မၢၵ်ႇလူင် တူၵ်းသႂ်ႇ ၵႃးၵူၼ်းမိူင်းလမ်းၼိုင်ႈ တီႈထုင်ႉလွႆႁူဝ်သိူဝ် ၼႂ်းၸႄႈမိူင်းၶၢင် ထုၵ်ႇၾႆးမႆႈ လူႉသုမ်းၵႂႃႇ ၶၼ်ငိုၼ်းမွၵ်ႈ 450 သႅၼ်ပျႃး။

မိူဝ်ႈၼႆႉ ဝၼ်းတီႈ 6/11/2023 ယၢမ်းၵၢင်ၼႂ်ၸဝ်ႉ 12:15 မူင်း မၢၵ်ႇလူင် 2 လုၵ်ႈ တူၵ်းသႂ်ႇ တီႈသိုင်ႇဝႆႉၵႃး ၼၢႆးယႃႊၵွႆႇ မၢၼ်ႈဝဵင်းလူင် ထုင်ႉလွႆႁူဝ်သိူဝ် ၸႄႈဝဵင်းမၢၼ်ႈၸေႊ ၸႄႈမိူင်းၶၢင် တႅၵ်ႇတိူဝ်ႉသႂ်ႇ သိုင်ႇလႄႈတင်းၵႃး ထုၵ်ႇၾႆးမႆႈ ၵႂႃႇ တင်းမူတ်း ၼႆယဝ်ႉ။

ၵူၼ်းပိုၼ်ႉတီႈ ဝဵင်းၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်မၢၵ်ႇၸုမ်းလႂ် ယိုဝ်းမႃးတႄႉ ဢမ်ႇႁူႉၶႃႈ ယိုဝ်းမႃး 2 လုၵ်ႈသေ မႃးတူၵ်းသႂ်ႇ သိုင်ႇဝႆႉၵႃး ၼၢႆးယႃႊၵွႆႇ ထုၵ်ႇၾႆးမႆႈသိုင်ႇလႄႈ ၵႃး Wish လမ်းၼိုင်ႈ။ ၵႃးၼၼ်ႉသမ်ႉ ပဵၼ်ၵႃးမီးၶွၼ်ႇလႄႈ တေ မီးၵႃႈၶၼ် မွၵ်ႈ 450 သႅၼ်ပျႃးၼႆႉ။ ၵူၺ်းၵႃႈ လွင်ႈၸၢၵ်ႇမၢၵ်ႇ တိူဝ်ႉသႂ်ႇ ၵူၼ်းမၢတ်ႇၸဵပ်းလူႉတၢႆတႄႉ ဢမ်ႇမီးၶႃႈ”- ဝႃႈၼႆ။

မိူဝ်ႈဝႃး ဝၼ်းတီႈ 5/11/2023 ယၢမ်းၵၢင်ၼႂ် ယူႇတီႈ တပ်ႉသိုၵ်းတဢၢင်း TNLA ၶဝ်ႈယိုတ်းလႆႈ ႁူင်းပလိၵ်ႈမၢၼ်ႈလႄႈ လုမ်းၽူႈၵွၼ်းၸႄႈဝဵင်းၼမ်ႉၶမ်းၵႂႃႇ ၼႆယဝ်ႉ။

