မၢၵ်ႇလူင်တူၵ်းသႂ်ႇ ႁိူၼ်းယေးၵူၼ်းမိူင်း တီႈပၢင်ႇသၢႆးထႅင်ႈလၢႆလင် ၼုမ်ႇၸၢႆးၵေႃႉၼိုင်ႈမၢတ်ႇၸဵပ်းလူႉတၢႆ။
မိူဝ်ႈဝၼ်းတီႈ 19/11/2023 ယၢမ်းဝၢႆးဝၼ်း 3 မူင်းၶိုင်ႈၼၼ်ႉ သိုၵ်းၸုမ်းဢူၺ်းလီ ၸႂ်ႉတရူၼ်ႊပွႆႇမၢၵ်ႇသႂ်ႇလၢႆတီႈ တိူဝ်ႉၺႃးႁိူၼ်းၵူၼ်းမိူင်း 2 လင် လႄႈ လုမ်း EPC ၾႆးမႆႈလူႉၵွႆ ၼႂ်းၼၼ်ႉ ၵူၼ်းမိူင်းလူႉတၢႆ ၵေႃႉၼိုင်ႈ။
ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၸႂ်ႈဢေႃႈ မိူဝ်ႈလဵဝ်မႅၼ်ႈၽွင်း တေသၢင်းၵျူဝ်ႇၵူၼ်းတၢႆၼၼ်ႉဢေႃႈၼႆႉ။ ပဵၼ်မၢၵ်ႇလူင် ဢၼ်သိုၵ်းဢူၺ်းလီၶဝ် ၸႂ်ႉတရူၼ်ႊသေ မႃးပွႆႇသႂ်ႇဢေႃႈ ” – ဝႃႈၼႆ။
ၼုမ်ႇၸၢႆးၵေႃႉဢၼ်လူႉတၢႆ ၵႂႃႇၼႆႉ ၸိုဝ်ႈ ၸၢႆးထုၼ်းၵျေႃႇ ဢႃယု 21 လုၵ်ႈ ၶိင်းၸၢမ်ႇလႃႉ ၼၢႆးၼူႉ ယူႇပွၵ်ႉ 4 ၸႄႈဝဵင်းပၢင်ႇသၢႆး ၸႄႈတွၼ်ႈမူႇၸေႊ လႅၼ်လိၼ်တႆး-ၶႄႇ။
ၼႂ်းဝူင်ႈၼႆႉ လိူဝ်သေ မၢၵ်ႇလူင်တူၵ်းသႂ်ႇ ႁိူၼ်းယေးၵူၼ်းမိူင်းယဝ်ႉ မိူၼ်ၼင်ႇ ႁူင်းယႃလႄႈ လုမ်း EPC ၸိူဝ်းၼႆႉၵေႃႈ ၺႃးမၢၵ်ႇလူင်တူၵ်းသႂ်သေ ၾႆးမႆႈလူႉၵွႆ။
ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၼႂ်းႁူင်းယႃလႄႈ EPC ၸိူဝ်းၼၼ်ႉတႄႉ ဢမ်ႇမီးၵူၼ်းယူႇႁိုင်ယဝ်ႉ။ၸဵမ်မိူဝ်ႈတႄႇပဵၼ်ပၢင်တိုၵ်းၵၼ်ၼၼ်ႉယဝ်ႉ။ ႁိူၼ်းၵူၼ်းမိူင်းတႄႉ ယွၼ်ႉၸုမ်းဢူၺ်းလီၶဝ်ထၢင်ႇဝႃႈ သိုၵ်းမၢၼ်ႈယူႇဝႆႉၼႆလႄႈ ၶဝ်ၸင်ႇပွႆႇမၢၵ်ႇသႂ်ႇ ႁဵတ်းၼၼ်ဢေႃႈ ၵွႆလၢႆလင်ၼႃႇယဝ်ႉ ” – ဝႃႈၼႆ။
ၵူၼ်းပၢင်ႇသၢႆးၵမ်ႈၼမ် ပၢႆႈသွၼ်ႈယူႇၸွမ်း ႁိူၼ်းယေးပီႈၼွင်ႉတီႈမူႇၸေႊ လႄႈ ၸေႊၵဝ်ႇ ၊ မိူင်းမၢဝ်း ၸိူဝ်းၼႆႉ။ၸိူဝ်းပၢႆႈမႃးသွၼ်ႈဝႆႉၸွမ်း ဝတ်ႉၵျွင်း ၊ ၸလွပ်ႈ တီႈၵွင်းၶၢင်ၼၼ်ႉၵေႃႈ လုၵ်ႈၸုမ်းသိုၵ်းမၢၼ်ႈမႃးယူႇၸမ်လႄႈ မႆႈၸႂ်ၵၼ်ဝႆႉထႅင်ႈ။
ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ မိူဝ်ႈလဵဝ် ၵူၼ်းပၢင်ႇသၢႆးဢၼ်ပၢႆႈသွၼ်ႈမႃးယူႇဝႆႉ တီႈၸလွပ်ႈ ၵွင်းၶၢင်ၼၼ်ႉၵေႃႈ မႆႈၸႂ်ၵၼ်ထႅင်ႈယဝ်ႉ ။ယွၼ်ႉဝႃႈ လုၵ်ႈၸုမ်း သိုၵ်းမၢၼ်ႈၶဝ် မႃးယူႇၸွမ်းၸိူဝ်းၼၼ်ႉ ဢမ်ႇယွမ်း 100 ၼႆဢေႃႈ။ၵူၼ်းပၢႆႈၽေးၵူဝ် သိုၵ်းဢူၺ်းလီၶဝ် ၸွမ်းယိုဝ်းထႅင်ႈလႄႈ တေၶၢႆႉပၢႆႈၶဝ်ႈၸူးမူႇၸေႊယဝ်ႉ” – ဝႃႈၼႆ။
ယွၼ်ႉသဵင်ၵွင်ႈ သဵင်မၢၵ်ႇ ဢမ်ႇယဵၼ်လႄႈ ႁဵတ်းႁႂ်ႈ ၸုမ်းၸွႆႈတူင်ႇဝူင်းၵူၼ်း ၶဝ်ႈထိုင်ပၢင်ႇသၢႆးယၢပ်ႇ ၵူၼ်းမိူင်းၸိူဝ်းၶမ်ဝႆႉၼႂ်းႁိူၼ်းယေး ဢမ်ႇၸၢင်ႈႁႃၽႂ်ပိုင်ႈ ။
