သိုၵ်းမၢၼ်ႈ ယိုတ်းမိူင်း ယိုဝ်းမၢၵ်ႇလူင် သႂ်ႇၼႂ်းဝဵင်းမိူင်းမိတ်ႈ 3 လုၵ်ႈ တႅၵ်ႇတိူဝ်ႉသႂ်ႇ ႁိူၼ်းၵူၼ်းဝၢၼ်ႈ လူႉၵွႆလင်ၼိုင်ႈ။

ဝၼ်းတီႈ 10/11/2023 ယၢမ်းၵၢင်ၶိုၼ်း 10 မူင်း သိုၵ်းမၢၼ်ႈ လုၵ်ႉတီႈတပ်ႉပိဝ်ႇႁႃႇ မိူင်းမိတ်ႈသေ ဢဝ်ၵွင်ႈလူင် 120 mm ယိုဝ်းၶဝ်ႈဝဵင်း 3 လုၵ်ႈ တႃႇၼိုင်ႈလုၵ်ႈ တႅၵ်ႇတိူဝ်ႉသႂ်ႇ ႁိူၼ်းၵူၼ်းဝၢၼ်ႈလင်ၼိုင်ႈ တီႈဝၢၼ်ႈထုင်ႉလူင် ဢိူင်ႇလွၵ်းလူင် ဝဵင်း မိူင်းမိတ်ႈ ၸိုင်ႈတႆးပွတ်းႁွင်ႇ။

ၵူၼ်းပိုၼ်ႉတီႈ ဝဵင်းမိူင်းမိတ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်သိုၵ်းမၢၼ်ႈ ယိုဝ်းမႃးၶႃႈဢေႃႈ တင်းမူတ်း ၶဝ်ယိုဝ်းမႃး 3 လုၵ်ႈ။ ၼႂ်း 3 လုၵ်ႈၼၼ်ႉ တႃႇ 2 လုၵ်ႈ ယိုဝ်းမႃးတူၵ်းသေ ဢမ်ႇတႅၵ်ႇ။ တႃႇ 1 လုၵ်ႈသမ်ႉ မႃးတူၵ်းတႅၵ်ႇ ၼႂ်းဝၢၼ်ႈထုင်ႉလူင် ၸၢၵ်ႇမၢၵ်ႇတိူဝ်ႉသႂ်ႇ ႁိူၼ်းပႃႈလႃႉထေး လူႉၵွႆၸွမ်း ၵမ်ႈၽွင်ႈ။ ယွၼ်ႉသင်လႄႈ ၶဝ်ယိုဝ်းမႃးတႄႉ ဢမ်ႇႁူႉ ၶႃႈ”- ဝႃႈၼႆ။

ဝၢၼ်ႈထုင်ႉလူင် ဢိူင်ႇလွၵ်းလူင်ၼႆႉ မီးဝႆႉၸဵင်ႇႁွင်ႇဝၼ်းဢွၵ်ႇ ဝဵင်းမိူင်းမိတ်ႈ။ ယၢမ်းလဵဝ် တၢင်းထုင်ႉမိူင်းမိတ်ႈၼႆႉ မီးဝႆႉ ၸုမ်း ယိပ်းၵွင်ႈၵၢင်ႇ တူင်ႉၼိုင်ယူႇဝႆႉၼမ် မိူၼ်ၼင်ႇ သိုၵ်းမၢၼ်ႈလႄႈ ၸုမ်းဢူၺ်းလီပွတ်းႁွင်ႇ ႁူမ်ႈလူၺ်ႈ PDF ၸိူဝ်းၼႆႉ။

မိူၼ်ၼႆ ၼင်ႇၵဝ်ႇ မိူဝ်ႈဝႃး ဝၼ်းတီႈ 10/11/2023 ယၢမ်းၵၢင်လိုၵ်း မွၵ်ႈ 10 မူင်းၶိုင်ႈ သိုၵ်းမၢၼ်ႈ ယူႇတီႈတပ်ႉၸၶၢၼ်း တိတ်ႉၾၢႆႇၸၢၼ်းဝဵင်းသေ ယိုဝ်းမၢၵ်ႇလူင် ၶဝ်ႈဝဵင်း ဢမ်ႇယွမ်း 10 လုၵ်ႈ မၢၵ်ႇလူင်တူၵ်းတႅၵ်ႇ တိူဝ်ႉသႂ်ႇႁိူၼ်းၵူၼ်းဝၢၼ်ႈ ထုၵ်ႇၾႆးမႆႈ 3 လင် တီႈပွၵ်ႉတႃႇယႃႇၵူင်း ဝဵင်းၼမ်ႉၶမ်း။