸိုင်ႈတႆးပွတ်းႁွင်ႇၼမ် တၢင်းၾၢႆႇသိုၵ်းမၢၼ်ႈ ၵေႃႈ လုၵ်ႉတၢင်းဝဵင်းလိူဝ်ႇထႅမ်ႁႅင်းသိုၵ်း ၶိုၼ်ႈမႃးမိူၼ်ၵၼ်။
ၽူႈတူင်ႉၼိုင် ၵၢၼ်သိုၵ်း ပွတ်းမိူင်းမိတ်ႈ လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းၶၢင်၊ သိုၵ်းလွႆလႄႈ PDF ၼႆႉ ၶဝ်လုၵ်ႉတၢင်း ဝၢၼ်ႈပၢတ်ႈ၊ ဝၢၼ်ႈၸၢင်ႈၵၢင်ႇ ၸိူဝ်းၼၼ်ႉမႃးႁူမ်ႈၵၼ်ထႅင်ႈသေ ယၢမ်းလဵဝ် ၶဝ်ၶဝ်ႈမႃးဢိူမ်ႈၸမ်ဝဵင်းဝႆႉ ဢဵၼ်ႁႅင်း ဢမ်ႇ ယွမ်း 600 ၼႆႉ။ ၶဝ်တေၶဝ်ႈလူမ်ႇယိုဝ်းၼႂ်းဝဵင်းႁႃႉ ဢမ်ႇၼၼ် တီႈတပ်ႉသိုၵ်းမၢၼ်ႈ ၶလယ 348 – 276 လႄႈ 223 ၸိူဝ်းၼၼ်ႉႁႃႉၵေႃႈ ဢမ်ႇႁူႉ။ ယၢမ်းလဵဝ် ၸွမ်းတၢင်းၼႂ်းၵၢင်ဝဵင်းမိူင်းမိတ်ႈ ၸိူဝ်းၼႆႉ ယဵၼ်သီႇမူတ်း”- ဝႃႈၼႆ။
ယၢမ်းလဵဝ် တၢင်းၾၢႆႇတပ်ႉသိုၵ်းမၢၼ်ႈၵေႃႈ လုၵ်ႉတၢင်းဝဵင်းလိူဝ်ႇသေ ထႅမ်ႁႅင်းသိုၵ်းၶိုၼ်ႈမႃးတၢင်းမိူင်းမိတ်ႈၼႆႉ တင်းၼမ် မိူၼ်ၵၼ် ဝႃႈၼႆ။
ၵူၼ်းပိုၼ်ႉတီႈ ဝဵင်းမိူင်းမိတ်ႈ လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းမၢၼ်ႈ ထႅမ်ႁႅင်းသိုၵ်း လုၵ်ႉဝဵင်းလိူဝ်ႇၶိုၼ်ႈမႃးၼႆႉ ဢမ်ႇယွမ်း 50 ယဝ်ႉ ၶဝ်ၽႄၵၼ်သေ ဢဝ်တီႈယူႇဝႆႉ ၸွမ်းႁူင်းႁဵၼ်းလူင်ပွင်ၸိုင်ႈ ၸိူဝ်းၼႆႉသေ ယဝ်ႉၵေႃႈ တင်ႈၵွင်ႈလူင်ၶဝ်ဝႆႉ။ သင် ပဵၼ် ပၢင်တိုၵ်းၵၼ်မႃးတႄႉ တီႈဝဵင်းမိူင်းမိတ်ႈၼႆႉ တေပဵၼ်ႁႅင်းတီႈသုတ်းယဝ်ႉ။ ယွၼ်ႉဝႃႈ တၢင်းသၢႆၼႆႉသမ်ႉ သိုၵ်းမၢၼ်ႈၶဝ် ထႅမ်ႁႅင်းသိုၵ်းမႃးငၢႆႈ လုၵ်ႉတၢင်းဝဵင်းလိူဝ်ႇၶိုၼ်ႈမႃးၵေႃႈ ၽႅဝ်ယဝ်ႉ ဢမ်ႇဝႃႈ တၢင်းသၢႆလိၼ်၊ သၢႆၵၢင်ႁၢဝ် ၸိူဝ်းၼႆႉ။ တေႃႈ ၼင်ႇ သိုၵ်းၶၢင်သိုၵ်းလွႆၶဝ် ၶိုၼ်ႈတိုၵ်းဢဝ်တပ်ႉဢွၼ်ၶဝ် တီႈဝၢၼ်ႈပၢတ်ႈ၊ ဝၢၼ်ႈၸၢင်ႈၵၢင်ႇ ၼၼ်ႉၵူၺ်း ၶဝ်ပေႃးဢဝ်ၶိူင်ႈ မိၼ်မႃးပွႆႇမၢၵ်ႇၸွႆႈယဝ်ႉ”- ဝႃႈၼႆ။
ၼႂ်းၶၢဝ်းတၢင်း ဝၼ်းသွင်ဝၼ်းမႃးၼႆႉ ၵူၼ်းဝဵင်းမိူင်းမိတ်ႈ ဢွၼ်ၵၼ် ႁႅၼ်းၶူဝ်းသေ ငိူင်ႉပၢႆႈၸူး ဝဵင်းလိူဝ်ႇ (မၼ်းတလေး) ဝႆႉ ၵမ်ႈၼမ်ယဝ်ႉ။ မိူၼ်ၼင်ႇ ႁၢၼ်ႉၶၢႆၶူဝ်းၵုၼ်ႇ ၶွင်ၵိၼ်ယႅမ်ႉ ၸွမ်းၵၢင်ဝဵင်း ၸိူဝ်းၼႆႉၵေႃႈ ထုၵ်ႇပိၵ်ႉဝႆႉတင်းၼမ် ယဝ်ႉၵေႃႈ ၵၢတ်ႇ လူင် ၸိူဝ်းၼႆႉထႅင်ႈ တေႃႉတႄႉမီး ၵၢတ်ႇၽၵ်းၶဵဝ်/ ၼိူဝ်ႉပႃ ဢိတ်းဢွတ်းၵူၺ်း တိုၵ်ႉပိုတ်ႇၶၢႆ ဝႃႈၼႆ။
မိူဝ်ႈၶမ်ႈဝႃး ဝၼ်းတီႈ 5 ၼႆႉ ယူႇတီႇတပ်ႉသိုၵ်းမၢၼ်ႈ ဢၼ်ပၵ်းဝႆႉ တီႈၼႂ်းဝဵင်းမိူင်းမိတ်ႈၼႆႉသေ ယိုဝ်းၵွင်ႈလူင်ၵႂႃႇတၢင်း ဝၢၼ်ႈၸၢင်ႈၵၢင်ႇမွၵ်ႈ 3 လုၵ်ႈ။ လိူဝ်ၼၼ်ႉ တၢင်းမိူင်းၵုတ်ႈၵေႃႈ ယိုဝ်းၵႂႃႇ တူၵ်းၸွမ်းသၼ်လွႆ ၸိူဝ်းၼၼ်ႉထႅင်ႈ တင်းၼမ် ႁဵတ်းႁႂ်ႈၵူၼ်းမိူင်းမိတ်ႈ ဢွၼ်ၵၼ်တူၵ်းၸႂ်ၵူဝ် ဢမ်ႇလႆႈၼွၼ်းလပ်းလီ ၼႆယဝ်ႉ။
