ၸုမ်းၵူၼ်းၼုမ်ႇတႆး ဝဵင်းလႃႈသဵဝ်ႈ ႁူမ်ႈတင်းလၢႆၸုမ်းၼႂ်းပိုၼ်ႉတီႈ ဢွၼ်ၵၼ်ၵႂႃႇၸွႆႈထႅမ် ၶဝ်ႈၼမ်ႉတၢင်းၵိၼ် ၵူၼ်းထူပ်းၽေး ၼႂ်းဝဵင်းၼမ်ႉတူႈ။

ဝၼ်းတီႈ 8/5/2018 ၸုမ်းၵူၼ်းၼုမ်ႇတႆး TYO ၸႄႈဝဵင်းလႃႈသဵဝ်ႈ၊ ၸုမ်း NRC ၊ မဵတ်ႉတႃႇ ၽွင်ႊၻေႊသျိၼ်ႊ ၸိူဝ်းၼႆႉႁူမ်ႈၵၼ် ဢဵၼ်ႁႅင်း 20 ပၢႆ ဢွၼ်ၵၼ်ၵႂႃႇၸွႆႈထႅမ်ၶဝ်ႈၼမ်ႉတၢင်းၵိၼ်ၵူၼ်းပၢႆႈၽေး ဢၼ်မႃးမီးဝႆႉယူႇတီႈဝတ်ႉမိူင်းၼၼ်ႈ၊ ပၢင်ႇၶမ်းလႄႈ မိူင်းယဵၼ် ဢၼ်မီးၼႂ်းၸႄႈဝဵင်းၼမ်ႉတူႈ ၸႄႈတွၼ်ႈၵျွၵ်ႉမႄး။

ၸၢႆးႁၢၼ် ႁူဝ်ၼႃႈၸုမ်းၵူၼ်းၼုမ်ႇတႆး TYO လႃႈသဵဝ်ႈ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ ဢၼ်ႁဝ်းၶႃႈလႆႈ ၵႂႃႇၸွႆႈပၼ်ၼႆႉ တေမီးမိူၼ်ၼင်ႇ ၼမ်ႉမၼ်း ၊ ၵိူဝ်၊ ၽွင်ဝၢၼ်၊ ၽၵ်းယိူဝ်ႈၼၢင်းၶဵဝ် ဢိၵ်ႇၶွင်ၸႂ်ႉၼၢင်းယိင်းၸိူဝ်း ၼႆႉ ၊ ပေႃးမီးပၢင်တိုၵ်းမိူဝ်ႈလႂ်ၵေႃႈ ၵူၼ်းမိူင်းလႆႈၶၢမ်ႇၸၢၵ်ႇမၼ်းယူႇတႃႇသေႇ ၶဝ်ႈၼမ်ႉသမ်ႉယွၼ်းၵိၼ်ၵူၼ်းမိူင်း ၸိူဝ်းၶဝ်ထုၵ်ႇလီ ႁူႉၵုင်ႇၵူၼ်းမိူင်းသေ ၶတ်းသၢင်ႈႁၢင်ႈပွင် ပူၵ်းပွင်ပိုၼ်ႉတီႈ ၶိုၼ်ႈယႂ်ႇၶႃႈဢေႃႈ ဢမ်ႇၸႂ်ႈႁဵတ်း ႁႂ်ႈၵူၼ်းမိူင်းယၢပ်ႇၸႂ် ၸိူင်ႉၼႆယူႇတိၵ်းတိၵ်း ” ဝႃႈၼႆ

ဝၢႆးသိုၵ်း TNLA ႁႅၼ်း သိုၵ်းၶိုၼ်ႈတိုၵ်း တပ်ႉၸူဝ်ႈၶၢဝ်းၶွင် SSPP ယဝ်ႉ ၶၢဝ်းတၢင်း 3-4 ဝၼ်းၼႆႉ သွင်ၾၢႆႇပဵၼ် ပၢင်တိုၵ်းၵၼ်လၢႆၵမ်း ၵူၼ်းဝၢၼ်ႈသႃႇဢွၼ်ႇ၊ ဝၢၼ်ႈသႃႇလူင်၊ ဝၢၼ်ႈၵုင်းမူင်ႈ၊ ဝၢၼ်ႈဢၢႆႇ – ၵူၼ်းမိူင်း 700 ပၢႆ လႆႈပၢႆႈၽၢတ်ႇယၢၼ်ႁိူၼ်းယေးတီႈယူႇ မႃးသွၼ်ႈတူဝ်ယူႇဝႆႉတီႈ ၵျွင်းမိူင်းယဵၼ်၊ ပၢင်ႇၶမ်း၊ မိူင်းၼၼ်ႈ ၸိူဝ်းၼႆႉ ။

ယွၼ်ႉပၢင်တိုၵ်းသေ မၢၵ်ႇလူင်တူၵ်းသႂ်ႇႁိူၼ်းၵူၼ်းဝၢၼ်ႈသႃႇဢွၼ်ႇ ႁိူၼ်းလုင်းၸၢႆးလူႉၵွႆၼမ်၊ တူဝ်လုင်းၸၢႆးၵေႃႈတိူဝ်ႉၸၢၵ်ႇမၢၵ်ႇ လႆႈသူင်ႇယႃတူဝ် ဝဵင်းလႃႈသဵဝ်ႈ။ လိူဝ်ၼၼ်ႉ ၵူၼ်းဝၢၼ်ႈ ၽူႈယိင်းၵေႃႉၼိုင်ႈၵေႃႈ တိူဝ်ႉမၢတ်ႇလႄႈလႆႈသူင်ႇယူတ်းယႃတီႈ ႁူင်းယႃၼမ်ႉတူႈဝႆႉ ဝႃႈၼႆ။ သိုၵ်း TNLA တင်း SSPP ၼႆႉပဵၼ်ဢူၺ်းလီၵၼ်မႃးၸဵမ်လ်ႂသေဢမ်ႇၵႃး ၶဝ်ႈပႃးပဵၼ်လုၵ်ႈၸုမ်း FPNCC ဢၼ် UWSA ဢွၼ်ႁူဝ်ဝႆႉၼၼ်ႉ တင်းသွင်ၸုမ်း။