ပလိၵ်ႈၾၢႆႇၵုမ်းရူတ်ႉၶိူင်ႈတီႈလႃႈသဵဝ်ႈ ၵူတ်ႇထတ်းရူတ်ႉၶိူင်ႈၵူၼ်းမိူင်းၵၢင်ဝဵင်းႁၢဝ်ႈႁႅင်းမႃးၶၢဝ်းတၢင်းလိူၼ်ပၢႆ၊ ယိုတ်းရူတ်ႉဢၼ်ဢမ်ႇမီးဝႂ်ၶွၼ်ႇသေ ဢၼ်မီးဝႂ်ၶွၼ်ႇသမ်ႉယွၼ်းငိုၼ်း 1 လမ်းဢမ်ႇယွမ်း 3 မိုၼ်ႇပျႃး။

တႄႇၼႂ်းလိူၼ် သႅပ်ႊထိမ်ႊပိူဝ်ႊၼႆႉမႃး ပလိၵ်ႈမၢၼ်ႈလႄႈသိုၵ်းမၢၼ်ႈၵူတ်ႇထတ်း ရူတ်ႉၶိူင်ႈၵၢင်ဝဵင်းလႃႈသဵဝ်ႈ ၊ ရူတ်ႉဢမ်ႇမီးဝႂ်ၶွၼ်ႇၸိူဝ်းၼၼ်ႉ ယိုတ်းဢဝ်ၵႂႃႇဝႆႉၼႂ်းတိူင်းသိုၵ်း ယမၶ သေ ဢမ်ႇပၼ်ၸဝ်ႈၶွင်မႃးထုတ်ႇဢဝ်ၶိုၼ်း၊ လိုၼ်းသုတ်း တၢင်ႇၵႃးသူင်ႇၸူးၼေႇပျီႇတေႃႇ ႁဵတ်းႁႂ်ႈ ၵူၼ်းမိူင်းၸဝ်ႈရူတ်ႉၶိူင်ႈ လိူတ်ႇႁွၼ်ႉမႆႈၸႂ်။

ၵူၼ်းပိုၼ်ႉတီႈလႃႈသဵဝ်ႈၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ ရူတ်ႉၶိူင်ႈဢၼ်မီးဝႂ်ၶွၼ်ႇသမ်ႉ ၶဝ်ၵူတ်ႇထတ်းတူၺ်း ၸွင်ႇသႂ်ႇၶႅပ်းမၢႆထပဵၼ်း( နံပါတ်ပြား)  ၸွင်ႇသႂ်ႇဝႆႉတၢင်းၼႃႈ တၢင်းလင်၊ ၸွင်ႇသႂ်ႇမႅၼ်ႈတီႈမၼ်း၊ ၸွင်ႇၵူၼ်းၶပ်းမၼ်းသႂ်ႇမၢၵ်ႇႁူဝ်ရူတ်ႉၶိူင်ႈ၊ ၸွင်ႇၵူၼ်းၶပ်းမၼ်းမီးဝႂ်ၶပ်းၶီႇ ၸိူဝ်းၼႆႉ ၊ ပေႃးဢမ်ႇမီးသေဢၼ်ဢၼ် ၶဝ်သမ်ႉယွၼ်းငိုၼ်း 3 မိုၼ်ႇပျႃးသေ ပွႆႇလွတ်ႈၵႂႃႇၼႆဢေႃႈ။ ရူတ်ႉဢၼ်ဢမ်ႇမီးသႂ်ၶွၼ်ႇလႃးလႃးတႄႉၵေႃႈ ယိုတ်းဢဝ်ၵႂႃႇဝႆႉၼႂ်းတိူင်းသိုၵ်းၶဝ်သေ ဝၢႆးၼၼ်ႉ 2-3 ဝၼ်းၵေႃႈ တၢင်ႇရူတ်ႉလူင် သူင်ႇၼေႇပျီႇတေႃႇ ႁဵတ်းၼႆဢေႃႈ။ ”- ဝႃႈၼႆ။

ပလိၵ်ႈၾၢႆႇၵုမ်းရူတ်ႉၵႃးၶဝ်ၼႆႉ ဢဝ်ၶေႃႈဢၢင်ႈလၢႆဢၼ် သေ ၵူတ်ႇထတ်းတီႉၺွပ်း ရူတ်ႉၵႃး ယူႇၵူႈဝၼ်းလႄႈ ၵူၼ်းမိူင်း ဢမ်ႇၸၢင်ႈၵႂႃႇမႃးလီလီ။ ၸိူဝ်းၺႃးယိုတ်းရူတ်ႉၶိူင်ႈၼၼ်ႉၵေႃႈ ၸိူဝ်းပဵၼ်ၵူၼ်းႁႃၸဝ်ႉၵိၼ်ၶမ်ႈၼၼ်ႉပဵၼ်ဢၼ်ယၢပ်ႇၵိၼ်းၸႂ် ဢွၼ်ၵၼ်ၶၢင်းပွင်ႉၼင်ႇၼႆ။

