သိုၵ်းမၢၼ်ႈ လၢမ်းလိမ်းယိုဝ်းၵွင်ႈလူင် တီႈဝဵင်းလႃႈသဵဝ်ႈ

သိုၵ်းမၢၼ်ႈ ယိုတ်းမိူင်း လၢမ်းလိမ်းယိုဝ်းၵွင်ႈလူင် တီႈဝဵင်းလႃႈသဵဝ်ႈ ႁဵတ်းႁႂ်ႈၵူၼ်းမိူင်းမႆႈၸႂ် ၵူဝ်ပဵၼ်ပၢင်တိုၵ်း ႁၢဝ်ႈႁႅင်း ဝႃႈၼႆ။

ဝၼ်းတီႈ 20/12/2023 ယၢမ်းၵၢင်ၶိုၼ်းမွၵ်ႈ 11 မူင်း သိုၵ်းမၢၼ်ႈ ယိုတ်းမိူင်း ယူႇတီႈ ၼႂ်းတိူင်းသိုၵ်းၶဝ်သေ ယိုဝ်းၵွင်ႈလူင် ၵႂႃႇတၢင်းၸဵင်ႇႁွင်ႇဝၼ်းတူၵ်း ဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ 2 လုၵ်ႈ ယွၼ်ႉတၢင်းပွတ်းတွၼ်ႈၼၼ်ႉ မီးဝႆႉ သိုၵ်းတဢၢင်း TNLA တူင်ႉၼိုင်ယူႇဝႆႉ ဝႃႈၼႆ။

ၵူၼ်းပိုၼ်ႉတီႈ ဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်သိုၵ်းမၢၼ်ႈ ယိုဝ်းၶႃႈဢေႃႈ ၶဝ်ယိုဝ်းမၢၵ်ႇလူင် လုၵ်ႉတီႈၼႂ်း တပ်ႉလူင် (တိူင်းသိုၵ်း) ၶဝ်ၼၼ်ႉသေ ယိုဝ်းမႃးတၢင်းၸဵင်ႇႁွင်ႇဝၼ်းတူၵ်း ဢီႇၼၢႆးၼႆႉၶႃႈဢေႃႈ။ ယွၼ်ႉဝႃႈ တၢင်းၼႆႉသမ်ႉ မီးဝႆႉ သိုၵ်းလွႆၶဝ် တူင်ႉၼိုင်ဝႆႉၶႃႈဢေႃႈ”- ဝႃႈၼႆ။

ဢိင်ၼိူဝ် လွင်ႈသိုၵ်းမၢၼ်ႈ ယိုဝ်းမၢၵ်ႇလူင်မႃးတၢင်း ဝၢၼ်ႈဢီႇၼၢႆးၼႆႉ ဢမ်ႇၸႂ်ႈ ယၢမ်းၵၢင်ၶမ်ႈၵၢင်ၶိုၼ်းၼႆႉၵူၺ်း တေႃႈၼင်ႇ ၵၢင်ဝၼ်း ၸိူဝ်းၼႆႉၵေႃႈ ၵႆႉယိုဝ်းမၢၵ်ႇလူင်မႃးယူႇ ဝႃႈၼႆ။

“မိူဝ်ႈၶမ်ႈဝၼ်းတီႈ 20 ယၢမ်းၵၢင်ၶိုၼ်းၼႆႉ ၵွင်ႈလူင်ၶဝ် ယိုဝ်းဢွၵ်ႇမႃး 2 လုၵ်ႈ သဵင်ၵွင်ႈၶဝ် ႁႅင်းဝႃႈႁႅင်းၼၼ်ႉယဝ်ႉ။ ႁဝ်းၶႃႈ ပေႃးတူၵ်းၸႂ် ၶႃႈဢေႃႈ။ ဢၼ်ၶဝ်ယိုဝ်းမၢၵ်ႇလူင်ဢွၵ်ႇမႃးၸိူင်ႉၼႆ ဢမ်ႇၸႂ်ႈၵၢင်ၶိုၼ်းၵူၺ်း ၶဝ်ယိုဝ်း တေႃႈၼင်ႇ ၵၢင်ဝၼ်း ၵေႃႈ ၶဝ်ယိုဝ်းဢေႃႈ”- ၵူၼ်းပိုၼ်ႉတီႈ ဝဵင်းလႃႈသဵဝ်ႈ သိုပ်ႇလၢတ်ႈၼႄၼင်ႇၼႆ။

ယၢမ်းလဵဝ် တီႈဝဵင်းလႃႈသဵဝ်ႈၼႆႉ မီးဝႆႉ ၵူၼ်းပၢႆႈၽေးသိုၵ်းၼပ်ႉႁဵင် တေမီးတီႈၵျွင်းမၢၼ်ႈသူႈလႄႈ ၵျွင်းၶရိတ်ႉယၢၼ်ႇ ယဝ်ႉၵေႃႈ ၸွမ်းသၢပ်ႇဝဵင်းထႅင်ႈ ၵမ်ႈၼမ် တေပဵၼ်ၵူၼ်းတၢင်းဝဵင်းသႅၼ်ဝီလႄႈ လၢဝ်ႇၵၢႆး ၸိူဝ်းၼႆႉ။

ၸွမ်းၼင်ႇ ၽႅၼ်ၵၢၼ် 1027 ၸုမ်းဢူၺ်းလီ ပွတ်းႁွင်ႇ 3 ၸုမ်းၼႆႉ ႁႅၼ်းသိုၵ်းလေႃႇတိုၵ်း တပ်ႉသိုၵ်းမၢၼ်ႈ ယိုတ်းမိူင်း မႃး ႁၢဝ်ႈႁႅင်း ၼႂ်းၸိုင်ႈတႆးပွတ်းႁွင်ႇ ႁဵတ်းႁႂ်ႈၵူၼ်းမိူင်း ဢွၼ်ၵၼ်ပၢႆႈၽေးသိုၵ်း ၼပ်ႉမိုၼ်ႇလႄႈ လူႉတၢႆမၢတ်ႇၸဵပ်းၸွမ်းထႅင်ႈၼမ် ၼႆယဝ်ႉ။