သိုၵ်းမၢၼ်ႈၵူတ်ႇထတ်းႁႅင်းတီႈလႃႈသဵဝ်ႈ ၵူၼ်းပၢႆႈၽေးၶဝ်ႈၸူးဝဵင်းယၢပ်ႇ ရူတ်ႉၵႃးၶမ်ပဵၼ်ထႅဝ်

ႁၢင်လိူၼ်ၼူဝ်ႊဝႅမ်ႊပိူဝ်ႊ 2023 ၼႆႉ ၵူၼ်းပၢႆႈၽေးသိုၵ်း ဢၢၼ်းပၢႆႈသွၼ်ႈယူႇတီႈဝဵင်းလႃႈသဵဝ်ႈ ၺႃးသိုၵ်းမၢၼ်ႈ တင်ႈၵဵတ်ႉလၢၼ်ႇတၢင်းၶဝ်ႈဢွၵ်ႇဝဵင်း ၵူတ်ႇထတ်းႁၢဝ်ႈႁႅင်းလႄႈ ႁဵတ်းႁႂ်ႈ ၵူၼ်းပၢႆႈၽေးယၢပ်ႇယဝ်ႉယၢပ်ႇထႅင်ႈ။

ၵူၼ်းၼုမ်ႇၼႂ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ တီႈၵဵတ်ႉမၢၼ်ႈ တၢင်းႁူဝ်ပိုၵ်ႉပုၼ်ႉဢေႃႈ ။ ၶဝ်ၵူတ်ႇထတ်းႁႅင်းၼႃႇ ရူတ်ႉၵႃးၸိူဝ်းၼႆႉ ၶမ်ပေႃးပဵၼ်ထႅဝ်လူင်ဝႆႉဢေႃႈ။ ၵူၼ်းပၢႆႈၽေးမၢင်ၸိူဝ်း ၶမ်ပဵၼ် လၢႆဝၼ်းဢမ်ႇႁူႉ ” – ဝႃႈၼႆ။

ၵူၼ်းပၢႆႈၽေးၸိူဝ်းမီးပီႈၼွင်ႉ ၼႂ်းဝဵင်းလႃႈသဵဝ်ႈလႄႈသင် ၸိူဝ်းမီးၵူၼ်းႁူႉၸၵ်း ပဵၼ်ၶႃႈႁၢပ်ႇၵၢၼ်ၶုၼ် တႂ်ႈသိုၵ်းမၢၼ်ႈလႄႈသင် ၼႆတႄႉ ၶဝ်ႈၸူးဝဵင်းငၢႆႈ-ဝႃႈၼႆ။

ၵူၼ်းၼုမ်ႇၼႂ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “   ပေႃးႁူႉၸၵ်းၵူၼ်းၼႂ်းဝဵင်းဢမ်ႇၼၼ် ၵူၼ်းႁဵတ်း ၵၢၼ်လူင်ပွင်ၸိုင်ႈ ဢမ်ႇၼၼ်သိုၵ်းမၢၼ်ႈၸိူဝ်းၼႆႉတႄႉ ၶဝ်ႈဝဵင်းငၢႆႈဢေႃႈ  ၶဝ်တေႁပ်ႉသူင်ႇၵၼ်ငၢႆႈ လၢတ်ႈ ၵၼ်ငၢႆႈ။ၵူၼ်းၸိူဝ်း ဢမ်ႇမီးပီႈၼွင်ႉလႄႈဢမ်ႇႁူႉၸၵ်းၽႂ်သေ ပၢႆႈမႃးတႄႉ ၶမ်ဝႆႉၸွမ်းတၢင်းၶဝ်ႈဝဵင်း ၵဵတ်ႉမၢၼ်ႈ ၸိူဝ်းၼႆႉ ပဵၼ်လၢႆဝၼ်းဢေႃႈ ၵမ်ႈၼမ်ၵူၼ်းပၢႆႈၽေးၸိူဝ်းၼႆႉ တေလုၵ်ႉတၢင်းလၢဝ်ႇၵၢႆးမႃး။ ဢူၺ်းၵေႃႉၶႃႈၵေႃႈ လုၵ်ႉမႃးတၢင်းလၢဝ်ႇၵၢႆးဢေႃႈ ၶႃႈလႆႈ ၵႂႃႇႁပ်ႉမၼ်းတီႈတၢင်းၶဝ်ႈဝဵင်းပုၼ်ႉ  ” – ဝႃႈၼႆ။

