မိူဝ်ႈၼႆႉ ဝၼ်းတီႈ 15/11/2023 ယၢမ်းၵၢင်ဝၼ်း မၢၵ်ႇလူင် တူၵ်းသႂ်ႇ တီႈၵျွင်းထမ်ႇမယူင်ႇ ဝဵင်းပၢင်ႇသၢႆး ၸႄႈဝဵင်းမူႇၸေႊ ၸိုင်ႈတႆး ပွတ်းႁွင်ႇ လႅၼ်လိၼ်တႆး – ၶႄႇ တုမ်ႉတိူဝ်ႉၵျွင်း လူႉၵွႆတင်းၼမ်။

ၵူၼ်းပိုၼ်ႉတီႈ ဝဵင်းပၢင်ႇသၢႆး လၢတ်ႈတီႈၽူႈတွႆႇႁွၵ်ႈဝႃႈ – “တီႈဝဵင်းပၢင်ႇသၢႆးၼႆႉ သိုၵ်းမၢၼ်ႈ၊ ၸုမ်းဢူၺ်းလီ ၶဝ်ၵေႃႈ ဢမ်ႇမီး ႁဵတ်းသင်လႄႈ ယူႇလၢႆလၢႆသေ ယိုဝ်းသႂ်ႇ ၼႂ်းၵျွင်း၊ ၼႂ်းမူႇဝၢၼ်ႈ ၸိူင်ႉၼႆတိၵ်းတိၵ်းတႄႉ ဢမ်ႇထုၵ်ႇမႅၼ်ႈယူဝ်ႉ။ မၢၵ်ႇၼႆႉ လုၵ်ႉ တီႈလႂ်သေ ပွႆႇမႃးၵေႃႈ ဢမ်ႇႁူႉ ယဝ်ႉၵေႃႈ ပဵၼ်ၸုမ်းလႂ် ယိုဝ်းမႃးၵေႃႈဢမ်ႇႁူႉ”- ဝႃႈၼႆ။

ဝတ်ႉထမ်ႇမယူင်ႇ ဝဵင်းပၢင်ႇသၢႆး ဢၼ်ထုၵ်ႇမၢၵ်ႇလူင် တူၵ်းသႂ်ႇၼႆႉ လူႉၵွႆၵႂႃႇ မိူၼ်ၼင်ႇ – ၽၵ်းတူႁူးလႅင်းလႄႈ လဵၵ်းမုင်း ၸိူဝ်းၼႆႉ တင်းၼမ် ၼႆယဝ်ႉ။

တႄဢဝ် ဝၼ်းတီႈ 12/11/2023 ၼႆႉမႃး ၵူၼ်းမၢၼ်ႈၸေႊ ႁူဝ်ၵူၼ်း 95 ၵေႃႉလႄႈ ၵူၼ်းမၢၼ်ႈၼမ်ႉႁူး ႁူဝ်ၵူၼ်း 165 ၵေႃႉ ဢွၼ်ၵၼ်ပၢႆႈၽေးသိုၵ်း ၵႂႃႇသွၼ်ႈယူႇဝႆႉ ၸွမ်းသၢပ်ႇမႄႈၼမ်ႉယၢင်း မီးၶၢဝ်းတၢင်း 4 ဝၼ်း 3 ၶိုၼ်းယဝ်ႉ ယွၼ်ႉပၢင်တိုၵ်း သိုၵ်းမၢၼ်ႈ ယိုတ်းမိူင်းတင်း သိုၵ်းၵဝ်ႈၵၢင်ႇ MNDAA ပိုတ်းယိုဝ်းၵၼ် ႁၢဝ်ႈႁႅင်း ၼႆယဝ်ႉ။

“ယၢမ်းလဵဝ် တီႈဝၢၼ်ႈၼမ်ႉႁူးၼႆႉ ႁိူၼ်းယေး လူႉၵွႆၼမ်ဢေႃႈ။ တီႈမၢၼ်ႈၸေႊတႄႉ ၽၵ်းတူႁူးလႅင်း ၸိူဝ်းၼႆႉ ဢေႃႈ လူႉၵွႆၼမ်။ တေႃႈလဵဝ် ၵူၼ်းမၢၼ်ႈၸေႊတင်း မၢၼ်ႈၼမ်ႉႁူးတႄႉ ၵမ်ႈၼမ် ပၢႆႈၼွၼ်းၼႂ်းၵႃး၊ ၼႂ်းထူဝ်ႈလႄႈ ႁဵတ်းသုမ်းသေ ၼွၼ်းၸွမ်းသၢပ်ႇၼမ်ႉယၢင်း ၸိူဝ်းၼႆႉၶႃႈဢေႃႈ”- ၵူၼ်းပိုၼ်ႉတီႈ ဝဵင်းပၢင်ႇသၢႆး သိုပ်ႇလၢတ်ႈၼႄၼင်ႇ ၼႆ။

မႄႈၼမ်ႉယၢင်းၼႆႉ ပဵၼ်မႄႈၼမ်ႉလႅၼ်ၶႅၼ်ႈ မိူင်းၶႄႇတင်း မိူင်းတႆး ၼႆယဝ်ႉ။

ၸွမ်းၼင်ႇ ၽႅၼ်ၵၢၼ် 1027 ၸုမ်းဢူၺ်းလီ ပွတ်းႁွင်ႇ 3 ၸုမ်း မိူၼ်ၼင်ႇ – သိုၵ်းတဢၢင်း TNLA ၊ သိုၵ်းၵဝ်ႈၵၢင်ႉ MNDAA လႄႈ သိုၵ်းရၶႅင်ႇ AA ၼႆႉသေ ႁူမ်ႈၵၼ် လေႃႇတိုၵ်း သိုၵ်းမၢၼ်ႈ ယိုတ်းမိူင်းမႃးႁၢဝ်ႈႁႅင်း ၼႂ်းၸိုင်ႈတႆး ပွတ်းႁွင်ႇ တၢင်းၸႄႈဝဵင်းလႃႈသဵဝ်ႈ၊ သႅၼ်ဝီ၊ ၵူတ်ႉၶၢႆ၊ ၼမ်ႉၶမ်း၊ မူႇၸေႊ၊ ၵုၼ်လူင်၊ လၢဝ်ႇၵၢႆး၊ ဝဵင်းၼမ်ႉၽႃႈ(ၶျိၼ်းသူၺ်ႇႁေႃႇ) ၸိူဝ်း ၼႆႉမႃး ယဝ်ႉၵေႃႈ ပၢင်တိုၵ်း လၢမ်းၽႄႈထိုင် တၢင်းဝဵင်းၼွင်ၶဵဝ်၊ သီႇပေႃႉလႄႈ ၵျွၵ်ႉမႄး ၸိူဝ်းၼႆႉထႅင်ႈ ႁဵတ်းႁႂ်ႈၵူၼ်းမိူင်း ပိုၼ်ႉ တီႈပၢႆႈၽေးသိုၵ်း ၼပ်ႉႁူဝ်မိုၼ်ႇ ၼႆယဝ်ႉ။