ဢဵၼ်ႁႅင်းလူတ်းယွမ်းႁႅင်းလႄႈ သိုၵ်းမၢၼ်ႈလူင်းၵဵပ်းၵူၼ်းမႂ်ႇတႃႇထႅမ်ႁႅင်းသိုၵ်း၊ ၵူဝ်ဢမ်ႇမီးၵူၼ်းၶႂ်ႈႁဵတ်းသိုၵ်းၼႆသေ ထၢမ်ဢဝ်ငိုၼ်းဢဝ်ၸၼ်ႉလႅၵ်ႈ ငၢႆးမိူၼ်ၼင်ႇၵၢၼ်သိုဝ်ႉၵၢၼ်ၶၢႆ ။

တႄႇဢဝ်ႁူဝ်ပီ 2023 ၼၼ်ႉမႃး သိုၵ်းမၢၼ်ႈယိုတ်းမိူင်း သင်ႇၵူၼ်းပႃႈတႂ်ႈ လူင်းၵဵပ်းလုၵ်ႈသိုၵ်းမႂ်ႇ တႃႇထႅမ်ႁႅင်းသိုၵ်း၊ ၼင်ႇႁိုဝ်တေႁႃငၢႆႈၵေႃႈ ဢဝ်ငိုၼ်းၼပ်ႉႁူဝ်သႅၼ်သေ လွၵ်ႇဢဝ် ၊ ၸႂ်ႉလၢႆးတၢင်းၽၢမ်းတႃ လၢႆလၢႆးသေ ႁွင်ႉႁူၺ်း ၵူၼ်းၶဝ်ႈႁဵတ်းသိုၵ်း တႃႇၵမ်ႉႁႅင်းသိုၵ်း ၼႆယဝ်ႉ။

သိုၵ်းထၢၵ်ႈ ဢွၵ်ႇႁဵတ်း CDM ၵေႃႉၼိုင်ႈလၢတ်ႈတီႈသိုဝ်ႇ DVB ဝႆႉဝႃႈ – “ ၸႂ်ႈဢေႃႈ ။ ၼိုင်ႈလိူၼ်တေလႆႈ ႁႃလၢႆၵေႃႉ ၼႆ ၶဝ်တမ်းဝၢင်းမႃးဝႆႉဢေႃႈ။ 6 လိူၼ်ၼိုင်ႈပွၵ်ႈ ႁွင်ႉႁဵတ်းပၢင်ၵုမ်ႁေ ယဝ်ႉၵေႃႈ သိုၵ်းပႃႈတႂ်ႈၸိူဝ်းၼႆႉ လႆႈႁၢႆးငၢၼ်းၼႄ ဝႃႈ လႆႈၵူၼ်းမႂ်ႇလၢႆၵေႃႉ ၊ တပ်ႉလႂ် ႁႃၵူၼ်းသိုၵ်းမႂ်ႇလႆႈၼမ်ၸိူဝ်းၼႆႉ လႆႈလၢတ်ႈၼႂ်းပၢင်ၵုမ်ၼၼ်ႉဢေႃႈ။ ၽူႈမီးၸၼ်ႉၵေႃႉလႂ် ႁႃ ၵူၼ်းသိုၵ်းလႆႈၼမ်ၵေႃႈ  လႆႈၼႃႈလီတီႈၵူၼ်းလူင်ၶဝ်ၵႃႈၼၼ်ႉ၊ ထုၵ်ႇယွင်ႈယေႃးဢဝ်ၵုင်ႇမုၼ်ၵႃႈၼၼ်ႉ ” – ဝႃႈၼႆ။

ၵၢၼ်ႁႃလုၵ်ႈသိုၵ်းမႂ်ႇၼႆႉ ၸၢင်ႈၵမ်ႉယၼ်ပၼ် တႃႇၶိုၼ်ႈၸၼ်ႉသိုၵ်းၽႂ်မၼ်းလႄႈ ၵူၼ်းၼႂ်းတပ်ႉၵေႃႈ ဢွၼ်ၵၼ်တင်ႈၸႂ်ႁႃႁွင်ႉႁူၺ်းၵူၼ်းမႃးႁဵတ်းသိုၵ်း ။ ဢိင်ၼိူဝ် ၸၼ်ႉလိၵ်ႈလုၵ်ႈသိုၵ်းမႂ်ႇ သုင်ၵႃႈႁိုဝ်သေ သိုၵ်းၵေႃႉဢၼ်ႁွင်ႉႁူၺ်းမႃးၼၼ်ႉ လႆႈၼမ်ႉတွၼ်းၸွမ်းၵႃႈၼၼ်ႉ သိုၵ်းထၢၵ်ႇ CDM ၼၼ်ႉလၢတ်ႈၼင်ႇၼႆ။