ၵူၼ်းမိူင်းၸိူဝ်းထူပ်းၽေးသိုၵ်းသိူဝ် ဢၼ်မီးယူႇ တၢင်းဝဵင်းလၢဝ်ႇၵၢႆး ၊ ၵုၼ်လူင် ၸိူဝ်းၼႆႉၵေႃႈ ဢွၼ်ၵၼ်ပၢႆႈဢွၵ်ႇမႃးလူၺ်ႈလၢႆးၽႂ်မၼ်း ထိုင်ဝဵင်းလႃႈသဵဝ်ႈ။  သိုၵ်းမၢၼ်ႈၶႅၼ်းဢဝ်လွင်ႈႁူမ်ႈလူမ်ႈၼႅၼ်ႈၼႃ မၢင်ၵမ်း ယိုဝ်းၵွင်ႈလွၵ်ႇၵူၼ်းပၢႆႈၽေးလူးၵွၼ်ႇ ၼႆယဝ်ႉ။

ဢိင်ၼိူဝ်လွင်ႈၼႆႉ ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈထႅင်ႈဝႃႈ – “ ၵူၼ်းၼမ်ၵူၼ်းလၢႆ ၶဝ်ႈမႃးလႃႈသဵဝ်ႈၼမ်ၼႃႇလႄႈ မၢင်ၵမ်းသိုၵ်းမၢၼ်ႈဝၢႆႇပၢၵ်ႇၵွင်ႈၶိုၼ်ႈၾႃႉသေ ယိုဝ်းလွၵ်ႇၵေႃႈႁဵတ်းဢေႃႈ ၶဝ်ႈၵူဝ်ထိင်းဢမ်ႇလႆႈလႄႈ ယူဝ်ႉ။ ဢမ်ႇၼၼ်ၶဝ်ၵူဝ် သိုၵ်းတၢင်းၼွၵ်ႈပွမ်တူဝ်သေၶဝ်ႈမႃးၸွမ်းၵေႃႈပဵၼ်လႆႈ” – ဝႃႈၼႆ။

ထိုင်မႃးၼႂ်းႁူဝ်လိူၼ်တီႊသိမ်ႊပိူဝ်ႊၼႆႉတႄႉ ၵူၼ်းပၢႆႈၽေးၸိူဝ်းမႃးၶမ်ဝႆႉ ပွတ်းတၢင်းလႄႈသင် ၵဵတ်ႉလၢၼ်ႇမၢၼ်ႈလႃႈသဵဝ်ႈၸိူဝ်းၼႆႉလႄႈ သိုၵ်းမၢၼ်ႈပိုတ်ႇပၼ်ၶဝ်ႈဝဵင်းမူတ်းယဝ်ႉဝႃႈၼႆ။ၼႂ်းၵူၼ်းပၢႆၽေးၼႆႉ ၵူၼ်းမိူင်းၸိူဝ်းယူႇၸွမ်းၶႅပ်ႇဝဵင်းလႃႈသဵဝ်ႈလႄႈ သႅၼ်ဝီၸိူဝ်းၼႆႉၵေႃႈ ပၢႆႈၶဝ်ႈၸူးလႃႈသဵဝ်ႈ ႁူဝ်ၵူၼ်း ဢမ်ႇယွမ်း 400 လႆႈႁူႉၸွမ်းၼင်ႇၼႆ။