လုမ်းတြႃးသိုၵ်းမၢၼ်ႈ ထတ်းသိၼ်ၽူႈမီးၸၼ်ႉၼႂ်းၽူႈပွင်ၵၢၼ်သိုၵ်းၶဝ် 2 ၵေႃႉ ဢၼ်ပဵၼ် ၸွမ်သိုၵ်း မူဝ်းမိၼ်ႉထုၼ်း လႄႈ ၵႅမ်ၸွမ်ႁၢၼ် ယၢၼ်ႇၼွင်ႇၸူဝ်း ဢၼ်ၺႃးတီႉၺွပ်းၵုမ်းၶင်ဝႆႉၼၼ်ႉၶိုၼ်းသေ ပိုၼ်ၽၢဝ်ႇ မိူဝ်ႈဝၼ်းတီႈ 10 ၼႆႉဝႃႈ ပၼ်တူတ်ႈတၢမ်ႇၶွၵ်ႈတေႃႇၸူဝ်ႈ ဝႃႈၼႆ ။
သိုၵ်းမၢၼ်ႈ 2 ၵေႃႉၼႆႉ ၶဝ်ႈပႃးၼႂ်းၸုမ်းပွင်ၵၢၼ်သိုၵ်းၸၼ်ႉသုင်၊ မိူဝ်ႈသိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်းၼၼ်ႉၵေႃႈ ထုၵ်ႇၸွမ်ၸိၵ်းးသိုၵ်းမၢၼ်ႈမိၼ်းဢွင်ႇလၢႆႇ ယုၵ်ႉတၢင်ႇပၼ်တီႈယူႇဝႆႉၸၼ်ႉသုင်။ ၵူၺ်းၵႃႈဢမ်ႇႁိုင်သင် ၶိုၼ်းၺႃးပူတ်းပၢၵ်ႈၼႃႈတီႈပုၼ်ႈၽွၼ်းသေ တီႉၺွပ်းယဵတ်ႈၶွၵ်ႈလူၺ်ႈတၢင်းၽိတ်း ၸႂ်ႉဢႃႇၼႃႇၽိတ်းတီႈသေ ႁဵတ်းပၢႆးမၢၵ်ႈမီးတႃႇသုၼ်ႇတူဝ်။ၵိၼ်ငိုၼ်းသူးငိုၼ်းလၢပ်ႈ၊ ပေႉၵိၼ်တဵၵ်းတဵင်ၽူႈႁူမ်ႈၽၢၵ်ႈၵၢၼ်ငၢၼ်းၸိူဝ်းၼႆႉသေ ထိုင်တီႈထတ်းထွင်တြႃးသေ ၺႃးတူတ်ႈတၢမ်ႇၶွၵ်ႈတေႃႇၸူဝ်ႈ – ၵူၺ်းၵႃႈလွင်ႈၼႆႉ ၸွမ်သိုၵ်းသိုၵ်းမၢၼ်ႈမိၼ်းဢွင်ႇလၢႆႇ ၶႂ်ႈႁဵတ်းႁၢင်ႈ ပၢတ်ႇၶေႃးၵႆႇၼႄလိင်းၵူၺ်း ၊ ယွၼ်ႉပိူဝ်ႈၼႂ်းတပ်ႉသိုၵ်းမၢၼ်ႈလႄႈသင် ၸုမ်းလူင်ပွင်ၸိုင်ႈ ၽွင်းသိုၵ်းမၢၼ်ႈယိုတ်းမိူင်းလႄႈသင် ယၢမ်ႈမီးလွင်ႈၵိၼ်သူးၵိၼ်လၢပ်ႈမႃးလိူင်ႇၼမ် ၵူႈသိုပ်ႇၵူႈပၢၼ်တေႃႇထိုင်ယၢမ်းလဵဝ် – သိုၵ်းမၢၼ်ႈ CDM ၵေႃႉၼိုင်ႈၵေႃႈလၢတ်ႈဝႆႉတီႈၶၢဝ်ႇ RFA ၼင်ႇၼႆ။
ၸွမ်းၼင်ႇၶၢဝ်ႇၸမ်ၸႂ်ၸွမ်းသိုၵ်းမၢၼ်ႈလၢတ်ႈတႄႉ သိုၵ်းမၢၼ်ႈတင်းသွင်ၵေႃႉၼႆႉ ပဵၼ်ၵူၼ်းၸမ်ၸႂ်လႄႈဢၼ်ၸွမ်ၸိၵ်းသိုၵ်းမၢၼ်ႈမိၼ်းဢွင်ႇလၢႆႇ ယုမ်ႇၸႂ်၊ ထိုင်တီႈ ပၼ်တီႈယူႇသုင်ဝႆႉၸဵမ်မိူဝ်ႈၶွတ်ႇၽွတ်ႈၶွင်ႇသီႇသိုၵ်းမိူဝ်ႈတႄႇယိုတ်းမိူင်း။ ဝၢႆးၼၼ်ႉၵေႃႈ လႆႈၶဝ်ႈပဵၼ်ႁူဝ်ပဝ်ႈၶွမ်ႇမတီႇၵုမ်းၵမ်ၾၢႆႇငိုၼ်းၼွၵ်ႈမိူင်း၊ ၾၢႆႇလူင်းတိုၼ်းလႄႈၵႃႉၶၢႆၶူဝ်းၵုၼ်ႇ ၸိူဝ်းၼႆႉမႃး ။