ၽူႈမီးၸၼ်ႉသိုၵ်းမၢၼ်ႈ ဢၼ်သၢၼ်ၶတ်းသိုၵ်းဢႃၼႃႇယိုတ်းမိူင်းသေ ဢွၵ်ႇႁဵတ်း CDM ၵေႃႉၼိုင်ႈလၢတ်ႈတီႈသိုဝ်ႇ DVB ဝႆႉဝႃႈ – “ ပေႃးၽႂ်ႁႃသိုၵ်းမႂ်ႇမႃးလႆႈၵေႃႈ  တႃႇၸၼ်ႉၶဝ်တေၶိုၼ်ႈထႅင်ႈၵေႃႈငၢႆႈဢေႃႈ။ ပေႃးလႆႈၵူၼ်းမႂ်ႇမႃး ယဝ်ႉ ၵေႃႈ ၶဝ်တေတူၺ်းၸၼ်ႉလိၵ်ႈၵူၼ်းမႂ်ႇၼၼ်ႉထႅင်ႈ။ ပေႃးဢွင်ႇၸၼ်ႉသိပ်း၊ လႆႈၸုမ်ႈၶူး ၸိူဝ်းၼႆႉၸိုင် ၵူၼ်းႁွင်ႉမႃး မၼ်း ၶိုၼ်ႈၸၼ်ႉလၢႆးၼိုင်ႈ ပေႃးလႆႈၵူၼ်းဢမ်ႇဢွင်ႇပူၼ်ႉၸၼ်ႉလိၵ်ႈသင်မႃးသမ်ႉ တေၶိုၼ်ႈၸၼ်ႉ ပၼ် ၵူၼ်းႁႃ မၼ်းထႅင်ႈလၢႆးၼိုင်ႈ ႁဵတ်းၼႆ တေပႅၵ်ႇပိူင်ႈၵၼ်ၵႂႃႇ” ဝႃႈၼႆ။

လုၵ်ႈသိုၵ်းမၢင်ၵေႃႉၵေႃႈ ယွၼ်ႉၶႂ်ႈၶိုၼ်ႈၸၼ်ႉၽႂ်းၶၼ်လႄႈ လႄႇႁႃလုၵ်ႈသိုၵ်းမႂ်ႇ။ ၵမ်ႉၽွင်ႈ လႄႇႁႃဢဝ်ငိုၼ်း လႅၵ်ႈသေ ႁွင်ႉႁူၺ်းမႃးၵေႃႈ မီးၼႆယဝ်ႉ။

ၽူႈမီးၸၼ်ႉသိုၵ်းမၢၼ်ႈ ဢၼ်သၢၼ်ၶတ်းသိုၵ်းဢႃၼႃႇယိုတ်းမိူင်းသေ ဢွၵ်ႇႁဵတ်း CDM ၵေႃႉၼိုင်ႈလၢတ်ႈတီႈသိုဝ်ႇ DVB ဝႆႉဝႃႈ – “ မၢင်ၵေႃႉ ၵူဝ်ဢမ်ႇႁႃလႆႈၵူၼ်းမႂ်ႇလႄႈ ဢဝ်ငိုၼ်းမွၼ်ႁေ ႁွင်ႉႁူၺ်းမႃးဢေႃႈ ။ မိူၼ်ၵၢၼ်သိုဝ်ႉ ၵၢၼ်ၶၢႆၵၼ် ၼၼ်ႉၶႃႈယဝ်ႉ”-  ဝႃႈၼႆ။

