ၶၢဝ်းတၢင်းသိုၵ်းမၢၼ်ႈ လႆႈပိုတ်းယိုဝ်းၸုမ်းလုၵ်ႉၽိုၼ်ႉလၢႆၸုမ်းမႃးၶိူဝ်းယႂ်းၼႆႉ သိုၵ်းမၢၼ်ႈတင်ႈၸႂ် ပွႆႇလုၵ်ႈသိုၵ်းၶဝ် ၸိူဝ်းတူၵ်းၶွၵ်ႈဝႆႉၸိူဝ်းၼၼ်ႉသေ ၶိုၼ်းသင်ႇၸႂ်ႉၼႂ်းၵၢၼ်သိုၵ်းၶိုၼ်းဝႃႈၼႆ။

ၼႂ်းႁူဝ်လိူၼ်တီႊသိမ်ႊပိူဝ်ႊ ပီ 2023 ဝၼ်းတီႈ 7 ၼႆႉ ၶွင်ႇသီႇသိုၵ်းမၢၼ်ႈ ပွႆႇလုၵ်ႈသိုၵ်းၸိူဝ်းတူၵ်းၶွၵ်ႈဝႆႉၸိူဝ်းၼၼ်ႉ ဢမ်ႇယွမ်း ၼပ်ႉႁူဝ်ပၢၵ်ႇ  ထိုင်မိူဝ်ႈလဵဝ် ဝႂ်ယိုၼ်ယၼ်ပူတ်းပွႆႇဢွၵ်ႇၶွၵ်ႈၵေႃႈ ဢမ်ႇပၼ် ၊ ၵူၼ်းႁူမ်ႈႁိူၼ်းလုၵ်ႈသိုၵ်းၸိူဝ်းၼၼ်ႉၵေႃႈ ပႆႇလႆႈႁူပ်ႉထူပ်း ၼႆယဝ်ႉ။

ၵူၼ်းႁူမ်ႈႁိူၼ်းလုၵ်ႈသိုၵ်းပူၼ်ႉတူတ်ႈၶွၵ်ႈၵေႃႉၼိုင်ႈလၢတ်ႈတီႈသိုဝ်ႇၶၢဝ်ႇ DVB ဝႃႈ – “ ၶဝ်လၢတ်ႈဝႃႈတႄႉ ပွႆႇလုၵ်ႈသိုၵ်းၸိူဝ်းၼႆႉဢွၵ်ႇၶွၵ်ႈဝႃႈၼႆ ။ တီႈတေႉမၼ်းၵေႃႈ ၶဝ်တေၸႂ်ႉၵႂႃႇႁၢပ်ႇၵၢၼ်ၶိုၼ်းၼႆၶႃႈဝႃႈ။ လုၵ်ႈသိုၵ်းဢၼ်ပူၼ်ႉပႅၼ်ပိူင်သိုၵ်းၶဝ်သေတူၵ်းၶွၵ်ႈဝႆႉၶၢဝ်းယၢဝ်းၸိူဝ်းၼၼ်ႉသမ်ႉ ဢမ်ႇပွႆႇလွတ်ႈ။ ၶဝ်ပွႆႇလွတ်ႈ ၵူၼ်းဢၼ်ယၢမ်ႈပၢႆႈဢွၵ်ႇသိုၵ်းၸိူဝ်းၼၼ်ႉၵူၺ်း ” – ဝႃႈၼႆ။

လုၵ်ႈသိုၵ်းမၢၼ်ႈ ၸိူဝ်းထုၵ်ႇပူတ်းပွႆႇၸိူဝ်းၼႆႉ လွတ်ႈဢွၵ်ႇၶွၵ်ႈယဝ်ႉသေတႃႉ တၵ်းလႆႈႁၢပ်ႇၵၢၼ်သိုၵ်း တႅၼ်းၶိုၼ်းၶၢဝ်းယၢမ်း ၸွမ်းၼင်ႇတၢမ်ႇၶွၵ်ႈမီးဝႆႉ။

