သိုၵ်းမၢၼ်ႈယိုတ်းမိူင်း ၶၢၼ်းဢဝ်ၵႃးၵူၼ်းမိူင်းၼႂ်းၸႄႈဝဵင်းယႂႃႇငၢၼ်ႇ ၵႂႃႇၸႂ်ႉတႃႇတေႃႉသူင်ႇၶဝ်ႈၼမ်ႉတၢင်းၵိၼ်လႄႈ ၶိူင်ႈၶူဝ်းၸႂ်ႉသွႆၵၢၼ်သိုၵ်း။

တႄႇဢဝ် ႁူဝ်လိူၼ်ၼူဝ်ႊဝႅမ်ႊပိူဝ်ႊ ပီႈ 2023 ၼႆႉမႃး သိုၵ်းမၢၼ်ႈၶၢၼ်းၵူၼ်းမိူင်း မႅင်ႇလႄႉၵၼ်သူင်ႇရူတ်ႉၵႃးပၼ်ၶႃ တႃႇဢဝ်ၵႂႃႇတေႃႉသူင်ႇၶဝ်ႈၼမ်ႉတၢင်းၵိၼ်ၶဝ်လႄႈ ၶိူင်ႈၶူဝ်းၸႂ်ႉသွႆႈ ၼႂ်းၵၢၼ်သိုၵ်း။

ၵူၼ်းပိုၼ်ႉတီႈလၢတ်ႈတီႈၽူႈတွႆႇႁွၵ်ႈဝႃႈ – “ ၶဝ်ၵဵပ်းသဵၼ်ႈမၢႆ ၵႃးၵူၼ်းမိူင်းဝႆႉသဵင်ႈမူတ်းသေ ၼိုင်ႈပွၵ်ႉလႂ် ႁႂ်ႈၵူၼ်းမိူင်းဢဝ်ၵႃးၵႂႃႇပၼ်ၶဝ် 2 လမ်း။ၶဝ်ဢဝ်ၵႂႃႇၸႂ်ႉ ၼႂ်းၵၢၼ်သိုၵ်းၶဝ်  ” – ဝႃႈၼႆ။

  ဢဝ်ၵႃးၵူၼ်းမိူင်း ၵႂႃႇၸႂ်ႉသွႆယဝ်ႉသေတႃႉ ပေႃးၵႃးမီးလွင်ႈလူႉၵွႆမႃးသမ်ႉ ဢမ်ႇႁပ်ႉပုၼ်ႈၽွၼ်းၸွႆႈပၼ်သင်၊ ၼမ်ႉမၼ်းရူတ်ႉၵႃးၸိူဝ်းၼႆႉၵေႃႈ ႁႂ်ႈသႂ်ႇထႅမ်မႃးပၼ်ဝႃႈၼႆ။

ငဝ်းလၢႆးၼႂ်းဝဵင်းယၢမ်းလဵဝ် မိူၼ်ၶိုၼ်းပၢၼ်သိုၵ်းၼဝတ ၼဢၽ ၽွင်းငမ်းမိူင်း ၊ မိူဝ်ႈပူၼ်ႉမႃးမွၵ်ႈ 10 ပီပၢႆၼၼ်ႉၵူၺ်းယဝ်ႉ ၵူၼ်းမိူင်းဢွၼ်ၵၼ်ၶၢင်းပွင်ႉၼင်ႇၼႆ။

ၵူၼ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၵႃးၼႆႉ လႆႈၵႂႃႇဝႆႉပၼ်ၶဝ် ၶၢဝ်းတၢင်း 2 ဝူင်ႈတဵမ်တဵမ်။ ပေႃးတဵမ် 2 ဝူင်ႈလႄႈ ၶဝ်တိုၵ်ႉမီးတႃႇၸႂ်ႉယူႇၼႆၵေႃႈ ၶဝ်တေဢဝ်ၵႂႃႇၸႂ်ႉထႅင်ႈၵေႃႈယူႇတီႈၶဝ်။ ပေႃးပွႆႇပၼ်ၶိုၼ်း 2 လမ်း ၼၼ်ႉယဝ်ႉၵေႃႈ ၶဝ်ၶိုၼ်းႁႂ်ႈသူင်ႇပၼ်ထႅင်ႈ 2 လမ်း ႁဵတ်းၼႆၶႃႈဢေႃႈ ” –  ဝႃႈၼႆ။

ဢၼ်သိုၵ်းမၢၼ်ႈတဵၵ်းဢဝ်ၵႃးၵူၼ်းမိူင်းၸႂ်ႉသွႆႈၼႆႉ မီးမႃးလၢႆဝၢၼ်ႈယဝ်ႉ မိူၼ်ၼင်ႇ ဝၢၼ်ႈၵုင်းသိမ်ႇ (သိမ်ကုန်းကျေးရွာ)၊ ဝၢၼ်ႈၼွင်လူင်(အင်းကြီးကျေးရွာ) ၊ ဝၢၼ်ႈထၢၼ်းလႃႉပိၼ်ႇ(ထန်းလှပင်ကျေးရွာ) ၸဵမ်ၸိူဝ်းၼႆႉ

တႄႇဢဝ်သိုၵ်းမၢၼ်ႈယိုတ်းမိူင်းမႃး ၶၢဝ်းတၢင်း 2 ပီပၢႆ ၵူၼ်းမိူင်းၸႄႈဝဵင်းယႂႃႇငၢၼ်ႇ ၺႃးသိုၵ်းမၢၼ်ႈလႄႈ ၸုမ်းယိပ်း ၵွင်ႈၵၢင်ႇလၢႆၸုမ်း ၼႄၶေႃႈဢၢင်ႈလၢႆလၢႆးသေ ၺႃးႁဵတ်းႁၢႆႉမႃးၶိူဝ်းယႂ်း။

မၢင်ပွၵ်ႈၺႃးၽဝ်ႁိူၼ်းယေး၊ မၢင်ပွၵ်ႈၺႃးတီႉၺွပ်းၵုမ်းၶင် ၸိူဝ်းၺႃးၶႃႈတၢႆၵေႃႈမီး။ၵဵဝ်ႇလူၺ်ႈလွင်ႈၼႆႉ ဢမ်ႇမီးမူႇလႂ်ၸုမ်းလႂ် ၶဝ်ႈၵႄႈလိတ်ႈၸွႆႈထႅမ်ပၼ်လႆႈသင်။

ၼႂ်းလိူၼ်သႅပ်ႊထိမ်ႊပိူဝ်ႊ ပူၼ်ႉမႃးၼႆႉၵေႃႈ  သိုၵ်းမၢၼ်ႈ ၶဝ်ႈထိုင်ၼႂ်းဝၢၼ်ႈၼႂ်းသူၼ်သေ  သင်ႇ ႁႂ်ႈၵူၼ်းမိူင်းယႂႃႇငၢၼ်ႇ ပွင်ႇၶၢဝ်ႇပၼ်လွင်ႈတူင်ႉၼိုင်သိုၵ်းၵႅတ်ႇၶႄၵူၼ်းမိူင်း PDF ပေႃးဢမ်ႇပွင်ႇၶၢဝ်ႇပၼ် တေၽဝ်ႁိူၼ်းယေးၵူၼ်းမိူင်းၼႆယဝ်ႉ ။