ၵူၼ်းဝၢၼ်ႈတူင်ႉၶၢၼ်ႊတႂ်ႈ တီႈဝဵင်းမူႇၸေႊ ထုၵ်ႇသိုၵ်းမၢၼ်ႈ ၸႂ်ႉၶၢႆႉဢွၵ်ႇဝၢၼ်ႈ ယၢမ်းလဵဝ် ၵူၼ်းဝၢၼ်ႈ ဢွၼ်ၵၼ်ပၢႆႈမႃး သွၼ်ႈဝႆႉၼႂ်းဝဵင်း။
မိူဝ်ႈဝႃး ဝၼ်းတီႈ 1/12/2023 ယၢမ်းၵၢင်ၼႂ် မွၵ်ႈ 9 မူင်း သိုၵ်းမၢၼ်ႈ ယိုတ်းမိူင်း ၸႂ်ႉၵူၼ်းဝၢၼ်ႈတူင်ႉၶၢၼ်ႊတႂ်ႈ ၸႄႈဝဵင်းမူႇ ၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ ႁႂ်ႈၶၢႆႉဢွၵ်ႇဝၢၼ်ႈတင်းမူတ်းသေ တႃႇဢဝ်ႁိူၼ်းၵူၼ်းဝၢၼ်ႈႁဵတ်းႁူဝ်ႉ တီႈပႅပ်ႉ ၶဝ် ဝႃႈၼႆ။
ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းမၢၼ်ႈ ၸႂ်ႉၵူၼ်းဝၢၼ်ႈယၢင်ႇဢွၵ်ႇတင်းဝၢၼ်ႈၶႃႈယဝ်ႉ။ ယၢမ်း လဵဝ် ႁိူၼ်းယေး ၵူၼ်းဝၢၼ်ႈ ဢမ်ႇမီးၵူၼ်းပႂ်ႉသေၵေႃႉယဝ်ႉ။ သိုၵ်းမၢၼ်ႈ ဢဝ်ဢွင်ႈယူႇ ၸွမ်းႁိူၼ်းၵူၼ်းဝၢၼ်ႈဝႆႉသေ ႁဵတ်း တီႈယူႇတီႈပႅပ်ႉၶဝ်ဝႆႉ။ ယဝ်ႉၵေႃႈ ၶဝ်သွၵ်ႈတဝ်ၼႂ်းႁိူၼ်းယေး ၶဝ်ႈၽၵ်း ၸိူဝ်းၼႆႉ သွၵ်ႈၵိၼ်မူတ်း၊ ၽႃႈႁူမ်ႇ၊ ၶူဝ်းၼုင်ႈတင်းဝႂ် ၸိူဝ်းၼႆႉၵေႃႈဢဝ်”- ဝႃႈၼႆ။
ယၢမ်းလဵဝ် ၵူၼ်းဝၢၼ်ႈတူင်ႉၶၢၼ်ႊတႂ်ႈၼႆႉ လႆႈပၢႆႈမႃးသွၼ်ႈဝႆႉ ၸွမ်းႁိူၼ်းယေးပီႈၼွင်ႉၽႂ်မၼ်း ၼႂ်းဝဵင်းလႄႈ တီႈဝတ်ႉဝုၺ်ႇလု ဝုၼ်ႇ ၸိူဝ်းၼႆႉဝႆႉ။
ဝၼ်းတီႈ 29/11/2023 ယၢမ်းဝၢႆးဝၼ်း 4 မူင်းၶိုင်ႈ သိုၵ်ႈမၢၼ်ႈ ယိုတ်းမိူင်း ၸႂ်ႉၵူၼ်းဝၢၼ်ႈတူင်ႉၶၢၼ်ႊၼိူဝ် ၶၢႆႉဢွၵ်ႇဝၢၼ်ႈ ယဝ်ႉၵေႃႈ ဢဝ်ၵွင်ႈငႃၸူၼ်ၵူၼ်းဝၢၼ်ႈ ဢဝ်ပေႇႁူ၊ ရူတ်ႉၶိူင်ႈၵူၼ်းမိူင်းၵႂႃႇ 3 လမ်း လိူဝ်ၼၼ်ႉ သွၵ်ႈတဝ် ၼႂ်းႁိူၼ်းယေး ၵူၼ်းဝၢၼ်ႈထႅင်ႈ။
