မိူဝ်ႈၼႆႉ ဝၼ်းတီႈ 5/1/2024 ယၢမ်းၵၢင်ၼႂ် 5 မူင်းၶိုင်ႈ သိုၵ်းတဢၢင်း TNLA ဢဵၼ်ႁႅင်း 70 ၵေႃႉ ယိုတ်းလႆႈ တပ်ႉပၢင်သဝ်း သိုၵ်းမၢၼ်ႈ တီႈဝၢၼ်ႈၸၢင်ႈၵၢင်ႇ ဢိူင်ႇသၢႆးလႅင် ၸႄႈဝဵင်းမိူင်းမိတ်ႈ ၸိုင်ႈတႆးပွတ်းႁွင်ႇ ယွၼ်ႉသိုၵ်းမၢၼ်ႈ ထွႆထွၼ်ပၼ် ၼႆယဝ်ႉ။
ၽူႈတူင်ႉၼိုင် ၵၢၼ်သိုၵ်း ပွတ်းမိူင်းမိတ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်သိုၵ်းလွႆ ႁုပ်ႈသိမ်းလႆႈၶႃႈဢေႃႈ။ တီႈတပ်ႉပၢင် သဝ်းသိုၵ်းမၢၼ်ႈ ဝၢၼ်ႈၸၢင်ႈၵၢင်ႇၼၼ်ႉ ဢဵၼ်ႁႅင်းသိုၵ်းၶဝ် တေမီး 70 ၵေႃႉသေ ၶိုၼ်ႈလေႃႇတိုၵ်း။ ဢဵၼ်ႁႅင်းသိုၵ်းမၢၼ်ႈ သမ်ႉ မီး 10 ပၢႆ ။ ယွၼ်ႉဢဵၼ်ႁႅင်းဢမ်ႇငၢမ်ႇၵၼ်သေ ၾၢႆႇသိုၵ်းမၢၼ်ႈ ထွႆပၼ် ၸဵမ်မိူဝ်ႈၶမ်ႈဝႃး ဝၼ်းတီႈ 4 ယၢမ်းၵၢင်ၶိုၼ်း 11 မူင်း ၼၼ်ႉယဝ်ႉ။ မိူဝ်ႈၼႆႉ ၵၢင်ၼႂ်ၸဵမ်ၸဝ်ႉ သဵင်ၵွင်ႈတႅၵ်ႇထႅင်ႈၵမ်ႉၼိုင်ႈ ၵူၺ်းၵႃႈ ပဵၼ်သိုၵ်းလွႆၶဝ် ယိုဝ်းၾၢႆႇလဵဝ်ၵူၺ်း”- ဝႃႈၼႆ။
ပၢင်တိုၵ်း တီႈဝၢၼ်ႈၸၢင်ႈၵၢင်ႇၼႆႉ ပဵၼ်သိုၵ်းမၢၼ်ႈတင်း သိုၵ်းတဢၢင်း TNLA ပိုတ်းယိုဝ်းၵၼ်ၵူၺ်း ပၢင်တိုၵ်းၼႆႉ တႄႇ ပဵၼ်မႃး မိူဝ်ႈဝၼ်းတီႈ 3 ၼႆႉ ဝႃႈၼႆ။
“ပၢင်တိုၵ်း တီႈဝၢၼ်ႈၸၢင်ႈၵၢင်ႇၼႆႉ ၾၢႆႇသိုၵ်းမၢၼ်ႈတႄႉ ဢမ်ႇလႆႈမၢတ်ႇၸဵပ်းလူႉတၢႆသင် ၵူၺ်းၵႃႈ တၢင်းၾၢႆႇသိုၵ်းလွႆၶဝ် တႄႉ ဢမ်ႇလႆႈႁူႉၶႃႈ လွင်ႈမၢတ်ႇၸဵပ်းလူႉတၢႆၶဝ်။ လႆႈႁူႉမႃးဝႃႈ သိုၵ်းၶၢင်၊ သိုၵ်းလွႆလႄႈ သိုၵ်းၵူၼ်းမိူင်း PDF ၼႆႉ ၶဝ်ၽႄ ပုၼ်ႈၽွၼ်းၵၼ်သေ ၶဝ်ႈယိုဝ်း။ တီႈတပ်ႉဝၢၼ်ႈပၢတ်ႈၼၼ်ႉ ပဵၼ်ပုၼ်ႈၽွၼ်းသိုၵ်းၶၢင်တင်း PDF ၼၼ်ႉတႄႉ ၶဝ်သိမ်းလႆႈ မိူဝ်ႈဝၼ်းတီႈ 1 ၼႆႉ ။ တီႈတပ်ႉဝၢၼ်ႈၸၢင်ႈၵၢင်ႇၼႆႉသမ်ႉ ပဵၼ်ပုၼ်ႈၽွၼ်းသိုၵ်းလွႆၼႆ ၶႃႈဢေႃႈ”- ၽူႈတူင်ႉၼိုင် ၵၢၼ်သိုၵ်း ပွတ်းမိူင်းမိတ်ႈ သိုပ်ႇလၢတ်ႈၼႄၼင်ႇၼႆ။
ဢိင်ၼိူဝ်လွင်ႈ သိုၵ်းတဢၢင်း ယိုတ်းလႆႈ တပ်ႉပၢင်သဝ်းသိုၵ်းမၢၼ်ႈ တီႈဝၢၼ်ႈၸၢင်ႈၵၢင်ႇၼႆႉ ယူႇတီႈ ႁွင်ႈၵၢၼ်ပိုၼ်ၽၢဝ်ႇ တပ်ႉသိုၵ်း TNLA ဢွၵ်ႇဝႆႉဝႃႈ ယိုတ်းလႆႈတပ်ႉသိုၵ်းမၢၼ်ႈ ၸၵၶ 21 လႄႈ ၶလယ 223 ယဝ်ႉ။ လိူဝ်ၼၼ်ႉ ယိုတ်းလႆႈပႃးၶိူင်ႈ ၵွင်ႈၵၢင်ႇလႄႈ မၢၵ်ႇမိုဝ်ႉၸိုၼ်းယမ်းထႅင်ႈ ဝႃႈၼႆ။
မိူဝ်ႈၽွင်းပဵၼ်ပၢင်တိုၵ်းၼၼ်ႉ ၾၢႆႇတပ်ႉသိုၵ်းမၢၼ်ႈ ယူႇတီႈၼႂ်းဝဵင်းမိူင်းမိတ်ႈသေ ယိုဝ်းၵွင်ႈလူင်ၸွႆႈ 17 ၵမ်း ယဝ်ႉၵေႃႈ ၸႂ်ႉ ၶိူင်ႈမိၼ်တိုၵ်း Jet Fighter မႃးယိုဝ်းၸွႆႈထႅင်ႈ 2 လမ်း ဝႃႈၼႆ။
လိူဝ်ၼၼ်ႉ မီးၶၢဝ်ႇလိုဝ်းဢွၵ်ႇမႃးဝႃႈ သိုၵ်း KIA ၊ သိုၵ်း TNLA လႄႈ ၸုမ်းၵႅတ်ႇၶႄၵူၼ်းမိူင်း PDF တေႁူမ်ႈၵၼ် လေႃႇတိုၵ်း တပ်ႉသိုၵ်းမၢၼ်ႈ ၼႂ်းဝဵင်းမိူင်းမိတ်ႈထႅင်ႈ ဢိင်ၼိူဝ် လွင်ႈၼႆႉသေ ယၢမ်းလဵဝ် ၵူၼ်းမိူင်းမိတ်ႈ ၵမ်ႈၼမ် ဢွၼ်ၵၼ် ႁႅၼ်း ၶူဝ်း ငိူင်ႉပၢႆႈလူင်းၵႂႃႇတၢင်းဝဵင်းလိူဝ်ႇ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