“ဢၼ်သိုၵ်းလွႆၶဝ် ယိုတ်းလႆႈ ႁူင်းပလိၵ်ႈမၢၼ်ႈၼႆႉ သဵင်ၵွင်ႈဢမ်ႇတႅၵ်ႇသေလုၵ်ႈၶႃႈ ။ ၵွၼ်ႇၼႃႈၼႆႉ ပလိၵ်ႈမၢၼ်ႈၶဝ် ပေႃးပၢႆႈဝႆႉမူတ်းယဝ်ႉ။ သိုၵ်းလွႆၶဝ်မႃးႁွတ်ႈထိုင်ၵေႃႈ ၵိုင်ႉၵၢင်ႉၶဝ်ႈၵႂႃႇ ယိုတ်းဢဝ်ၸိူင်ႉၼၼ်ၵူၺ်း။ ႁိူၼ်းႁူဝ်ၼႃႈ ပျီႇတူႉၸိတ်ႉ ဢူးဢၢႆႈသၢမ် ဢၼ်ယူႇႁိမ်းႁူင်းပလိၵ်ႈၼၼ်ႉတႄႉ ထုၵ်ႇၾႆးမႆႈၵႂႃႇလင်ၼိုင်ႈဢေႃႈ”-  ၵူၼ်းပိုၼ်ႉတီႈ ဝဵင်း ၼမ်ႉၶမ်း သိုပ်ႇလၢတ်ႈ ၼႄၼင်ႇၼႆ။

ပူၼ်ႉမႃး မိူဝ်ႈဝၼ်းတီႈ 3 ၼၼ်ႉ ယွၼ်ႉသိုၵ်းမၢၼ်ႈ ယိုတ်းမိူင်းတင်း သိုၵ်းတဢၢင်း TNLA ပိုတ်းယိုဝ်းၵၼ် ႁၢဝ်ႈႁႅင်း ၼႂ်းဝဵင်းၼမ်ႉၶမ်း တႄႇဢဝ်ယၢမ်းၵၢင်ၼႂ် 5 မူင်းပၢႆထိုင် ယၢမ်းၵၢင်ၶမ်ႈ 7 မူင်းၶိုင်ႈသေ မၢၵ်ႇလူင် တူၵ်းသႂ်ႇႁိူၼ်းယေး ၵူၼ်းဝၢၼ်ႈ လူႉၵွႆ ဢမ်ႇယွမ်း 30 လင် ယဝ်ႉၵေႃႈ ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းမိူင်း လူႉတၢႆ မၢတ်ႇၸဵပ်းၸွမ်းထႅင်ႈ လႂ် ၵေႃႉ။

“ယွၼ်ႉပၢင်တိုၵ်းၶဝ် ၼႂ်းဝၼ်းတီႈ 3 ၼၼ်ႉသေ ၸၢၵ်ႇမၢၵ်ႇတိူဝ်ႉသႂ်ႇ ႁိူၼ်းၵူၼ်းဝၢၼ်ႈလူႉၵွႆၼမ် ႁူမ်ႈပႃးလူၺ်ႈ ၵျွင်းမုၼ် ၸဝ်ႈ ဢမ်ႇယွမ်း 30 လင် ၼႂ်းၼၼ်ႉ တႃႇ 2 လင် လူႉၵွႆႁႅင်း။ ယဝ်ႉၵေႃႈ ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းမိူင်းမၢတ်ႇၸဵပ်း 5 ၵေႃႉ ၼႂ်းၼၼ်ႉ လူႉတၢႆ ၵေႃႉၼိုင်ႈ။ ယၢမ်းလဵဝ် သိုၵ်းမၢၼ်ႈ၊ သိုၵ်းလွႆ ၸိူဝ်းၼႆႉ တိုၵ်ႉၶဵင်ႈၶႅင်ၵၼ်ဝႆႉယူႇ ၼႂ်းဝဵင်းၼမ်ႉၶမ်းၼႆႉ”- ၵူၼ်း ၼုမ်ႇပိုၼ်ႉတီႈ ဝဵင်းၼမ်ႉၶမ်း လၢတ်ႈတီႈၽူႈတွႆႇႁွၵ်ႈၼင်ႇၼႆ။