ၵူၼ်းႁူမ်ႈႁိူၼ်းလုၵ်ႈသိုၵ်းၵေႃႉၼိုင်ႈလၢတ်ႈတီႈသိုဝ်ႇၶၢဝ်ႇ DVB ဝႃႈ – “ ၶဝ်လွတ်ႈဢွၵ်ႇၶွၵ်ႈမႃး ဝႃႈၼႆသေတႃႉၵေႃႈ လုၵ်ႈသိုၵ်းၸိူဝ်းၺႃးဝႆႉတၢမ်ႇၶွၵ်ႈ 3 ပီၵေႃႈ တေၶိုၼ်းလႆႈ ႁၢပ်ႇၵၢၼ်သိုၵ်းၶိုၼ်း 3 ပီ ။ ပေႃးတၢမ်ႇၶွၵ်ႈ 5 ပီၵေႃႈ တေလႆႈႁၢပ်ႇၵၢၼ်သိုၵ်းၶိုၼ်း 5 ပီ ၼႆဢေႃႈ ။ ယူႇၼႂ်းၶွၵ်ႈၵေႃႈ ဢမ်ႇလႆႈ သမ်ႉဝႃႈ တိုၼ်းတေလႆႈႁဵတ်းသိုၵ်းၼႆဢေႃႈ ။ မၢင်ၵေႃႉ ဢမ်ႇၶႂ်ႈၵႂႃႇပေႃးႁႆႈၵေႃႈမီးၼႆဢေႃႈ ။ ၶဝ်ဢဝ်သႂ်ႇၵႃး သမ်ႉပၢႆဢဝ် ၽႃႈယၢင်ပိၵ်ႉတၼ်သေ တၢင်ႇဢွၵ်ႇၵႂႃႇၼႆႉဢေႃႈ ” – ဝႃႈၼႆ။

လုၵ်ႈသိုၵ်းမၢၼ်ႈ ၸိူဝ်းထုၵ်ႇပွႆႇဢွၵ်ႇၶွၵ်ႈၸိူဝ်းၼႆႉ ၺႃးသူင်ႇတူဝ်ၵႂႃႇ ၼႂ်းတပ်ႉမ 66 ၵမ်းသိုဝ်ႈ ၊ လုၵ်ႈသိုၵ်း ၸိူဝ်းတုမ်ႉတွပ်ႇထဵင်ၶိုၼ်းၸိူဝ်းၼၼ်ႉၵေႃႈ ၺႃးပေႃႉထုပ်ႉ ၼႆၽူႈၸမ်ၸႂ်သိုၵ်းမၢၼ်ႈလတွပ်ႇလၢတ်ႈဝႆႉတီႈသိုဝ်ႇၶၢဝ်ႇယႂ်ႇမၢၼ်ႈလၢႆလၢႆဢၼ်ဝႆႉၼင်ႇၼႆ။

ၵူၼ်းထုၵ်ႇလွတ်ႈဢွၵ်ႇၶွၵ်ႇတီႈတိူင်းပႃႇၵိူဝ်ၵေႃႉၼိုင်ႈလၢတ်ႈတီႈသိုဝ်ႇၶၢဝ်ႇဝႃႈ – “ သိုၵ်းမၢင်ၵေႃႉ ယွၼ်ႉဢမ်ႇၶႂ်ႈ ႁဵတ်း သိုၵ်းလႄႈ ၸင်ႇပၢႆႈဢွၵ်ႇသေ ၸင်ႇၶၢမ်ႇတူၵ်းၶွၵ်ႈၸိူင်ႉၼႆၼၼ်ႉၼႃႇၼေႃႈ။ ၵမ်းၼႆႉသမ်ႉ တဵၵ်းမႃးၸႂ်ႉႁႂ်ႈသိုၵ်း တူၵ်းၶွၵ်ႈၸိူဝ်းၼႆႉ ၵႂႃႇႁၢပ်ႇၵၢၼ်သိုၵ်းၶိုၼ်းၼႆ  ၵမ်ႈၼမ်ဢမ်ႇၶႂ်ႈၵႂႃႇ တုမ်ႉတွပ်ႇထဵင်ၶိုၼ်းလႄႈ ၺႃးထုပ်ႉပေႃး ၼႂ်းၶွၵ်ႈၵေႃႈမီးဢေႃႈ ” – ဝႃႈၼႆ။

