သိုၵ်းမၢၼ်ႈ ၸႂ်ႉၶိူင်ႈမိၼ်ပွႆႇမၢၵ်ႇသႂ်ႇ တပ်ႉပၢင်သဝ်းၵဝ်ႈၵၢင်ႉ MNDAA တိူဝ်ႉၺႃးၵွင်းမူးသူႇၼိုင်ႈ ၼႂ်းၸႄႈဝဵင်းလႃႈသဵဝ်ႈ။
မိူဝ်ႈဝၼ်းတီႈ 25/10/2023 ယၢမ်းၵၢင်ဝၼ်း 11 မူင်းၶိုင်ႈ သိုၵ်းမၢၼ်ႈဢဝ်ၶိူင်ႈမိၼ်မႃးယိုဝ်း တပ်ႉပၢင်သဝ်းသိုၵ်းၵဝ်ႈၵၢင်ႉ MNDAA ဢၼ်မီး ႁိမ်းထၢတ်ႈမူၺ်ႇတေႃႇ ၼႂ်းဝၢၼ်ႈပၢင်ႇၸူင် ၊ ၵုင်းသႃႇ ၸႄႈဝဵင်းလႃႈသဵဝ်ႈ ၊ မၢၵ်ႇလူင်တူၵ်း 2 လုၵ်ႈ တိူဝ်ႉၺႃးၵွင်းမူး သူႇၼိုင်ႈလူႉၵွႆၵူၼ်ႇပင်း။
ၵူၼ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၶဝ်ၸႂ်ႉၶိူင်ႈမိၼ်မႃးပၼ်ႇလဵပ်ႈသေ ပွႆႇမၢၵ်ႇသႂ်ႇ 2 ၵမ်းၼႆႉဢေႃႈ။ ၶဝ်ႁူႉဝႃႈ MNDAA ၶဝ် မႃးယူႇၼႂ်းဝၢၼ်ႈလႄႈ မၢၼ်ႈၶဝ်တင်ႈၸႂ်မႃးယိုဝ်း။တီႈတေႉမၼ်း ဢမ်ႇမီးပၢင်တိုၵ်းသင် ။ ၶဝ်ယိုဝ်းသႂ်ႇ ႁိမ်းၵွင်းမူးၸိူဝ်းၼၼ်ႉဢေႃႈ။တိူဝ်ႉသႂ်ႇ ၵွင်းမူးသူႇၼိုင်ႈ။မၢၵ်ႇဢၼ်ဢမ်ႇပႆႇတႅၵ်ႇၵေႃႈ မီးဢေႃႈ ၸိူဝ်းၼၼ်ႉ ” – ဝႃႈၼႆ။
သိုၵ်း MNDAA လႄႈ ၸုမ်းဢူၺ်းလီပွတ်းႁွင်ႇလၢႆၸုမ်း ၶဝ်ႈဢဝ်တီႈယူႇၸွမ်းဢိူင်ႇၸွမ်းဝၢၼ်ႈ ထုင်ႉၾၢႆႇႁွင်ႇ ဝဵင်းလႃႈသဵဝ်ႈ၊ ယူႇၶူၼ်းၶဝ်းၵိုၵ်းၸွမ်းၵူၼ်းဝၢၼ်ႈ ၊ သိုၵ်းမၢၼ်ႈသမ်ႉ ယိုဝ်းၵွင်ႈလူင်သႂ်ႇၵူႈဝၼ်း ၊ ၵူၼ်းမိူင်းဢမ်ႇမီးလွင်ႈႁူမ်ႇလူမ်ႈ ။
ၵူၼ်းပိုၼ်ႉတီႈလၢတ်ႈတီႈၽူႈတွႆႇႁွၵ်ႈဝႃႈ – “ ၵူဝ်ပဵၼ်ပၢင်တိုၵ်းၵူၺ်းဢေႃႈ။ မိူဝ်ႈလဵဝ်သမ်ႉ မႅၼ်ႈၽွင်းပိူၼ်ႈပၢတ်ႇၶဝ်ႈ ဢဝ်ၶဝ်ႈၶႃႈလူးၼေႃႈ။ ဝႃႇသႃၵေႃႈ ၸမ်ဢွၵ်ႇယဝ်ႉလႄႈ ၵၢၼ်ၵိၼ်လူႇ ပွႆးလၢမ်းသင်ၵေႃႈ ၵူၼ်းဝၢၼ်ႈဢမ်ႇၸၢင်ႈ ႁဵတ်း။ ႁႆႈၼႃးသူၼ်ၵေႃႈ ၽႂ်ဢမ်ႇႁတ်းၵႂႃႇမၼ်းယဝ်ႉ။မိူဝ်ႈလဵဝ် ဢမ်ႇဢိုပ်းလႄႈ ၵိုတ်းၵွႆးယဝ်ႉ” – ဝႃႈၼႆ။
လွင်ႈဝႃႈ ၸုမ်းယိပ်းၵွင်ႈၵၢင်ႇ ၶဝ်ႈဢဝ်တီႈယူႇ ၸွမ်းဢွင်ႈတီႈသႃႇသၼႃႇ ၊ ယူႇၸွမ်းဢွင်ႈတီႈၵူၼ်းမိူင်းၵႂႃႇမႃး ယူႇသဝ်းၸိူဝ်းၼႆႉ ၽိတ်းပိူင် ၵျီႊၼီႊဝိူဝ်ႊ ၶွၼ်ႊဝႅၼ်ႊသျိၼ်ႊ (Geneva Convention) လႆႈႁူႉၼင်ႇၼႆ။
ဝႃႈၼၼ်သေတႃႉ တႄႇဢဝ်ႁူဝ်လိူၼ် ဢွၵ်ႊထူဝ်ႊပိူဝ်ႊၼႆႉမႃးၵေႃႈ သိုၵ်းတဢၢင်း TNLA ဢဵၼ်ႁႅင်း ဢမ်ႇယွမ်း 200 တိုၵ်ႉၶဝ်ႈဢဝ်တီႈယူႇၸွမ်း တီႈယူႇတၼ်းသဝ်းၵူၼ်းမိူင်းလၢႆတီႈ ၼႂ်းဝၢၼ်ႈၸေႊႁႆး ၸႄႈဝဵင်းၼမ်ႉၶမ်း လိူဝ်ၼၼ်ႉ တဵၵ်းၵဵပ်းၶွၼ်ႇယွၼ်းငိုၼ်း ၵူၼ်းမိူင်းပႃးထႅင်ႈလႄႈ ႁဵတ်းႁႂ်ႈၵူၼ်းမိူင်းၵိၼ်းၸႂ်။