တႄႇဢဝ် ဝၼ်းတီႈ 3/11/2023 ၼၼ်ႉမႃး တေႃႇထိုင် ဝၼ်းတီႈ 5/11/2023 ၼႆႉ ၵူၼ်းဝဵင်းၼမ်ႉၶမ်း ဢွၼ်ၵၼ်ပၢႆႈ ၽေး သိုၵ်း ၵႂႃႇသွၼ်ႈဝႆႉ တီႈဝတ်ႉမၢၼ်ႈၼွင်ၶမ်း ႁူဝ်ၵူၼ်း 1,340 ၵေႃႉ ပဵၼ်ၵူၼ်းမၢၼ်ႈႁွင်းလူင်၊ ၼွင်တိူၼ်း၊ ၵုၼ်လူင်၊ ဢွင်ႇမႅတ်ႈတႃႇ၊ မၢၼ်ႈဢွႆႈ၊ ပွၵ်ႉတႂ်ႈ၊ တႃႇယႃႇၵုင်း၊ ၼွင်မႃႇတႃႊ၊ ၼွင်ၵွင်၊ ၼွင်မႃႉလူင် ၸိူဝ်းၼႆႉ။

တီႈဝတ်ႉၵုၼ်ႁႆး(တႂ်ႈ) သမ်ႉ ၸၢႆး 291 ၵေႃႉ ယိင်း 347 ၵေႃႉ တင်းမူတ်း 638 ၵေႃႉ ပဵၼ်ၵူၼ်းမၢၼ်ႈမႃႉတႃႊ၊ ၼွင်ၵွင်၊ ၼွင် တိူၼ်း၊ မၢၼ်ႈဢႆႇတႂ်ႈ၊ ပွၵ်ႉတႂ်ႈ၊ ၵုင်းၵလႃး၊ ၼမ်ႉၶမ်းၽၢႆႇတႂ်ႈ၊ မၢၼ်ႈၶမ်း၊ ႁူဝ်ၼွင်၊ ၼွင်ၸၢင်ႉ၊ ပွၵ်ႉတႅၼ်ႈမႃႉ၊ မူဝ်ၶမ်းလႄႈ ၼမ်ႉတီး ၸိူဝ်းၼႆႉ။

ဝတ်ႉၵုၼ်ႁႆႈ (ၼိူဝ်) သမ်ႉ ၸၢႆး 99 ၵေႃႉ ယိင်း 128 ၵေႃႉ ႁူမ်ႈ 227 ၵေႃႉ ပဵၼ်ၵူၼ်းမၢၼ်ႈၼွင်မႃႉတႃႊ၊ မၢၼ်ႈၶမ်း၊ မၢၼ်ႈ ႁွင်းလူင်၊ ၵုင်းၵလႃး၊ ၼွင်တိူၼ်း၊ မူဝ်ၶမ်း၊ ပွၵ်ႉတႂ်ႈ၊ ၼွင်ၵွင်၊ လွႆသႃႇ၊ ၼမ်ႉၶမ်းၽွင်၊ ပွၵ်ႉၼိူဝ်၊ ၵုၼ်လူင်လႄႈ ၼမ်ႉတီး ၸိူဝ်း ၼႆႉ။

ဝတ်ႉမၢၼ်ႈၵုၼ် ၸၢႆး 80 ၵေႃႉ ယိင်း 142 ၵေႃႉ ႁူမ်ႈ 222 ၵေႃႉ ပဵၼ်ၵူၼ်းမၢၼ်ႈၵုၼ်လူင်၊ မၢၼ်ႈပုင်ႇ၊ ၼွင်တိူၼ်း၊ ၵွင်းတပ်ႉ၊ ၼွင်မႃႉလူင်၊ ၼွင်ၵွင်၊ ႁူဝ်ၼွင်၊ ဢွင်ႇမႅတ်ႈတႃႇ၊ ပွၵ်ႉတႂ်ႈ (ႁွင်ႇ)၊ ၵုင်းၵလႃး၊ ပွၵ်ႉတႂ်ႈလႄႈ ငွၼ်ဢိၼ်ႇ ၸိူဝ်း ၼႆႉ။ ၵူၼ်းပၢႆႈ ၽေးသိုၵ်း တီႈဝဵင်းၼမ်ႉၶမ်း တင်းမူတ်း ႁူမ်ႈၵၼ် မီး 2,427 ၵေႃႉယဝ်ႉ။