သိုၵ်းမၢၼ်ႈႁဵတ်းပၢင်ၾိုၵ်းၽွၼ်ႉပၼ် သိုၵ်းမႂ်ႇ 13 တီႈ ၊ၼိုင်ႈပီလႂ် ၸတ်းပၢင်ၾိုၵ်းၽွၼ်ႉလႆႈ 3-4 တီႈ ၊ ၼိုင်ႈတီႈလႂ် ႁပ်ႉၾိုၵ်းၵၢၼ်သိုၵ်းပၼ် ၵူၼ်းမႂ်ႇ 150 ၵေႃႉ။ တႃႇလႆႈ လုၵ်ႈသိုၵ်းမႂ်ႇမႃးၼႆႉ ၶဝ်လူင်းတိုၼ်းလၢင်းပၼ်ၼိုင်ႈၵေႃႉလႂ် ငိုၼ်း 10 သႅၼ် ၊ ၼမ်ႉမၼ်းၵိၼ် 1 ပုင်း ၊ ၶဝ်ႈသၢၼ် 1 ထူင်  ၼႆ လုၵ်ႈသိုၵ်းမၢၼ်ႈ ဢွၵ်ႇႁဵတ်း CDM ၵေႃႉၼိုင်ႈလၢတ်ႈၼင်ႇၼႆ။

မိူၼ်ၼင်ႇ တီႈတိူင်းပႃႇၵိူဝ်ၸိူဝ်းၼႆႉၵေႃႈ မိူဝ်ႈလဵဝ် သိုၵ်းမၢၼ်ႈလူင်းၵဵပ်းသိုၵ်းမႂ်ႇလႄႈ ၵူၼ်းမိူင်း ဢွၼ်ၵၼ်မႆႈၸႂ်ၽႂ်မၼ်းဝႆႉ။

ၽူႈၶဝ်ႈၸုမ်းႁွင်ႈၵၢၼ်ၽွင်းငမ်းၸႄႈဝဵင်း   ၼႂ်းတိူင်းပႃႇၵိူဝ်ၵေႃႉၼိုင်ႈ လၢတ်ႈဝႃႈ – “ မိူဝ်ႈလဵဝ် တပ်ႉသိုၵ်းဢၼ်မီးၼႂ်း တိူင်းပႃႇၵိူဝ်ၸိူဝ်းၼၼ်ႉ လူင်းၵဵပ်းသိုၵ်းမႂ်ႇ ၼိုင်ႈဝဵင်းလႂ် 5 ၵေႃႉသေ ၶၢဝ်းတၢင်းၼိုင်ႈလိူၼ်လႂ် ႁႂ်ႈလႆႈ လုၵ်ႈသိုၵ်းမႂ်ႇ 40 ၵေႃႉ။ၶဝ်ပၼ်ငိုၼ်း ၼိုင်ႈၵေႃႉလႂ် 2 သႅၼ်ထိုင် 3 သႅၼ်သေယဝ်ႉၵေႃႈ ၵဵပ်းၵႂႃႇဢေႃႈ။ၼႄၶေႃႈဢၢင်ႈဝႃႈ တႃႇပႂ်ႉတူၺ်းလူလွမ်ဝၢၼ်ႈၽႂ်ဢိူင်ႇမၼ်းၼႆသေ ႁွင်ႉၵႂႃႇ။တီႈတေႉမၼ်းႁွင်ႉၵႂႃႇႁဵတ်းသိုၵ်းၼႆဢေႃႈ ” – ဝႃႈၼႆ။

ပၢင်တိုၵ်းသိုၵ်းၸၢဝ်းၶိူဝ်း ၊ သိုၵ်း PDF လႄႈ သိုၵ်းမၢၼ်ႈယိုတ်းမိူင်းၵေႃႈ မီးၵူႈမိုဝ်ႉၵူႈဝၼ်း ဢဵၼ်ႁႅင်းသိုၵ်းမၢၼ်ႈၵေႃႈ ယွမ်းလူင်းမႃး ၶိူဝ်းယႂ်းလႄႈ တပ်ႉသိုၵ်းမၢၼ်ႈလၢႆတပ်ႉၵွင် လႄႇႁႃၵဵပ်းလုၵ်ႈသိုၵ်းမႂ်ႇတႃႇထႅမ်ႁႅင်းသိုၵ်း ။ယွၼ်ႉၵၢၼ်တူၺ်းလူလွမ်ၵၼ်ၼႂ်း တပ်ႉသိုၵ်းဢမ်ႇၶႅမ်ႉလႅပ်ႈ ၊ ဢမ်ႇမီးလွင်ႈၽဵင်ႇပဵင်းလႄႈ လုၵ်ႈသိုၵ်းၸၼ်ႉလဵၵ်ႉၸၼ်ႉဢွၼ်ႇၶဝ် ဢွၼ်ၵၼ်ဢွၵ်ႇပၢႆႈ ၶဝ်ႈႁဵတ်း CDM ၵေႃႈ မီးမႃးၼမ်။