Friday, March 1, 2024

မၢၵ်ႇသိုၵ်းမၢၼ်ႈ တူၵ်းသႂ်ႇဝတ်ႉမုၼ်ၸဝ်ႈ တီႈဝဵင်းပၢင်ႇသၢႆး

Must read

သိုၵ်းမၢၼ်ႈ ယိုဝ်းမၢၵ်ႇလူင် သႂ်ႇၼႂ်းမူႇဝၢၼ်ႈ တႅၵ်ႇတိူဝ်ႉသႂ်ႇ တီႈဝတ်ႉမုၼ်ၸဝ်ႈ လူႉၵွႆၼမ် ၼႂ်းဝဵင်းပၢင်ႇသၢႆး လႅၼ်လိၼ်တႆး – ၶႄႇ။

မိူဝ်ႈဝႃး ဝၼ်းတီႈ 13/11/2023 ယၢမ်းၵၢင်ၶမ်ႈ 9 မူင်းၶိုင်ႈ သိုၵ်းမၢၼ်ႈ ယိုတ်းမိူင်း ယူႇတီႈ 105 လၵ်းသေ ယိုဝ်းမၢၵ်ႇလူင် သႂ်ႇၼႂ်းဝၢၼ်ႈၼမ်ႉႁူး ဝဵင်းပၢင်ႇသၢႆး ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ မၢၵ်ႇလူင်တႅၵ်ႇတိူဝ်ႉသႂ်ႇ ၼႂ်း ဝၢင်းဝတ်ႉမုၼ်ၸဝ်ႈၼမ်ႉႁူး 3 လုၵ်ႈ။  

- Subscription -

ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်မၢၵ်ႇလူင် သိုၵ်းမၢၼ်ႈ လုၵ်ႉတၢင်း 105 လၵ်းၼၼ်ႉသေ ယိုဝ်းမႃးတူၵ်းသႂ်ႇ တီႈၼႂ်းဝၢင်းၵျွင်းမုၼ်ၸဝ်ႈၼမ်ႉႁူးၼႆႉ 3 လုၵ်ႈၶႃႈဢေႃႈ။ လွင်ႈလူႉလႅဝ်ၼႂ်းၵျွင်းတႄႉ ၽၵ်းတူမၢၼ်ႇ ၸိူဝ်းၼႆႉ လူႉၵွႆမူတ်းၶႃႈ”- ဝႃႈၼႆ။

မိူဝ်းဝႃး ယၢမ်းႁူဝ်ၶမ်ႈမွၵ်ႈ 6 မူင်းၶိုင်ႈ သိုၵ်းၵဝ်ႈၵၢင်ႉ MNDAA ဢဝ်တရူၼ်း ပွႆႇမၢၵ်ႇသႂ်ႇ တီႈတပ်ႉသိုၵ်းမၢၼ်ႈၶမယ 525 တီႈဝဵင်းပၢင်ႇသၢႆးၼႆႉ မွၵ်ႈ 7 လုၵ်ႈ။

“တပ်ႉသိုၵ်းမၢၼ်ႈ 525 ၼႆႉ ၶဝ်သုမ်းသေ ထွႆဢွၵ်ႇၵႂႃႇ ပူၼ်ႉမႃးလၢႆဝၼ်း ၼႆႉယဝ်ႉ။ ယၢမ်းလဵဝ် သိုၵ်းမၢၼ်ႈၼႆႉ ပွၵ်ႈမႃး ၶိုၼ်း မၢင်ပွၵ်ႈ ၶဝ်ၵႂႃႇယူႇတီႈတပ်ႉၶဝ်၊ မၢင်ပွၵ်ႈ ယူႇဝႆႉတီႈၼႂ်းၵျွင်းၽြႃး ဝၢၼ်ႈမႂ်ႇ ၸိူဝ်းၼႆႉ။ ယဝ်ႉၵေႃႈ ၸွမ်းၼင်ႇ ဝၢၼ်ႈၼမ်ႉႁူး၊ ဝၢၼ်ႈ ၽၢႆၵွင်း၊ ဝၢၼ်ႈၸေႊ ၸိူဝ်းၼႆႉ ၶဝ်မႃးသွၼ်ႈယူႇဝႆႉသေ ၸႂ်ႉၵူၼ်းဝၢၼ်ႈပၢႆႈၵႂႃႇတၢင်းဝၢၼ်ႈၼမ်ႉယၢင်းၼၼ်ႉၶႃႈဢေႃႈ။ ပူၼ်ႉမႃး လၢႆဝၼ်းၼႆႉ သိုၵ်းၵဝ်ႈၵၢင်ႉၶဝ် ဢဝ်မၢၵ်ႇမႃးပွႆႇသႂ်ႇ တီႈဝၢၼ်ႈၼမ်ႉႁူးသေ ၸၢၵ်ႇမၢၵ်ႇတိူဝ်ႉသႂ်ႇ သိုၵ်းမၢၼ်ႈမၢတ်ႇၸဵပ်း 5 ၵေႃႉ ”- ၵူၼ်းပိုၼ်ႉတီႈ ဝဵင်းမူႇၸေႊ သိုပ်ႇလၢတ်ႈၼႄၼင်ႇၼႆ။