ၵူၼ်းပိုၼ်ႉတီႈလႃႈသဵဝ်ႈၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ ၶဝ်ၶႂ်ႈ မႃးပႂ်ႉထတ်းၶၢဝ်းလႂ်ၵေႃႈမႃး၊ ၶဝ်ၶႂ်ႈႁႄႉလမ်းလႂ်ၵေႃႈႁႄႉသေထၢမ်ထတ်းလူင်ၵႂႃႇၸိူင်ႉၼၼ်ၵူႈဝၼ်း။  ပလိၵ်ႈၵေႃႈပႃး ၊သိုၵ်းမၢၼ်ႈၵေႃႈပႃး ၊ ၾၢႆႇၵုမ်းရူတ်ႉၵႃးၵေႃႈပႃး ။ ၶႂ်ႈဝႃႈ ပႃးၵူႈႁွင်ႈၵၢၼ်ယဝ်ႉ ပႂ်ႉတီႉၺွပ်းရူတ်ႉၶိူင်ႈၸွမ်းတၢင်းၼႆႉ  ။ ပေႃးၶဝ်ပႂ်ႉၼိုင်ႈတီႈၼႆႉ မွၵ်ႈ 20 ၵေႃႉၸိူဝ်းၼႆႉ။ ပႂ်ႉၺွပ်းမိူဝ်ႈပိူၼ်ႈ ဢမ်ႇတၼ်းႁူႉတူဝ်ၼၼ်ႉ  ” – ဝႃႈၼႆ။

တီႈလႃႈသဵဝ်ႈၼႆႉ လိူဝ်သေ သိုၵ်းမၢၼ်ႈယိုတ်းမိူင်း ႁႃလွၵ်းလၢႆးယွၼ်းၵဵပ်းငိုၼ်းၵူၼ်းမိူင်းယဝ်ႉ ၸုမ်းယိပ်းၵွင်ႈၵၢင်ႇလၢႆၸုမ်းၵေႃႈ လွၵ်ႇငိုတ်ႈၵဵပ်းယွၼ်းငိုၼ်းလႄႈႁဵတ်းႁႂ်ႈ ၵူၼ်းမိူင်းဢမ်ႇလႆႈယူႇသႃႇ။

ၵူၼ်းၼႂ်းပိုၼ်ႉတီႈသိုပ်ႇလၢတ်ႈထႅင်ႈဝႃႈ – “ တီႈလႃႈသဵဝ်ႈၼႆႉ ၸုမ်းယိပ်းၵွင်ႈၵၢင်ႇလၢႆၸုမ်းၵေႃႈ ဢွၼ်ၵၼ်ယွၼ်းငိုၼ်းၵဵပ်းၶွၼ်ႇ ။ပေႃးၵူၼ်းမိူင်း ဢမ်ႇပၼ်ၵေႃႈ ၺႃးလွၵ်ႈငိုတ်ႈ ပိုတ်းယိုဝ်းၸိူဝ်းၼႆႉၵေႃႈမီး။မၢင်ၸိူဝ်းထိုင်လူႉသဵင်ႈသၢႆၸႂ် ” – ဝႃႈၼႆ။

ၵူၼ်းပိုၼ်ႉတီႈတႄႉလၢတ်ႈဝႃႈ – တီႈလႃႈသဵဝ်ႈၼႆႉ ၵႆႉဢဝ်မၢၵ်ႇႁၢင်ႈဝႆႉၼႂ်းရူတ်ႉၶိူင်ႈသေ တႅၵ်ႇ မႃးၶိူဝ်းယႂ်း။ ရူတ်ႉၸိူဝ်းၼၼ်ႉၵမ်ႈၼမ်ပဵၼ်ရူတ်ႉဢမ်ႇမီးဝႂ်ၶွၼ်ႇသေ ၵမ်ႈၼမ်ပဵၼ်ဢၼ်ဢမ်ႇမီးၸဝ်ႈၶွင် ။ ၵွပ်ႈၼႆ ပလိၵ်ႈၶႂ်ႈၵူတ်ႇထတ်းလွင်ႈၼၼ်ႉၵေႃႈပႃး ဝႃႈၼႆ။

တီႈဝဵင်းလႃႈသဵဝ်ႈၼႆႉ ၼႂ်းပီ 2023 ၼႆႉၵူၺ်း မၢၵ်ႇတႅၵ်ႇတိူဝ်ႉသႂ်ႇၵူၼ်းမိူင်းတၢႆ 8 ၵေႃႉယဝ်ႉ၊ ဢၼ်မၢတ်ႇၸဵပ်းၸၢၵ်ႇမၢၵ်ႇသမ်ႉ မီး 40 ပၢႆယဝ်ႉ လႆႈႁူႉၼင်ႇၼႆ။

ဝၼ်းတီႈ 27/09/2023 ၼၼ်ႉၵေႃႈ မၢၵ်ႇတႅၵ်ႇတီႈ ပၢမ်ႉၼမ်ႉမၼ်း ၻႅင်ႊၵူဝ်ႉ DENKO ဢၼ်မီးတၢင်းၼွၵ်ႈဝဵင်းလႃႈသဵဝ်ႈ ၊ တုမ်ႉတိူဝ်ႉရူတ်ႉၵႃးလူႉၵွႆလၢႆလမ်း၊ ၵူၼ်းမၢတ်ႇၸဵပ်းလူႉတၢႆၵေႃႈမီး။