ၼႂ်းပိူင်သိုၵ်းတပ်ႉမတေႃႇသိုၵ်းမၢၼ်ႈ ဢႅၵ်ႉဢုပတေႇ မၢႆ 37 ၼၼ်ႉပႃးဝႆႉဝႃႈ – လုၵ်ႈသိုၵ်းၵေႃႉၼိုင်ႈ ပေႃးၺႃးတူၵ်းၶွၵ်ႈယဝ်ႉ တိုၼ်းၶဝ်ႈပႃးၼႂ်း သဵၼ်ႈၸိုဝ်ႈလူႉ(Black list) သေ ထုၵ်ႇပူတ်းဢွၵ်ႇၵၢၼ်သိုၵ်း တေႃႇၸူဝ်ႈယဝ်ႉ ။ ၸိူဝ်းၺႃးတူတ်ႈတၢမ်ႇၶွၵ်ႈဝႆႉၼၼ်ႉၵေႃႈ မီးၸွမ်ၸိုင်ႈၵေႃႉလဵဝ်ၵူၺ်း ဢၼ်တေပူတ်းပွႆႇပၼ်တူတ်ႈတၢမ်ႇၶွၵ်ႈလႆႈၶိုၼ်း- ဝႃႈၼႆဝႆႉ။

ၵူၺ်းၵႃႈ မိူဝ်ႈလဵဝ်တႄႉ ယူႇတီႈၶွင်ႇသီႇသိုၵ်းမၢၼ်ႈယိုတ်းမိူင်းတႄႉ ဢမ်ႇၸွမ်းပိူင်သိုၵ်းၶဝ်သေဢမ်ႇၵႃး ပၢႆယႃႉပိူင်သိုၵ်းၶဝ်ၶိုၼ်းလူးၵွၼ်ႇ – ၼႆၽူႈလူင်ႉလႅၼ်ႇပၵ်းပိူင်မၢႆမီႈၵေႃႉၼိုင်ႈ လၢတ်ႈၼႄၼင်ႇၼႆ။

လုၵ်ႈသိုၵ်းၸိူဝ်းထုၵ်ႇပွႆႇဢွၵ်ႇၶွၵ်ႈ ၼႂ်းဝၼ်းတီႈ 7/12/2023 ၼႆႉ ႁူဝ်ၵူၼ်းတင်းသဵင်ႈမီးၵႃႈႁိုဝ် ၊ သူင်ႇတူဝ်ၵႂႃႇတၢင်းလႂ်ၼႆၼၼ်ႉ ထိုင်မိူဝ်ႈလဵဝ် ၾၢႆႇၶွင်ႇသီႇသိုၵ်းမၢၼ်ႈယိုတ်းမိူင်း ပႆႇပိုၼ်ၽၢဝ်ႇလၢတ်ႈပဵၼ်တၢင်းၵၢၼ်။

ၵဵဝ်ႇလူၺ်ႈလွင်ႈၼႆႉ မီးၶၢဝ်ႇလိုဝ်းဢွၵ်ႇမႃးဝႃႈ လုၵ်ႈသိုၵ်းၸိူဝ်းၺႃးတၢမ်ႇၶွၵ်ႈဝႆႉပီယၢဝ်းၶၢဝ်းႁိုင်ၸိူဝ်းၼၼ်ႉ ထုၵ်ႇပွႆႇလွတ်ႈဢွၵ်ႇၶိုၼ်းလၢႆတီႈ မိူၼ်ၼင်ႇ တီႉမိူင်းၸိတ်ႉတူၺ်ႇ 100 ၵေႃႉ ၊ တီႇဝဵင်းပျီႇ 39 ၵေႃႉ ၊ တီႈၶွၵ်ႈပွင်းတီႇ ၼႂ်းတိူင်းပႃႇၵိူဝ် 17 ၵေႃႉ လိူဝ်ၼၼ်ႉ ၶွၵ်ႈတၢင်ႇၸႄႈတိူင်းၸႄႈမိူင်းတႄႉ ပႆႇၸၢင်ႈယိုၼ်ယၼ်ႁူဝ်ၼပ်ႉ။