မိူဝ်ႈၼႆႉ ဝၼ်းတီႈ 1/11/2023 ယၢမ်းၵၢင်ၼႂ် 9 မူင်းပၢႆ မၢၵ်ႇလူင် သိုၵ်းမၢၼ်ႈ တူၵ်းသႂ်ႇၵူၼ်းမိူင်း ပွၵ်ႉ 8 ဝဵင်းပၢင်ႇသၢႆး ၸႄႈ ဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ လူႉတၢႆထင်တီႈ 1 ၵေႃႉ မၢတ်ႇၸဵပ်းႁၢဝ်ႈႁႅင်း 1 ၵေႃႉ ၼႆယဝ်ႉ။

ၵူၼ်းပိုၼ်ႉတီႈ ဝဵင်းပၢင်ႇသၢႆး လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်မၢၵ်ႇသိုၵ်းမၢၼ်ႈ ယိုဝ်းမႃးၶႃႈဢေႃႈ တူၵ်းသႂ်ႇႁိူၼ်း ၵူၼ်းဝၢၼ်ႈ တီႈပွၵ်ႉ 8 ယွမ်ႇႁိမ်းႁူင်းပလိၵ်ႈပၢင်ႇသၢႆးၼႆႉ တိူဝ်ႉသႂ်ႇၽူႈၸၢႆး ၵေႃႉၼိုင်ႈ လူႉတၢႆထင်တီႈ ယဝ်ႉၵေႃႈ ၸၢၵ်ႇမၢၵ်ႇတိူဝ်ႉသႂ်ႇ ၼၢင်း ယိင်း ၵေႃႉၼိုင်ႈ လႆႈတိူဝ်ႉမၢတ်ႇၸဵပ်းၸွမ်း ဢၼ်ၵူၼ်းလူႉတၢႆ မၢတ်ႇၸဵပ်းၼၼ်ႉ တေမီးဢႃယုမွၵ်ႈ 30 ၼႆႉ။ ၶဝ်ပဵၼ်လုၵ်ႈ လဵင်ႉ တီႈႁၢၼ်ႉၶၢႆမႃႇလႃႇႁိၼ်းၼၼ်ႉၶႃႈဢေႃႈ”- ဝႃႈၼႆ။

ယၢမ်းလဵဝ် တူဝ်တၢႆလႄႈ ၵူၼ်းမၢတ်ႇၸဵပ်းၼၼ်ႉ လႆႈသူင်ႇဝႆႉတီႈ ႁူင်းယႃလူင် ဝဵင်းမူႇၸေႊဝႆႉယဝ်ႉ။ ဢိင်ၼိူဝ် လွင်ႈပၢင်တိုၵ်း တီႈဝဵင်းပၢင်ႇသၢႆးၼႆႉသေ ဢွင်ႈတီႈတႃႇႁပ်ႉၵူၼ်းပၢႆႈၽေးသိုၵ်း တီႈဝၢၼ်ႈၵွင်းၶၢင်၊ ဝၢၼ်ႈၼမ်ႉသွၼ်းလႄႈ ဝၢၼ်ႈၼမ်ႉပၢၼ်း ၸိူဝ်းၼၼ်ႉတႄႉ ႁၢင်ႈႁႅၼ်းဝႆႉယဝ်ႉ။

“မိူဝ်ႈလဵဝ် ဢွင်ႈတီႈတႃႇႁပ်ႉ ၵူၼ်းပၢႆႈၽေးသိုၵ်း ဝၢၼ်ႈၵွင်းၶၢင်ၼၼ်ႉ ႁၢင်ႈႁႅၼ်းပႂ်ႉႁပ်ႉဝႆႉယဝ်ႉ ၵူၺ်းၵႃႈ ပၢင်တိုၵ်းသမ်ႉ တိုၵ်ႉပဵၼ်ႁၢဝ်ႈႁႅင်းလႄႈ ၵူၼ်းမိူင်းဢမ်ႇႁတ်းဢွၵ်ႇႁိူၼ်း။ သိုၵ်းမၢၼ်ႈ ဢဝ်ၶိူင်ႈမိၼ်မႃးပွႆႇမၢၵ်ႇသႂ်ႇထႅင်ႈ ယဝ်ႉၵေႃႈ သိုၵ်း မၢၼ်ႈ ဢၼ်ယူႇတီႈ 105 လၵ်းၼၼ်ႉၵေႃႈ ယိုဝ်းၵွင်ႈလူင်မႃးတူၵ်းတႅၵ်ႇ ၼႂ်းဝဵင်း ၼႂ်းၵၢင်ဝၼ်း ၸိူဝ်း ၼႆႉထႅင်ႈတင်းၼမ်”- ၵူၼ်းပိုၼ်ႉတီႈ ဝဵင်းပၢင်ႇသၢႆး သိုပ်ႇလၢတ်ႈၼႄၼင်ႇၼႆ။

ဢိင်ၼိူဝ် လွင်ႈပၢင်တိုၵ်း တီႈဝဵင်းပၢင်ႇသၢႆးၼႆႉသေ ယူႇတီႈ ၸုမ်းဢူၺ်းလီ ပွတ်းႁွင်ႇ 3 ၸုမ်း ၶဝ်ႈလူမ်ႇယိုဝ်း တီႈႁူင်းပလိၵ်ႈ မၢၼ်ႈ တီႈဝဵင်းပၢင်ႇသၢႆးသေ ယၢမ်းလဵဝ် ယိုတ်းလႆႈဝႆႉ ႁူင်းပလိၵ်ႈယဝ်ႉ ၵူၼ်းပိုၼ်ႉတီႈ ဝဵင်းပၢင်ႇသၢႆးလၢတ်ႈ။

ပူၼ်ႉမႃး မိူဝ်ႈဝၼ်းတီႈ 31/10/2023 ၼႆႉ ယူႇတီႈ ၸုမ်းဢူၺ်းလီပွတ်းႁွင်ႇ 3 ၸုမ်း မိူၼ်ၼင်ႇ သိုၵ်းၵူဝ်းၵၢင်ႉ MNDAA ၊ သိုၵ်းတဢၢင်း TNLA လႄႈ သိုၵ်းရၶႅင်ႇ AA ႁူမ်ႈၵၼ် ပိုၼ်ၽၢဝ်ႇဢွၵ်ႇမႃးဝႃႈ ပၢင်တိုၵ်း ၼႂ်းၸိုင်ႈတႆးပွတ်းႁွင်ႇ ၶၢဝ်းတၢင်း 5 ဝၼ်းမႃးၼႆႉ ယိုဝ်းလႆႈ တပ်ႉသိုၵ်းမၢၼ်ႈ ၼႂ်းၸႄႈဝဵင်းၼမ်ႉၽႃႈ (ၶျိၼ်းသူၺ်ႇႁေႃႇ)၊ ၽွင်းသႅင် ၸႄႈဝဵင်းမူႇ ၸေႊ၊ ၸႄႈဝဵင်းသႅၼ်ဝီ ၸိူဝ်းၼႆႉ ဢမ်ႇယွမ်း 80 ဢွင်ႈတီႈယဝ်ႉ။