မိူဝ်ႈဝၼ်းတီႈ 12 ပူၼ်ႉမႃးၼႆႉၵေႃႈ သိုၵ်းမၢၼ်ႈ မႃးၼွၼ်းယူႇဝႆႉ တီႈႁူင်းႁဵၼ်းၸၼ်ႉသုင်မၢႆ 1 ဝဵင်းပၢင်ႇသၢႆး ထုၵ်ႇသိုၵ်းၵဝ်ႈၵၢင်ႉ ၸႂ်ႉတရူၼ်းမႃးပွႆႇသႂ်ႇ ၼၼ်ႉတႄႉ လွင်ႈမၢတ်ႇၸဵပ်းလူႉတၢႆ ပႆႇႁူႉ။

“မိူဝ်ႈလဵဝ် တီႈဝဵင်းပၢင်ႇသၢႆးၼႆႉ သိုၵ်းမၢၼ်ႈ ဢၼ်မႃးပၵ်းယူႇဝႆႉတႄႉ ဢမ်ႇမီး ၵူၺ်းၵႃႈ ၶဝ်တေၵႂႃႇၵႂႃႇမႃးမႃး ၸူဝ်ႈၵႅပ်ႉၵမ်း ၸိူင်ႉၼႆၵူၺ်း။ ပူၼ်ႉမႃးလၢႆဝၼ်းၼႆႉ တီႈဝၢၼ်ႈၸေႈၼၼ်ႉ ယွၼ်ႉၸဝ်ႈႁိူၼ်းဢမ်ႇယူႇ ပၢႆႈၽေးသိုၵ်းဝႆႉလႄႈ သိုၵ်းလွႆ ၶဝ်ႈ သွၵ်ႈၵိၼ်ၶူဝ်းၶွင်ၼႂ်းႁိူၼ်းသေ ယူႇတီႈၵူၼ်းလူင်ၶဝ် လႆႈမႃးတွင်းပၢၼ်ႇၶိုၼ်းၶႃႈဢေႃႈ။ ၵူၺ်းၵႃႈ ဢမ်ႇသၢႆႈတႅၼ်းသင်ၶႃႈ”- ၵူၼ်းပိုၼ်ႉတီႈ ဝဵင်းမူႇၸေႊလၢတ်ႈ။

ယၢမ်းလဵဝ် ၵူၼ်းဝဵင်းပၢင်ႇသၢႆးၼႆႉ ၵမ်ႈၼမ် တေမူၵ်းသွၼ်ႈယူႇဝႆႉ ၼႂ်းႁိူၼ်းယေးၽႂ်မၼ်း ၵမ်ႈၽွင်ႈၵေႃႈ ပၢႆႈၵႂႃႇတၢင်းဝၢၼ်ႈ ၼမ်ႉယၢင်း၊ မူႇၸေႊ၊ မိူင်းမၢဝ်း ၸိူဝ်းၼၼ်ႉၵေႃႈ မီးၼမ်။

မိူဝ်ႈၼႆႉ ဝၼ်းတီႈ 14 ပဵၼ်ဝၼ်းၵၢတ်ႇပၢင်ႇသၢႆး ၵူၼ်းၶၢႆၵၢတ်ႇ/ ၸၢႆႇၵၢတ်ႇတႄႉ ၵိုၼ်းၶွၼ်ႈယူႇ မိူၼ်ၵဝ်ႇ ၵူၼ်းပိုၼ်ႉတီႈလၢတ်ႈ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း