ၸုမ်းၽူႈႁၵ်ႉပၢႆးမွၼ်းၽဵင်းၵႂၢမ်းတႆး ၼႂ်းထုင်ႉမၢဝ်း ၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ ၸတ်းႁဵတ်းပၢင်ယွင်ႈယေႃႈၽူႈႁွင်ႉၵႂၢမ်းတႆး ၸၢႆးသၢႆမၢဝ်း။

ဝၼ်းတီႈ 7 – 8 /5/2018 ၶၢဝ်းယၢမ်းၵၢင်ၶမ်ႈ 5:00 – 8:00 မူင်း ၸုမ်းၽူႈႁၵ်ႉပၢႆးမွၼ်း ၽဵင်းၵႂၢမ်း ၼႂ်းထုင်ႉမၢဝ်း ႁူမ်ႈၵၼ်ၸတ်းႁဵတ်းပၢင်ယုၵ်ႉယွင်ႈ မေႃႁွင်ႉၵႂၢမ်းၸၢႆးသၢႆမၢဝ်းလႄႈ ႁွင်ႉၽဵင်းၵႂၢမ်းၸၢႆးသၢႆမၢဝ်း တီႈႁိမ်းဝတ်ႉၽြႃးလူင်ၸဝ်ႈၵေႃႇမိူင်း ၵၢင်ဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ။

ၸၢႆးလိူၼ်ၶိူဝ်းၶမ်း ၽူႈၶဝ်ႈပႃးၸုမ်းပွင်ပဵၼ်ပၢင်ယုၵ်ႉယွင်ႈ လၢတ်ႈဝႃႈ – “ ဢၼ်ႁဝ်းၶႃႈၸတ်းႁဵတ်းၼႆႉ ယွၼ်ႉဝႃႈမၼ်းၸၢႆးၼႆႉ မီးၵုင်ႇမုၼ်ၼိူဝ်ပၢႆးမွၼ်းလႄႈ ၸိူဝ်ႉၸၢတ်ႈႁဝ်းမႃးပီယၢဝ်းၶၢဝ်းႁိုင် ၶႂ်ႈႁႂ်ႈမေႃႁွင်ႉၵႂၢမ်းၸၢႆးသၢႆမၢဝ်း မီးႁႅင်းၸႂ် မီးပၢႆးယူႇလီၵႅၼ်ႇၶႅင် ၊ ႁႂ်ႈႁူႉဝႃႈၽူႈႁၵ်ႉၽဵင်းၵႂၢမ်း ထုင်ႉမၢဝ်းႁဝ်းတိုၵ်ႉပၼ်ႁႅင်းၸၢႆးသၢႆမၢဝ်းယူႇ။ ၼႂ်းပၢင် ၼႆႉ ႁဝ်းၶႃႈၵေႃႈလႆႈတုင်းၶၢမ်ႇငိုၼ်းပႃး ပိူဝ်ႈၵမ်ႉထႅမ်ၵႃႈယူတ်းယႃၸၢႆးသၢႆမၢဝ်း၊ ယူႇတီႈတၢင်တူဝ်ၸုမ်းပၢႆးမွၼ်းတႆးသေ ယိၼ်းၸူမ်းထိုင်ၵူႈၾၢႆႇ ဢၼ်ၸွႆႈၶပ်းၶိုင်ပၢင်ပွႆးလႄႈ ပီႈၼွင်ႉၽူႈမႃးပၼ်ႁႅင်းယႂ်ႇၼမ်ဢေႃႈ ” ဝႃႈၼႆ။

ၼႂ်းပၢင်ၼႆႉ မီးၽူႈႁွင်ႉၽဵင်းၵႂၢမ်း ၸိုဝ်ႈသဵင်ယႂ်ႇမိူၼ်ၼင်ႇၸၢႆးသႅင်ၸွမ်ၾႃႉ၊ ၸၢႆးသႅင်ၸွမ်မၢဝ်းၸိူဝ်းၼႆႉ ဢိၵ်ႇၵူၼ်းမိူင်းၼမ်ႉၶမ်း မူၼ်ႈၸႂ်ႁွင်ႉၽဵင်းၵႂၢမ်း ဢၼ်ၸၢႆးသၢႆမၢဝ်းတႅမ်ႈႁွင်ႉဢွၵ်ႇ ၸိူဝ်းၼႆႉ။

ပၢင်ပွႆးယုၵ်ႉယွင်ႈမေႃႁွင်ႉၽဵင်းၵႂၢမ်း ၸၢႆးသၢႆမၢဝ်းၼႆႉ ပေႃးထိုင်မႃးဝၼ်းတီႈ 12 – 13/5/2018 ၶၢဝ်းယၢမ်းၵၢင်ၶမ်ႈ 8:30 – 11:30 ၼႆႉၵေႃႈ တေၸတ်းႁဵတ်းထႅင်ႈတီႈဝဵင်းမူႇၸေႊ ၼႆယဝ်ႉ။