ၵူၼ်းမၢၼ်း တီႈဝဵင်းပၢင်လႃႈ ၵေႃႉၼိုင်ႈ ၺႃးသိုၵ်းမၢၼ်ႈ လၢၵ်ႈၸၼ်တီႉၺွပ်းၵႂႃႇလႄႈ ႁဵတ်းႁႂ်ႈမၼ်းၼၢင်းတူၵ်းၸႂ်ၵူဝ်ႁႄသေထိုင်တီႈတူၵ်းလုၵ်ႈ။
ဝၼ်းတီႈ 29/9/2023 ယၢမ်း 2 မူင်းၼၼ်ႉ သိုၵ်းမၢၼ်ႈယိုတ်းမိူင်းၼႄးဝႃႈ ၵူၼ်းၸၢႆးၵေႃႉၼိုင်ႈဢၼ်တီႈ ဝဵင်းပၢင်လႃႈၼၼ်ႉ ၵဵဝ်ႇၵပ်းၵွင်ႉၵၢႆႇၸွမ်းၵၢၼ်သိုၵ်းၵၢၼ်မိူင်းၼႆသေ လိုပ်ႈလမ်းတီႉၺွပ်း။ ၽွင်းသိုၵ်းမၢၼ်ႈ ၶဝ်ႈသွၵ်ႈတဝ်ႁိူၼ်းယေးမၼ်းၸၢႆးၼၼ်ႉ ဢမ်ႇၺႃးမၼ်းၸၢႆး၊ ၺႃးၵေႃႉပဵၼ်မေးၼၢင်း ဢၼ်မီးတွင်ႉပႃးပုမ်ဝႆႉ 3 လိူၼ်။ သိုၵ်းမၢၼ်ႈႁိုတ်းႁၢတ်ႇၸၢတ်ႇသႂ်ႇ ထဵတ်ႈထၢမ်လၢၵ်ႈၸၼ်တီႉၺွပ်းမၼ်းၼၢင်းၵႂႃႇၸွမ်းလႄႈ ႁဵတ်းႁႂ်ႈ မၼ်းၼၢင်းတူၵ်းၸႂ်သေ ဢဝ်လိူတ်ႈသူဝ်ႉတူၵ်းလုၵ်ႈပႅတ်ႈ။
ၵူၼ်းယူႇႁိမ်းၵိၼ်ၸမ် ဢၼ်ပဵၼ်ပီႈၼွင်ႉၵၼ်တင်းမႄႈမၢၼ်းၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ – “ သိုၵ်းမၢၼ်ႈဢဵၼ်ႁႅင်း 10 ပၢႆ ၶဝ်ႈႁိူၼ်းမႃး။ မႃးသွၵ်ႈတဝ်ထဵတ်ႈထၢမ်လွင်ႈၽူဝ်မၼ်း။ ၽူဝ်မၼ်းဢမ်ႇယူႇႁိူၼ်းလႄႈ ဢဝ်မေးမၼ်းၵႂႃႇ။ ၶဝ်ဢဝ်ၵႂႃႇႁွတ်ႈထိုင် ယႂႃႇငၢၼ်ႇၼၼ်ႉ လိူတ်ႈတူၵ်းၼမ်လႄႈ ၸင်ႇဢဝ်ၵႂႃႇသူင်ႇႁူင်းယႃၼႆၶႃႈဢေႃႈ ” – ဝႃႈၼႆ။
ၼၢင်းယိင်း ဢၼ်ၺႃးတီႉၺွပ်းၵႂႃႇၼႆႉ ဢႃယု 23 ပီ ပႃးတွင်ႉဝႆႉ 3 လိူၼ် ယူႇပွၵ်ႉႁူဝ်ၸၢင်ႉ(ဆင်ခေါင်းရပ်ကွက်) ၸႄႈဝဵင်းပၢင်လႃႈ ၸႄႈတွၼ်ႈတူၼ်ႈတီး။
ၽူႈၸမ်ၸႂ်မႄႈမၢၼ်းၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ – “ ၵူၼ်းပႃးတွင်ႉၼႆႉ တိုၵ်ႉႁႃမီး 3 လိူၼ်ၵွႆး ။ မိူဝ်ႈမႃးၺွပ်းၼၼ်ႉၵေႃႈ သိုၵ်းလၢႆလၢႆပေႃးတဵမ်လူင်ဝႆႉ ။ ႁဵတ်းႁႂ်ႈၼၢင်းမႄႈမၢၼ်းၵေႃႉၼႆႉ တူၵ်းၸႂ်ၵူဝ်ဝႆႉဢေႃႈ။ ယွၼ်ႉၼၼ်လႄႈ ထိုင်တီႈလုၵ်ႈမၼ်းတူၵ်း။ သိုၵ်းမၢၼ်ႈၶဝ် ဢဝ်တူဝ်မၼ်းသူင်ႇၵႂႃႇႁူင်းယႃႈတီႈယႂႃႇငၢၼ်ႇ ယဝ်ႉၵေႃႈ ဢဝ်သူင်ႇထိုင်ႁူင်းယႃပၢင်လႃႈၶိုၼ်းယဝ်ႉၼႆဢေႃႈ ” – ဝႃႈၼႆ။
သိုၵ်းမၢၼ်ႈယိုတ်းမိူင်း တီႉၺွပ်းၵူၼ်းၼွင်ႁၢႆးယႃႈ 4 ၵေႃႉပေႃႈမႄႈလုၵ်ႈ ၼႂ်းၼၼ်ႉ ၶိုၼ်းပွႆႇပၼ် ၸိူဝ်းပဵၼ်လုၵ်ႈလၢင်း 2 ၵေႃႉ ၵိုတ်းပေႃႈမႄႈတိုၵ်ႉၺႃး ၵူတ်ႇထတ်းထဵတ်ႈထၢမ် ၵုမ်းၶင် ဝၢႆးၼၼ်ႉ ယိုတ်းဢဝ်ႁိူၼ်းယေးပႃးထႅင်ႈ ။
